౪. దుతియఅనిచ్చసుత్తం

౪౬. సావత్థినిదానం. ‘‘రూపం, భిక్ఖవే, అనిచ్చం. యదనిచ్చం తం దుక్ఖం; యం దుక్ఖం తదనత్తా; యదనత్తా తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం. వేదనా అనిచ్చా… సఞ్ఞా అనిచ్చా… సఙ్ఖారా అనిచ్చా… విఞ్ఞాణం అనిచ్చం. యదనిచ్చం తం దుక్ఖం; యం దుక్ఖం తదనత్తా; యదనత్తా తం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దట్ఠబ్బం’’.

‘‘ఏవమేతం యథాభూతం సమ్మప్పఞ్ఞాయ పస్సతో పుబ్బన్తానుదిట్ఠియో న హోన్తి. పుబ్బన్తానుదిట్ఠీనం అసతి, అపరన్తానుదిట్ఠియో న హోన్తి. అపరన్తానుదిట్ఠీనం అసతి, థామసో [థామసా (సీ. స్యా. కం.)] పరామాసో న హోతి. థామసే [థామసా (సీ. స్యా. కం.), థామసో (క.)] పరామాసే అసతి రూపస్మిం… వేదనాయ … సఞ్ఞాయ… సఙ్ఖారేసు… విఞ్ఞాణస్మిం చిత్తం విరజ్జతి విముచ్చతి అనుపాదాయ ఆసవేహి. విముత్తత్తా ఠితం. ఠితత్తా సన్తుసితం. సన్తుసితత్తా న పరితస్సతి. అపరితస్సం పచ్చత్తఞ్ఞేవ పరినిబ్బాయతి. ‘ఖీణా జాతి, వుసితం బ్రహ్మచరియం, కతం కరణీయం, నాపరం ఇత్థత్తాయా’తి పజానాతీ’’తి. చతుత్థం.