౯. సుపణ్ణసంయుత్తం

౧. సుద్ధికసుత్తం

౩౯౨. సావత్థినిదానం. ‘‘చతస్సో ఇమా, భిక్ఖవే, సుపణ్ణయోనియో. కతమా చతస్సో? అణ్డజా సుపణ్ణా, జలాబుజా సుపణ్ణా, సంసేదజా సుపణ్ణా, ఓపపాతికా సుపణ్ణా – ఇమా ఖో, భిక్ఖవే, చతస్సో సుపణ్ణయోనియో’’తి. పఠమం.

౨. హరన్తిసుత్తం

౩౯౩. సావత్థినిదానం. ‘‘చతస్సో ఇమా, భిక్ఖవే, సుపణ్ణయోనియో. కతమా చతస్సో? అణ్డజా…పే… ఇమా ఖో, భిక్ఖవే, చతస్సో సుపణ్ణయోనియో. తత్ర, భిక్ఖవే, అణ్డజా సుపణ్ణా అణ్డజేవ నాగే హరన్తి, న జలాబుజే, న సంసేదజే, న ఓపపాతికే. తత్ర, భిక్ఖవే, జలాబుజా సుపణ్ణా అణ్డజే చ జలాబుజే చ నాగే హరన్తి, న సంసేదజే, న ఓపపాతికే. తత్ర, భిక్ఖవే, సంసేదజా సుపణ్ణా అణ్డజే చ జలాబుజే చ సంసేదజే చ నాగే హరన్తి, న ఓపపాతికే. తత్ర, భిక్ఖవే, ఓపపాతికా సుపణ్ణా అణ్డజే చ జలాబుజే చ సంసేదజే చ ఓపపాతికే చ నాగే హరన్తి. ఇమా ఖో, భిక్ఖవే, చతస్సో సుపణ్ణయోనియో’’తి. దుతియం.

౩. ద్వయకారీసుత్తం

౩౯౪. సావత్థినిదానం. అఞ్ఞతరో భిక్ఖు యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా అణ్డజానం సుపణ్ణానం సహబ్యతం ఉపపజ్జతీ’’తి? ‘‘ఇధ, భిక్ఖు, ఏకచ్చో కాయేన ద్వయకారీ హోతి, వాచాయ ద్వయకారీ, మనసా ద్వయకారీ. తస్స సుతం హోతి – ‘అణ్డజా సుపణ్ణా దీఘాయుకా వణ్ణవన్తో సుఖబహులా’తి. తస్స ఏవం హోతి – ‘అహో వతాహం కాయస్స భేదా పరం మరణా అణ్డజానం సుపణ్ణానం సహబ్యతం ఉపపజ్జేయ్య’న్తి. సో కాయస్స భేదా పరం మరణా అణ్డజానం సుపణ్ణానం సహబ్యతం ఉపపజ్జతి. అయం ఖో, భిక్ఖు, హేతు, అయం పచ్చయో, యేన మిధేకచ్చో కాయస్స భేదా పరం మరణా అణ్డజానం సుపణ్ణానం సహబ్యతం ఉపపజ్జతీ’’తి. తతియం.

౪-౬. దుతియాదిద్వయకారీసుత్తత్తికం

౩౯౫-౩౯౭. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా జలాబుజానం సుపణ్ణానం…పే… సంసేదజానం సుపణ్ణానం…పే… ఓపపాతికానం సుపణ్ణానం సహబ్యతం ఉపపజ్జతీ’’తి? ‘‘ఇధ, భిక్ఖు, ఏకచ్చో కాయేన ద్వయకారీ హోతి, వాచాయ ద్వయకారీ, మనసా ద్వయకారీ. తస్స సుతం హోతి – ‘ఓపపాతికా సుపణ్ణా దీఘాయుకా వణ్ణవన్తో సుఖబహులా’తి. తస్స ఏవం హోతి – ‘అహో వతాహం కాయస్స భేదా పరం మరణా ఓపపాతికానం సుపణ్ణానం సహబ్యతం ఉపపజ్జేయ్య’న్తి. సో కాయస్స భేదా పరం మరణా ఓపపాతికానం సుపణ్ణానం సహబ్యతం ఉపపజ్జతి. అయం ఖో, భిక్ఖు, హేతు, అయం పచ్చయో, యేన మిధేకచ్చో కాయస్స భేదా పరం మరణా ఓపపాతికానం సుపణ్ణానం సహబ్యతం ఉపపజ్జతీ’’తి. ఛట్ఠం.

౭-౧౬. అణ్డజదానూపకారసుత్తదసకం

౩౯౮-౪౦౭. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా అణ్డజానం సుపణ్ణానం సహబ్యతం ఉపపజ్జతీ’’తి? ‘‘ఇధ, భిక్ఖు, ఏకచ్చో కాయేన ద్వయకారీ హోతి, వాచాయ ద్వయకారీ, మనసా ద్వయకారీ. తస్స సుతం హోతి – ‘అణ్డజా సుపణ్ణా దీఘాయుకా వణ్ణవన్తో సుఖబహులా’తి. తస్స ఏవం హోతి – ‘అహో వతాహం కాయస్స భేదా పరం మరణా అణ్డజానం సుపణ్ణానం సహబ్యతం ఉపపజ్జేయ్య’న్తి. సో అన్నం దేతి…పే… పానం దేతి… వత్థం దేతి… యానం దేతి… మాలం దేతి… గన్ధం దేతి… విలేపనం దేతి… సేయ్యం దేతి… ఆవసథం దేతి… పదీపేయ్యం దేతి. సో కాయస్స భేదా పరం మరణా అణ్డజానం సుపణ్ణానం సహబ్యతం ఉపపజ్జతి. అయం ఖో, భిక్ఖు, హేతు, అయం పచ్చయో, యేన మిధేకచ్చో కాయస్స భేదా పరం మరణా అణ్డజానం సుపణ్ణానం సహబ్యతం ఉపపజ్జతీ’’తి. సోళసమం.

౧౭-౪౬. జలాబుజాదిదానూపకారసుత్తతింసకం

౪౦౮-౪౩౭. సావత్థినిదానం. ఏకమన్తం నిసిన్నో ఖో సో భిక్ఖు భగవన్తం ఏతదవోచ – ‘‘కో ను ఖో, భన్తే, హేతు, కో పచ్చయో, యేన మిధేకచ్చో కాయస్స భేదా పరం మరణా జలాబుజానం సుపణ్ణానం…పే… సంసేదజానం సుపణ్ణానం…పే… ఓపపాతికానం సుపణ్ణానం సహబ్యతం ఉపపజ్జతీ’’తి? ‘‘ఇధ, భిక్ఖు, ఏకచ్చో కాయేన ద్వయకారీ హోతి, వాచాయ ద్వయకారీ, మనసా ద్వయకారీ. తస్స సుతం హోతి – ‘ఓపపాతికా సుపణ్ణా దీఘాయుకా వణ్ణవన్తో సుఖబహులా’తి. తస్స ఏవం హోతి – ‘అహో వతాహం కాయస్స భేదా పరం మరణా ఓపపాతికానం సుపణ్ణానం సహబ్యతం ఉపపజ్జేయ్య’న్తి. సో అన్నం దేతి…పే… పానం దేతి…పే… పదీపేయ్యం దేతి. సో కాయస్స భేదా పరం మరణా ఓపపాతికానం సుపణ్ణానం సహబ్యతం ఉపపజ్జతి. అయం ఖో, భిక్ఖు, హేతు, అయం పచ్చయో, యేన మిధేకచ్చో కాయస్స భేదా పరం మరణా ఓపపాతికానం సుపణ్ణానం సహబ్యతం ఉపపజ్జతీ’’తి. ఛచత్తాలీసమం.

(ఏవం పిణ్డకేన ఛచత్తాలీసం సుత్తన్తా హోన్తి.)

సుపణ్ణసంయుత్తం సమత్తం.