౧౩. దుతియకప్పసుత్తం

౧౨౫. సావత్థినిదానం. ఏకమన్తం నిసిన్నో ఖో ఆయస్మా కప్పో భగవన్తం ఏతదవోచ – ‘‘కథం ను ఖో, భన్తే, జానతో కథం పస్సతో ఇమస్మిఞ్చ సవిఞ్ఞాణకే కాయే బహిద్ధా చ సబ్బనిమిత్తేసు అహఙ్కారమమఙ్కారమానాపగతం మానసం హోతి విధా సమతిక్కన్తం సన్తం సువిముత్త’’న్తి?

‘‘యం కిఞ్చి, కప్ప, రూపం అతీతానాగతపచ్చుప్పన్నం…పే… సబ్బం రూపం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దిస్వా అనుపాదావిముత్తో హోతి. యా కాచి వేదనా… యా కాచి సఞ్ఞా… యే కేచి సఙ్ఖారా… యం కిఞ్చి విఞ్ఞాణం అతీతానాగతపచ్చుప్పన్నం అజ్ఝత్తం వా బహిద్ధా వా ఓళారికం వా సుఖుమం వా హీనం వా పణీతం వా యం దూరే సన్తికే వా, సబ్బం విఞ్ఞాణం ‘నేతం మమ, నేసోహమస్మి, న మేసో అత్తా’తి ఏవమేతం యథాభూతం సమ్మప్పఞ్ఞాయ దిస్వా అనుపాదావిముత్తో హోతి. ఏవం ఖో, కప్ప, జానతో ఏవం పస్సతో ఇమస్మిఞ్చ సవిఞ్ఞాణకే కాయే బహిద్ధా చ సబ్బనిమిత్తేసు అహఙ్కారమమఙ్కారమానాపగతం మానసం హోతి విధా సమతిక్కన్తం సన్తం సువిముత్త’’న్తి. తేరసమం.

ధమ్మకథికవగ్గో ద్వాదసమో.

తస్సుద్దానం –

అవిజ్జా విజ్జా ద్వే కథికా, బన్ధనా పరిపుచ్ఛితా దువే;

సంయోజనం ఉపాదానం, సీలం సుతవా ద్వే చ కప్పేనాతి.