౩. పీతిసుత్తం

౩౩౪. సావత్థినిదానం. అద్దసా ఖో ఆయస్మా ఆనన్దో…పే… ‘‘విప్పసన్నాని ఖో తే, ఆవుసో సారిపుత్త, ఇన్ద్రియాని; పరిసుద్ధో ముఖవణ్ణో పరియోదాతో. కతమేనాయస్మా సారిపుత్తో అజ్జ విహారేన విహాసీ’’తి?

‘‘ఇధాహం, ఆవుసో, పీతియా చ విరాగా ఉపేక్ఖకో చ విహాసిం సతో చ సమ్పజానో సుఖఞ్చ కాయేన పటిసంవేదేమి; యం తం అరియా ఆచిక్ఖన్తి ‘ఉపేక్ఖకో సతిమా సుఖవిహారీ’తి తతియం ఝానం ఉపసమ్పజ్జ విహరామి. తస్స మయ్హం, ఆవుసో, న ఏవం హోతి – ‘అహం తతియం ఝానం సమాపజ్జామీ’తి వా ‘అహం తతియం ఝానం సమాపన్నో’తి వా ‘అహం తతియా ఝానా వుట్ఠితో’తి వా’’తి. ‘‘తథా హి పనాయస్మతో సారిపుత్తస్స దీఘరత్తం అహఙ్కారమమఙ్కారమానానుసయా సుసమూహతా. తస్మా ఆయస్మతో సారిపుత్తస్స న ఏవం హోతి – ‘అహం తతియం ఝానం సమాపజ్జామీ’తి వా ‘అహం తతియం ఝానం సమాపన్నో’తి వా ‘అహం తతియా ఝానా వుట్ఠితో’తి వా’’తి. తతియం.