౬. పఠమఅవిజ్జాపహానసుత్తం

౭౯. అథ ఖో అఞ్ఞతరో భిక్ఖు యేన భగవా తేనుపసఙ్కమి…పే… ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘అత్థి ను ఖో, భన్తే, ఏకో ధమ్మో యస్స పహానా భిక్ఖునో అవిజ్జా పహీయతి, విజ్జా ఉప్పజ్జతీ’’తి?

‘‘అత్థి ఖో, భిక్ఖు, ఏకో ధమ్మో యస్స పహానా భిక్ఖునో అవిజ్జా పహీయతి, విజ్జా ఉప్పజ్జతీ’’తి.

‘‘కతమో పన, భన్తే, ఏకో ధమ్మో యస్స పహానా భిక్ఖునో అవిజ్జా పహీయతి, విజ్జా ఉప్పజ్జతీ’’తి?

‘‘అవిజ్జా ఖో, భిక్ఖు, ఏకో ధమ్మో యస్స పహానా భిక్ఖునో అవిజ్జా పహీయతి, విజ్జా ఉప్పజ్జతీ’’తి.

‘‘కథం పన, భన్తే, జానతో, కథం పస్సతో భిక్ఖునో అవిజ్జా పహీయతి, విజ్జా ఉప్పజ్జతీ’’తి?

‘‘చక్ఖుం ఖో, భిక్ఖు, అనిచ్చతో జానతో పస్సతో భిక్ఖునో అవిజ్జా పహీయతి, విజ్జా ఉప్పజ్జతి. రూపే… చక్ఖువిఞ్ఞాణం… చక్ఖుసమ్ఫస్సం… యమ్పిదం, చక్ఖుసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా తమ్పి అనిచ్చతో జానతో పస్సతో భిక్ఖునో అవిజ్జా పహీయతి, విజ్జా ఉప్పజ్జతి…పే… మనం అనిచ్చతో జానతో పస్సతో భిక్ఖునో అవిజ్జా పహీయతి, విజ్జా ఉప్పజ్జతి. ధమ్మే… మనోవిఞ్ఞాణం… మనోసమ్ఫస్సం… యమ్పిదం మనోసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా తమ్పి అనిచ్చతో జానతో పస్సతో భిక్ఖునో అవిజ్జా పహీయతి, విజ్జా ఉప్పజ్జతి. ఏవం ఖో, భిక్ఖు, జానతో ఏవం పస్సతో భిక్ఖునో అవిజ్జా పహీయతి, విజ్జా ఉప్పజ్జతీ’’తి. ఛట్ఠం.