౨. పణీతతరసుత్తం

౩౪౩. సావత్థినిదానం. ‘‘చతస్సో ఇమా, భిక్ఖవే, నాగయోనియో. కతమా చతస్సో? అణ్డజా నాగా, జలాబుజా నాగా, సంసేదజా నాగా, ఓపపాతికా నాగా. తత్ర, భిక్ఖవే, అణ్డజేహి నాగేహి జలాబుజా చ సంసేదజా చ ఓపపాతికా చ నాగా పణీతతరా. తత్ర, భిక్ఖవే, అణ్డజేహి చ జలాబుజేహి చ నాగేహి సంసేదజా చ ఓపపాతికా చ నాగా పణీతతరా. తత్ర, భిక్ఖవే, అణ్డజేహి చ జలాబుజేహి చ సంసేదజేహి చ నాగేహి ఓపపాతికా నాగా పణీతతరా. ఇమా ఖో, భిక్ఖవే, చతస్సో నాగయోనియో’’తి. దుతియం.