౫. అప్పమాదపేయ్యాలవగ్గో

౧. తథాగతసుత్తం

౧౩౯. సావత్థినిదానం. ‘‘యావతా, భిక్ఖవే, సత్తా అపదా వా ద్విపదా [దిపదా (సీ.)] వా చతుప్పదా వా బహుప్పదా [బహుపదా (?)] వా రూపినో వా అరూపినో వా సఞ్ఞినో వా అసఞ్ఞినో వా నేవసఞ్ఞీనాసఞ్ఞినో వా, తథాగతో తేసం అగ్గమక్ఖాయతి అరహం సమ్మాసమ్బుద్ధో; ఏవమేవ ఖో, భిక్ఖవే, యే కేచి కుసలా ధమ్మా, సబ్బే తే అప్పమాదమూలకా అప్పమాదసమోసరణా; అప్పమాదో తేసం ధమ్మానం అగ్గమక్ఖాయతి. అప్పమత్తస్సేతం, భిక్ఖవే, భిక్ఖునో పాటికఙ్ఖం – అరియం అట్ఠఙ్గికం మగ్గం భావేస్సతి అరియం అట్ఠఙ్గికం మగ్గం బహులీకరిస్సతి. కథఞ్చ, భిక్ఖవే, భిక్ఖు అప్పమత్తో అరియం అట్ఠఙ్గికం మగ్గం భావేతి అరియం అట్ఠఙ్గికం మగ్గం బహులీకరోతి? ఇధ, భిక్ఖవే, భిక్ఖు సమ్మాదిట్ఠిం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం…పే… సమ్మాసమాధిం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం. ఏవం ఖో, భిక్ఖవే, భిక్ఖు అప్పమత్తో అరియం అట్ఠఙ్గికం మగ్గం భావేతి అరియం అట్ఠఙ్గికం మగ్గం బహులీకరోతీ’’తి.

‘‘యావతా, భిక్ఖవే, సత్తా అపదా వా ద్విపదా వా చతుప్పదా వా బహుప్పదా వా రూపినో వా అరూపినో వా సఞ్ఞినో వా అసఞ్ఞినో వా నేవసఞ్ఞీనాసఞ్ఞినో వా, తథాగతో తేసం అగ్గమక్ఖాయతి అరహం సమ్మాసమ్బుద్ధో; ఏవమేవ ఖో, భిక్ఖవే, యే కేచి కుసలా ధమ్మా, సబ్బే తే అప్పమాదమూలకా అప్పమాదసమోసరణా; అప్పమాదో తేసం ధమ్మానం అగ్గమక్ఖాయతి. అప్పమత్తస్సేతం, భిక్ఖవే, భిక్ఖునో పాటికఙ్ఖం – అరియం అట్ఠఙ్గికం మగ్గం భావేస్సతి, అరియం అట్ఠఙ్గికం మగ్గం బహులీకరిస్సతి. కథఞ్చ, భిక్ఖవే, భిక్ఖు అప్పమత్తో అరియం అట్ఠఙ్గికం మగ్గం భావేతి అరియం అట్ఠఙ్గికం మగ్గం బహులీకరోతి? ఇధ, భిక్ఖవే, భిక్ఖు సమ్మాదిట్ఠిం భావేతి రాగవినయపరియోసానం దోసవినయపరియోసానం మోహవినయపరియోసానం…పే… సమ్మాసమాధిం భావేతి రాగవినయపరియోసానం దోసవినయపరియోసానం మోహవినయపరియోసానం. ఏవం ఖో, భిక్ఖవే, భిక్ఖు అప్పమత్తో అరియం అట్ఠఙ్గికం మగ్గం భావేతి అరియం అట్ఠఙ్గికం మగ్గం బహులీకరోతీ’’తి.

‘‘యావతా, భిక్ఖవే, సత్తా అపదా వా ద్విపదా వా చతుప్పదా వా బహుప్పదా వా రూపినో వా అరూపినో వా సఞ్ఞినో వా అసఞ్ఞినో వా నేవసఞ్ఞీనాసఞ్ఞినో వా, తథాగతో తేసం అగ్గమక్ఖాయతి అరహం సమ్మాసమ్బుద్ధో; ఏవమేవ ఖో, భిక్ఖవే, యే కేచి కుసలా ధమ్మా, సబ్బే తే అప్పమాదమూలకా అప్పమాదసమోసరణా; అప్పమాదో తేసం ధమ్మానం అగ్గమక్ఖాయతి. అప్పమత్తస్సేతం, భిక్ఖవే, భిక్ఖునో పాటికఙ్ఖం – అరియం అట్ఠఙ్గికం మగ్గం భావేస్సతి అరియం అట్ఠఙ్గికం మగ్గం బహులీకరిస్సతి. కథఞ్చ, భిక్ఖవే, భిక్ఖు అప్పమత్తో అరియం అట్ఠఙ్గికం మగ్గం భావేతి అరియం అట్ఠఙ్గికం మగ్గం బహులీకరోతి? ఇధ, భిక్ఖవే, భిక్ఖు సమ్మాదిట్ఠిం భావేతి అమతోగధం అమతపరాయనం అమతపరియోసానం…పే… సమ్మాసమాధిం భావేతి అమతోగధం అమతపరాయనం అమతపరియోసానం. ఏవం ఖో, భిక్ఖవే, భిక్ఖు అప్పమత్తో అరియం అట్ఠఙ్గికం మగ్గం భావేతి అరియం అట్ఠఙ్గికం మగ్గం బహులీకరోతీ’’తి.

‘‘యావతా, భిక్ఖవే, సత్తా అపదా వా ద్విపదా వా చతుప్పదా వా బహుప్పదా వా రూపినో వా అరూపినో వా సఞ్ఞినో వా అసఞ్ఞినో వా నేవసఞ్ఞీనాసఞ్ఞినో వా, తథాగతో తేసం అగ్గమక్ఖాయతి అరహం సమ్మాసమ్బుద్ధో; ఏవమేవ ఖో, భిక్ఖవే, యే కేచి కుసలా ధమ్మా, సబ్బే తే అప్పమాదమూలకా అప్పమాదసమోసరణా; అప్పమాదో తేసం ధమ్మానం అగ్గమక్ఖాయతి. అప్పమత్తస్సేతం, భిక్ఖవే, భిక్ఖునో పాటికఙ్ఖం – అరియం అట్ఠఙ్గికం మగ్గం భావేస్సతి అరియం అట్ఠఙ్గికం మగ్గం బహులీకరిస్సతి. కథఞ్చ, భిక్ఖవే, భిక్ఖు అప్పమత్తో అరియం అట్ఠఙ్గికం మగ్గం భావేతి అరియం అట్ఠఙ్గికం మగ్గం బహులీకరోతి? ఇధ, భిక్ఖవే, భిక్ఖు సమ్మాదిట్ఠిం భావేతి నిబ్బాననిన్నం నిబ్బానపోణం నిబ్బానపబ్భారం…పే… సమ్మాసమాధిం భావేతి నిబ్బాననిన్నం నిబ్బానపోణం నిబ్బానపబ్భారం. ఏవం ఖో, భిక్ఖవే, భిక్ఖు అప్పమత్తో అరియం అట్ఠఙ్గికం మగ్గం భావేతి అరియం అట్ఠఙ్గికం మగ్గం బహులీకరోతీ’’తి. పఠమం.

౨. పదసుత్తం

౧౪౦. ‘‘సేయ్యథాపి, భిక్ఖవే, యాని కానిచి జఙ్గలానం పాణానం పదజాతాని, సబ్బాని తాని హత్థిపదే సమోధానం గచ్ఛన్తి; హత్థిపదం తేసం అగ్గమక్ఖాయతి, యదిదం – మహన్తత్తేన; ఏవమేవ ఖో, భిక్ఖవే, యే కేచి కుసలా ధమ్మా, సబ్బే తే అప్పమాదమూలకా అప్పమాదసమోసరణా; అప్పమాదో తేసం ధమ్మానం అగ్గమక్ఖాయతి. అప్పమత్తస్సేతం, భిక్ఖవే, భిక్ఖునో పాటికఙ్ఖం – అరియం అట్ఠఙ్గికం మగ్గం భావేస్సతి అరియం అట్ఠఙ్గికం మగ్గం బహులీకరిస్సతి. కథఞ్చ, భిక్ఖవే, భిక్ఖు అప్పమత్తో అరియం అట్ఠఙ్గికం మగ్గం భావేతి అరియం అట్ఠఙ్గికం మగ్గం బహులీకరోతి? ఇధ, భిక్ఖవే, భిక్ఖు సమ్మాదిట్ఠిం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం…పే… సమ్మాసమాధిం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం…పే… ఏవం ఖో, భిక్ఖవే, భిక్ఖు అప్పమత్తో అరియం అట్ఠఙ్గికం మగ్గం భావేతి అరియం అట్ఠఙ్గికం మగ్గం బహులీకరోతీ’’తి. దుతియం.

౩-౭. కూటాదిసుత్తపఞ్చకం

౧౪౧. ‘‘సేయ్యథాపి, భిక్ఖవే, కూటాగారస్స యా కాచి గోపానసియో సబ్బా తా కూటఙ్గమా కూటనిన్నా కూటసమోసరణా; కూటం తాసం అగ్గమక్ఖాయతి; ఏవమేవ ఖో, భిక్ఖవే…పే… తతియం.

౧౪౨. ‘‘సేయ్యథాపి, భిక్ఖవే, యే కేచి మూలగన్ధా, కాళానుసారియం తేసం అగ్గమక్ఖాయతి; ఏవమేవ ఖో, భిక్ఖవే…పే… చతుత్థం.

౧౪౩. ‘‘సేయ్యథాపి, భిక్ఖవే, యే కేచి సారగన్ధా, లోహితచన్దనం తేసం అగ్గమక్ఖాయతి; ఏవమేవ ఖో, భిక్ఖవే…పే… పఞ్చమం.

౧౪౪. ‘‘సేయ్యథాపి, భిక్ఖవే, యే కేచి పుప్ఫగన్ధా, వస్సికం తేసం అగ్గమక్ఖాయతి; ఏవమేవ ఖో, భిక్ఖవే…పే… ఛట్ఠం.

౧౪౫. ‘‘సేయ్యథాపి, భిక్ఖవే, యే కేచి కుట్టరాజానో, సబ్బే తే రఞ్ఞో చక్కవత్తిస్స అనుయన్తా భవన్తి, రాజా తేసం చక్కవత్తి అగ్గమక్ఖాయతి; ఏవమేవ ఖో, భిక్ఖవే…పే… సత్తమం.

౮-౧౦. చన్దిమాదిసుత్తతతియకం

౧౪౬. ‘‘సేయ్యథాపి, భిక్ఖవే, యా కాచి తారకరూపానం పభా, సబ్బా తా చన్దిమప్పభాయ [చన్దిమాపభాయ (స్యా. క.)] కలం నాగ్ఘన్తి సోళసిం, చన్దప్పభా తాసం అగ్గమక్ఖాయతి; ఏవమేవ ఖో, భిక్ఖవే…పే… అట్ఠమం.

౧౪౭. ‘‘సేయ్యథాపి, భిక్ఖవే, సరదసమయే విద్ధే విగతవలాహకే దేవే ఆదిచ్చో నభం అబ్భుస్సక్కమానో సబ్బం ఆకాసగతం తమగతం అభివిహచ్చ భాసతే చ తపతే చ విరోచతి చ; ఏవమేవ ఖో, భిక్ఖవే…పే… నవమం.

౧౪౮. ‘‘సేయ్యథాపి, భిక్ఖవే, యాని కానిచి తన్తావుతానం వత్థానం, కాసికవత్థం తేసం అగ్గమక్ఖాయతి; ఏవమేవ ఖో, భిక్ఖవే, యే కేచి కుసలా ధమ్మా, సబ్బే తే అప్పమాదమూలకా అప్పమాదసమోసరణా; అప్పమాదో తేసం ధమ్మానం అగ్గమక్ఖాయతి. అప్పమత్తస్సేతం, భిక్ఖవే, భిక్ఖునో పాటికఙ్ఖం – అరియం అట్ఠఙ్గికం మగ్గం భావేస్సతి అరియం అట్ఠఙ్గికం మగ్గం బహులీకరిస్సతి. కథఞ్చ, భిక్ఖవే, భిక్ఖు అప్పమత్తో అరియం అట్ఠఙ్గికం మగ్గం భావేతి అరియం అట్ఠఙ్గికం మగ్గం బహులీకరోతి? ఇధ, భిక్ఖవే, భిక్ఖు సమ్మాదిట్ఠిం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం…పే… సమ్మాసమాధిం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం…పే… ఏవం ఖో, భిక్ఖవే, భిక్ఖు అప్పమత్తో అరియం అట్ఠఙ్గికం మగ్గం భావేతి అరియం అట్ఠఙ్గికం మగ్గం బహులీకరోతీ’’తి. దసమం.

(యదపి తథాగతం, తదపి విత్థారేతబ్బం).

అప్పమాదపేయ్యాలవగ్గో పఞ్చమో.

తస్సుద్దానం –

తథాగతం పదం కూటం, మూలం సారో చ వస్సికం;

రాజా చన్దిమసూరియా చ, వత్థేన దసమం పదం.