౮. ఓఘవగ్గో

౧. ఓఘసుత్తం

౧౭౨. సావత్థినిదానం. ‘‘చత్తారోమే, భిక్ఖవే, ఓఘా. కతమే చత్తారో? కామోఘో, భవోఘో, దిట్ఠోఘో, అవిజ్జోఘో – ఇమే ఖో, భిక్ఖవే, చత్తారో ఓఘా. ఇమేసం ఖో, భిక్ఖవే, చతున్నం ఓఘానం అభిఞ్ఞాయ పరిఞ్ఞాయ పరిక్ఖయాయ పహానాయ…పే… అయం అరియో అట్ఠఙ్గికో మగ్గో భావేతబ్బో’’తి. (యథా ఏసనా, ఏవం సబ్బం విత్థారేతబ్బం.) పఠమం.

౨. యోగసుత్తం

౧౭౩. ‘‘చత్తారోమే, భిక్ఖవే, యోగా. కతమే చత్తారో? కామయోగో, భవయోగో, దిట్ఠియోగో అవిజ్జాయోగో – ఇమే ఖో, భిక్ఖవే, చత్తారో యోగా. ఇమేసం ఖో, భిక్ఖవే, చతున్నం యోగానం అభిఞ్ఞాయ పరిఞ్ఞాయ పరిక్ఖయాయ పహానాయ…పే… అయం అరియో అట్ఠఙ్గికో మగ్గో భావేతబ్బో’’తి. దుతియం.

౩. ఉపాదానసుత్తం

౧౭౪. ‘‘చత్తారిమాని, భిక్ఖవే, ఉపాదానాని. కతమాని చత్తారి? కాముపాదానం, దిట్ఠుపాదానం, సీలబ్బతుపాదానం, అత్తవాదుపాదానం – ఇమాని ఖో, భిక్ఖవే, చత్తారి ఉపాదానాని. ఇమేసం ఖో, భిక్ఖవే, చతున్నం ఉపాదానానం అభిఞ్ఞాయ పరిఞ్ఞాయ పరిక్ఖయాయ పహానాయ…పే… అయం అరియో అట్ఠఙ్గికో మగ్గో భావేతబ్బో’’తి. తతియం.

౪. గన్థసుత్తం

౧౭౫. ‘‘చత్తారోమే, భిక్ఖవే, గన్థా. కతమే చత్తారో? అభిజ్ఝా కాయగన్థో, బ్యాపాదో కాయగన్థో, సీలబ్బతపరామాసో కాయగన్థో, ఇదంసచ్చాభినివేసో కాయగన్థో – ఇమే ఖో, భిక్ఖవే, చత్తారో గన్థా. ఇమేసం ఖో, భిక్ఖవే, చతున్నం గన్థానం అభిఞ్ఞాయ పరిఞ్ఞాయ పరిక్ఖయాయ పహానాయ…పే… అయం అరియో అట్ఠఙ్గికో మగ్గో భావేతబ్బో’’తి. చతుత్థం.

౫. అనుసయసుత్తం

౧౭౬. ‘‘సత్తిమే, భిక్ఖవే, అనుసయా. కతమే సత్త? కామరాగానుసయో, పటిఘానుసయో, దిట్ఠానుసయో, విచికిచ్ఛానుసయో, మానానుసయో, భవరాగానుసయో, అవిజ్జానుసయో – ఇమే ఖో, భిక్ఖవే, సత్తానుసయా. ఇమేసం ఖో, భిక్ఖవే, సత్తన్నం అనుసయానం అభిఞ్ఞాయ పరిఞ్ఞాయ పరిక్ఖయాయ పహానాయ…పే… అయం అరియో అట్ఠఙ్గికో మగ్గో భావేతబ్బో’’తి. పఞ్చమం.

౬. కామగుణసుత్తం

౧౭౭. ‘‘పఞ్చిమే, భిక్ఖవే, కామగుణా. కతమే పఞ్చ? చక్ఖువిఞ్ఞేయ్యా రూపా ఇట్ఠా కన్తా మనాపా పియరూపా కామూపసంహితా రజనీయా, సోతవిఞ్ఞేయ్యా సద్దా…పే… ఘానవిఞ్ఞేయ్యా గన్ధా…పే… జివ్హావిఞ్ఞేయ్యా రసా…పే… కాయవిఞ్ఞేయ్యా ఫోట్ఠబ్బా ఇట్ఠా కన్తా మనాపా పియరూపా కామూపసంహితా రజనీయా – ఇమే ఖో, భిక్ఖవే, పఞ్చ కామగుణా. ఇమేసం ఖో, భిక్ఖవే, పఞ్చన్నం కామగుణానం అభిఞ్ఞాయ పరిఞ్ఞాయ పరిక్ఖయాయ పహానాయ…పే… అయం అరియో అట్ఠఙ్గికో మగ్గో భావేతబ్బో’’తి. ఛట్ఠం.

౭. నీవరణసుత్తం

౧౭౮. ‘‘పఞ్చిమాని, భిక్ఖవే, నీవరణాని. కతమాని పఞ్చ? కామచ్ఛన్దనీవరణం, బ్యాపాదనీవరణం, థినమిద్ధనీవరణం, ఉద్ధచ్చకుక్కుచ్చనీవరణం, విచికిచ్ఛానీవరణం – ఇమాని ఖో, భిక్ఖవే, పఞ్చ నీవరణాని. ఇమేసం ఖో, భిక్ఖవే, పఞ్చన్నం నీవరణానం అభిఞ్ఞాయ పరిఞ్ఞాయ పరిక్ఖయాయ పహానాయ…పే… అయం అరియో అట్ఠఙ్గికో మగ్గో భావేతబ్బో’’తి. సత్తమం.

౮. ఉపాదానక్ఖన్ధసుత్తం

౧౭౯. ‘‘పఞ్చిమే, భిక్ఖవే, ఉపాదానక్ఖన్ధా. కతమే పఞ్చ? సేయ్యథిదం – రూపుపాదానక్ఖన్ధో, వేదనుపాదానక్ఖన్ధో, సఞ్ఞుపాదానక్ఖన్ధో, సఙ్ఖారుపాదానక్ఖన్ధో, విఞ్ఞాణుపాదానక్ఖన్ధో. ఇమే ఖో, భిక్ఖవే, పఞ్చుపాదానక్ఖన్ధా. ఇమేసం ఖో, భిక్ఖవే, పఞ్చన్నం ఉపాదానక్ఖన్ధానం అభిఞ్ఞాయ పరిఞ్ఞాయ పరిక్ఖయాయ పహానాయ…పే… అయం అరియో అట్ఠఙ్గికో మగ్గో భావేతబ్బో’’తి. అట్ఠమం.

౯. ఓరమ్భాగియసుత్తం

౧౮౦. ‘‘పఞ్చిమాని, భిక్ఖవే, ఓరమ్భాగియాని సంయోజనాని. కతమాని పఞ్చ? సక్కాయదిట్ఠి, విచికిచ్ఛా, సీలబ్బతపరామాసో, కామచ్ఛన్దో, బ్యాపాదో – ఇమాని ఖో, భిక్ఖవే, పఞ్చోరమ్భాగియాని సంయోజనాని. ఇమేసం ఖో భిక్ఖవే, పఞ్చన్నం ఓరమ్భాగియానం సంయోజనానం అభిఞ్ఞాయ పరిఞ్ఞాయ పరిక్ఖయాయ పహానాయ…పే… అయం అరియో అట్ఠఙ్గికో మగ్గో భావేతబ్బో’’తి. నవమం.

౧౦. ఉద్ధమ్భాగియసుత్తం

౧౮౧. ‘‘పఞ్చిమాని, భిక్ఖవే, ఉద్ధమ్భాగియాని సంయోజనాని. కతమాని పఞ్చ? రూపరాగో, అరూపరాగో, మానో, ఉద్ధచ్చం, అవిజ్జా – ఇమాని ఖో, భిక్ఖవే, పఞ్చుద్ధమ్భాగియాని సంయోజనాని. ఇమేసం ఖో, భిక్ఖవే, పఞ్చన్నం ఉద్ధమ్భాగియానం సంయోజనానం అభిఞ్ఞాయ పరిఞ్ఞాయ పరిక్ఖయాయ పహానాయ అరియో అట్ఠఙ్గికో మగ్గో భావేతబ్బో. కతమో అరియో అట్ఠఙ్గికో మగ్గో? ఇధ, భిక్ఖవే, భిక్ఖు సమ్మాదిట్ఠిం భావేతి వివేకనిస్సితం…పే… సమ్మాసమాధిం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం. ఇమేసం ఖో, భిక్ఖవే, పఞ్చన్నం ఉద్ధమ్భాగియానం సంయోజనానం అభిఞ్ఞాయ పరిఞ్ఞాయ పరిక్ఖయాయ పహానాయ అయం అరియో అట్ఠఙ్గికో మగ్గో భావేతబ్బో’’తి.

‘‘పఞ్చిమాని, భిక్ఖవే, ఉద్ధమ్భాగియాని సంయోజనాని. కతమాని పఞ్చ? రూపరాగో, అరూపరాగో, మానో, ఉద్ధచ్చం, అవిజ్జా – ఇమాని ఖో, భిక్ఖవే, పఞ్చుద్ధమ్భాగియాని సంయోజనాని. ఇమేసం ఖో, భిక్ఖవే, పఞ్చన్నం ఉద్ధమ్భాగియానం సంయోజనానం అభిఞ్ఞాయ పరిఞ్ఞాయ పరిక్ఖయాయ పహానాయ అరియో అట్ఠఙ్గికో మగ్గో భావేతబ్బో. కతమో అరియో అట్ఠఙ్గికో మగ్గో? ఇధ, భిక్ఖవే, భిక్ఖు సమ్మాదిట్ఠిం భావేతి…పే… సమ్మాసమాధిం భావేతి రాగవినయపరియోసానం దోసవినయపరియోసానం మోహవినయపరియోసానం… అమతోగధం అమతపరాయనం అమతపరియోసానం… నిబ్బాననిన్నం నిబ్బానపోణం నిబ్బానపబ్భారం. ఇమేసం ఖో, భిక్ఖవే, పఞ్చన్నం ఉద్ధమ్భాగియానం సంయోజనానం అభిఞ్ఞాయ పరిఞ్ఞాయ పరిక్ఖయాయ పహానాయ అయం అరియో అట్ఠఙ్గికో మగ్గో భావేతబ్బో’’తి. దసమం.

ఓఘవగ్గో అట్ఠమో.

తస్సుద్దానం –

ఓఘో యోగో ఉపాదానం, గన్థం అనుసయేన చ;

కామగుణా నీవరణం, ఖన్ధా ఓరుద్ధమ్భాగియాతి.

వగ్గుద్దానం –

అవిజ్జావగ్గో పఠమో, దుతియం విహారం వుచ్చతి;

మిచ్ఛత్తం తతియో వగ్గో, చతుత్థం పటిపన్నేనేవ.

తిత్థియం పఞ్చమో వగ్గో, ఛట్ఠో సూరియేన చ;

బహుకతే సత్తమో వగ్గో, ఉప్పాదో అట్ఠమేన చ.

దివసవగ్గో నవమో, దసమో అప్పమాదేన చ;

ఏకాదసబలవగ్గో, ద్వాదస ఏసనా పాళియం;

ఓఘవగ్గో భవతి తేరసాతి.

మగ్గసంయుత్తం పఠమం.