౩. సంయోజనసముగ్ఘాతసుత్తం

౫౫. ‘‘కథం ను ఖో, భన్తే, జానతో, కథం పస్సతో సంయోజనా సముగ్ఘాతం గచ్ఛన్తీ’’తి? ‘‘చక్ఖుం ఖో, భిక్ఖు, అనత్తతో జానతో పస్సతో సంయోజనా సముగ్ఘాతం గచ్ఛన్తి. రూపే అనత్తతో… చక్ఖువిఞ్ఞాణం… చక్ఖుసమ్ఫస్సం… యమ్పిదం చక్ఖుసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా తమ్పి అనత్తతో జానతో పస్సతో సంయోజనా సముగ్ఘాతం గచ్ఛన్తి. సోతం… ఘానం… జివ్హం… కాయం… మనం… ధమ్మే… మనోవిఞ్ఞాణం… మనోసమ్ఫస్సం… యమ్పిదం మనోసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా తమ్పి అనత్తతో జానతో పస్సతో సంయోజనా సముగ్ఘాతం గచ్ఛన్తి. ఏవం ఖో, భిక్ఖు, జానతో ఏవం పస్సతో సంయోజనా సముగ్ఘాతం గచ్ఛన్తీ’’తి. తతియం.