౪. ఉపేక్ఖాసుత్తం

౩౩౫. సావత్థినిదానం. అద్దసా ఖో ఆయస్మా ఆనన్దో…పే… ‘‘విప్పసన్నాని ఖో తే, ఆవుసో సారిపుత్త, ఇన్ద్రియాని; పరిసుద్ధో ముఖవణ్ణో పరియోదాతో. కతమేనాయస్మా సారిపుత్తో అజ్జ విహారేన విహాసీ’’తి?

‘‘ఇధాహం, ఆవుసో, సుఖస్స చ పహానా దుక్ఖస్స చ పహానా పుబ్బేవ సోమనస్సదోమనస్సానం అత్థఙ్గమా అదుక్ఖమసుఖం ఉపేక్ఖాసతిపారిసుద్ధిం చతుత్థం ఝానం ఉపసమ్పజ్జ విహరామి. తస్స మయ్హం, ఆవుసో, న ఏవం హోతి – ‘అహం చతుత్థం ఝానం సమాపజ్జామీ’తి వా ‘అహం చతుత్థం ఝానం సమాపన్నో’తి వా ‘అహం చతుత్థా ఝానా వుట్ఠితో’తి వా’’తి. ‘‘తథా హి పనాయస్మతో సారిపుత్తస్స దీఘరత్తం అహఙ్కారమమఙ్కారమానానుసయా సుసమూహతా. తస్మా ఆయస్మతో సారిపుత్తస్స న ఏవం హోతి – ‘అహం చతుత్థం ఝానం సమాపజ్జామీ’తి వా ‘అహం చతుత్థం ఝానం సమాపన్నో’తి వా ‘అహం చతుత్థా ఝానా వుట్ఠితో’తి వా’’తి. చతుత్థం.