౮. నాగసంయుత్తం

౧. సుద్ధికసుత్తం

౩౪౨. సావత్థినిదానం. ‘‘చతస్సో ఇమా, భిక్ఖవే, నాగయోనియో. కతమా చతస్సో? అణ్డజా నాగా, జలాబుజా నాగా, సంసేదజా నాగా, ఓపపాతికా నాగా – ఇమా ఖో, భిక్ఖవే, చతస్సో నాగయోనియో’’తి. పఠమం.

౨. పణీతతరసుత్తం

౩౪౩. సావత్థినిదానం. ‘‘చతస్సో ఇమా, భిక్ఖవే, నాగయోనియో. కతమా చతస్సో? అణ్డజా నాగా, జలాబుజా నాగా, సంసేదజా నాగా, ఓపపాతికా నాగా. తత్ర, భిక్ఖవే, అణ్డజేహి నాగేహి జలాబుజా చ సంసేదజా చ ఓపపాతికా చ నాగా పణీతతరా. తత్ర, భిక్ఖవే, అణ్డజేహి చ జలాబుజేహి చ నాగేహి సంసేదజా చ ఓపపాతికా చ నాగా పణీతతరా. తత్ర, భిక్ఖవే, అణ్డజేహి చ జలాబుజేహి చ సంసేదజేహి చ నాగేహి ఓపపాతికా నాగా పణీతతరా. ఇమా ఖో, భిక్ఖవే, చతస్సో నాగయోనియో’’తి. దుతియం.

౩. ఉపోసథసుత్తం

౩౪౪. ఏకం సమయం భగవా సావత్థియం విహరతి జేతవనే అనాథపిణ్డికస్స ఆరామే. అథ ఖో అఞ్ఞతరో భిక్ఖు యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చే అణ్డజా నాగా ఉపోసథం ఉపవసన్తి వోస్సట్ఠకాయా చ భవన్తీ’’తి?

‘‘ఇధ, భిక్ఖు, ఏకచ్చానం అణ్డజానం నాగానం ఏవం హోతి – ‘మయం ఖో పుబ్బే కాయేన ద్వయకారినో అహుమ్హ, వాచాయ ద్వయకారినో, మనసా ద్వయకారినో. తే మయం కాయేన ద్వయకారినో, వాచాయ ద్వయకారినో, మనసా ద్వయకారినో, కాయస్స భేదా పరం మరణా అణ్డజానం నాగానం సహబ్యతం ఉపపన్నా. సచజ్జ మయం కాయేన సుచరితం చరేయ్యామ, వాచాయ సుచరితం చరేయ్యామ, మనసా సుచరితం చరేయ్యామ, ఏవం మయం కాయస్స భేదా పరం మరణా సుగతిం సగ్గం లోకం ఉపపజ్జేయ్యామ. హన్ద, మయం ఏతరహి కాయేన సుచరితం చరామ, వాచాయ సుచరితం చరామ, మనసా సుచరితం చరామా’తి. అయం ఖో, భిక్ఖు, హేతు, అయం పచ్చయో, యేన మిధేకచ్చే అణ్డజా నాగా ఉపోసథం ఉపవసన్తి వోస్సట్ఠకాయా చ భవన్తీ’’తి. తతియం.

౪. దుతియఉపోసథసుత్తం

౩౪౫. సావత్థినిదానం. అథ ఖో అఞ్ఞతరో భిక్ఖు యేన భగవా…పే… ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చే జలాబుజా నాగా ఉపోసథం ఉపవసన్తి వోస్సట్ఠకాయా చ భవన్తీ’’తి? ‘‘ఇధ, భిక్ఖు…పే… అయం ఖో, భిక్ఖు, హేతు, అయం పచ్చయో, యేన మిధేకచ్చే జలాబుజా నాగా ఉపోసథం ఉపవసన్తి వోస్సట్ఠకాయా చ భవన్తీ’’తి. చతుత్థం.

౫. తతియఉపోసథసుత్తం

౩౪౬. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చే సంసేదజా నాగా ఉపోసథం ఉపవసన్తి వోస్సట్ఠకాయా చ భవన్తీ’’తి? ‘‘ఇధ, భిక్ఖు…పే… అయం ఖో, భిక్ఖు, హేతు, అయం పచ్చయో, యేన మిధేకచ్చే సంసేదజా నాగా ఉపోసథం ఉపవసన్తి వోస్సట్ఠకాయా చ భవన్తీ’’తి. పఞ్చమం.

౬. చతుత్థఉపోసథసుత్తం

౩౪౭. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చే ఓపపాతికా నాగా ఉపోసథం ఉపవసన్తి వోస్సట్ఠకాయా చ భవన్తీ’’తి?

‘‘ఇధ, భిక్ఖు, ఏకచ్చానం ఓపపాతికానం నాగానం ఏవం హోతి – ‘మయం ఖో పుబ్బే కాయేన ద్వయకారినో అహుమ్హ, వాచాయ ద్వయకారినో, మనసా ద్వయకారినో. తే మయం కాయేన ద్వయకారినో, వాచాయ ద్వయకారినో, మనసా ద్వయకారినో, కాయస్స భేదా పరం మరణా ఓపపాతికానం నాగానం సహబ్యతం ఉపపన్నా. సచజ్జ మయం కాయేన సుచరితం చరేయ్యామ, వాచాయ… మనసా సుచరితం చరేయ్యామ, ఏవం మయం కాయస్స భేదా పరం మరణా సుగతిం సగ్గం లోకం ఉపపజ్జేయ్యామ. హన్ద, మయం ఏతరహి కాయేన సుచరితం చరామ, వాచాయ… మనసా సుచరితం చరామా’తి. అయం ఖో, భిక్ఖు, హేతు, అయం పచ్చయో, యేన మిధేకచ్చే ఓపపాతికా నాగా ఉపోసథం ఉపవసన్తి వోస్సట్ఠకాయా చ భవన్తీ’’తి. ఛట్ఠం.

౭. సుతసుత్తం

౩౪౮. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా అణ్డజానం నాగానం సహబ్యతం ఉపపజ్జతీ’’తి?

‘‘ఇధ, భిక్ఖు, ఏకచ్చో కాయేన ద్వయకారీ హోతి, వాచాయ ద్వయకారీ హోతి, మనసా ద్వయకారీ హోతి. తస్స సుతం హోతి – ‘అణ్డజా నాగా దీఘాయుకా వణ్ణవన్తో సుఖబహులా’తి. తస్స ఏవం హోతి – ‘అహో వతాహం కాయస్స భేదా పరం మరణా అణ్డజానం నాగానం సహబ్యతం ఉపపజ్జేయ్య’న్తి. సో కాయస్స భేదా పరం మరణా అణ్డజానం నాగానం సహబ్యతం ఉపపజ్జతి. అయం ఖో, భిక్ఖు, హేతు, అయం పచ్చయో, యేన మిధేకచ్చో కాయస్స భేదా పరం మరణా అణ్డజానం నాగానం సహబ్యతం ఉపపజ్జతీ’’తి. సత్తమం.

౮. దుతియసుతసుత్తం

౩౪౯. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా జలాబుజానం నాగానం సహబ్యతం ఉపపజ్జతీ’’తి?…పే… అయం ఖో, భిక్ఖు, హేతు, అయం పచ్చయో, యేన మిధేకచ్చో కాయస్స భేదా పరం మరణా జలాబుజానం నాగానం సహబ్యతం ఉపపజ్జతీతి. అట్ఠమం.

౯. తతియసుతసుత్తం

౩౫౦. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా సంసేదజానం నాగానం సహబ్యతం ఉపపజ్జతీ’’తి?…పే… అయం ఖో, భిక్ఖు, హేతు, అయం పచ్చయో, యేన మిధేకచ్చో కాయస్స భేదా పరం మరణా సంసేదజానం నాగానం సహబ్యతం ఉపపజ్జతీతి. నవమం.

౧౦. చతుత్థసుతసుత్తం

౩౫౧. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా ఓపపాతికానం నాగానం సహబ్యతం ఉపపజ్జతీ’’తి?

‘‘ఇధ, భిక్ఖు, ఏకచ్చో కాయేన ద్వయకారీ హోతి, వాచాయ ద్వయకారీ, మనసా ద్వయకారీ. తస్స సుతం హోతి – ‘ఓపపాతికా నాగా దీఘాయుకా వణ్ణవన్తో సుఖబహులా’తి. తస్స ఏవం హోతి – ‘అహో వతాహం కాయస్స భేదా పరం మరణా ఓపపాతికానం నాగానం సహబ్యతం ఉపపజ్జేయ్య’న్తి. సో కాయస్స భేదా పరం మరణా ఓపపాతికానం నాగానం సహబ్యతం ఉపపజ్జతి. అయం ఖో, భిక్ఖు, హేతు, అయం పచ్చయో, యేన మిధేకచ్చో కాయస్స భేదా పరం మరణా ఓపపాతికానం నాగానం సహబ్యతం ఉపపజ్జతీ’’తి. దసమం.

౧౧-౨౦. అణ్డజదానూపకారసుత్తదసకం

౩౫౨-౩౬౧. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా అణ్డజానం నాగానం సహబ్యతం ఉపపజ్జతీ’’తి?

‘‘ఇధ, భిక్ఖు, ఏకచ్చో కాయేన ద్వయకారీ హోతి, వాచాయ ద్వయకారీ, మనసా ద్వయకారీ. తస్స సుతం హోతి – ‘అణ్డజా నాగా దీఘాయుకా వణ్ణవన్తో సుఖబహులా’తి. తస్స ఏవం హోతి – ‘అహో వతాహం కాయస్స భేదా పరం మరణా అణ్డజానం నాగానం సహబ్యతం ఉపపజ్జేయ్య’న్తి. సో అన్నం దేతి. సో కాయస్స భేదా పరం మరణా అణ్డజానం నాగానం సహబ్యతం ఉపపజ్జతి. అయం ఖో, భిక్ఖు, హేతు…పే… ఉపపజ్జతీతి…పే… సో పానం దేతి…పే… వత్థం దేతి…పే… యానం దేతి…పే… మాలం దేతి…పే… గన్ధం దేతి…పే… విలేపనం దేతి…పే… సేయ్యం దేతి…పే… ఆవసథం దేతి…పే… పదీపేయ్యం దేతి. సో కాయస్స భేదా పరం మరణా అణ్డజానం నాగానం సహబ్యతం ఉపపజ్జతి. అయం ఖో, భిక్ఖు, హేతు, అయం పచ్చయో, యేన మిధేకచ్చో కాయస్స భేదా పరం మరణా అణ్డజానం నాగానం సహబ్యతం ఉపపజ్జతీ’’తి. వీసతిమం.

౨౧-౫౦. జలాబుజాదిదానూపకారసుత్తత్తింసకం

౩౬౨-౩౯౧. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా జలాబుజానం నాగానం…పే… సంసేదజానం నాగానం…పే… ఓపపాతికానం నాగానం సహబ్యతం ఉపపజ్జతీ’’తి?

‘‘ఇధ, భిక్ఖు, ఏకచ్చో కాయేన ద్వయకారీ హోతి, వాచాయ ద్వయకారీ, మనసా ద్వయకారీ. తస్స సుతం హోతి – ‘ఓపపాతికా నాగా దీఘాయుకా వణ్ణవన్తో సుఖబహులా’తి. తస్స ఏవం హోతి – ‘అహో వతాహం కాయస్స భేదా పరం మరణా ఓపపాతికానం నాగానం సహబ్యతం ఉపపజ్జేయ్య’న్తి. సో అన్నం దేతి…పే… పానం దేతి…పే… పదీపేయ్యం దేతి. సో కాయస్స భేదా పరం మరణా ఓపపాతికానం నాగానం సహబ్యతం ఉపపజ్జతి. అయం ఖో, భిక్ఖు, హేతు, అయం పచ్చయో, యేన మిధేకచ్చో కాయస్స భేదా పరం మరణా ఓపపాతికానం నాగానం సహబ్యతం ఉపపజ్జతీ’’తి.

(ఇమినా పేయ్యాలేన దస దస సుత్తన్తా కాతబ్బా. ఏవం చతూసు యోనీసు చత్తాలీసం వేయ్యాకరణా హోన్తి. పురిమేహి పన దసహి సుత్తన్తేహి సహ హోన్తి పణ్ణాససుత్తన్తాతి.)

నాగసంయుత్తం సమత్తం.