౧౦. దుతియపబ్బతసుత్తం

౮౩. సావత్థియం విహరతి…పే… ‘‘సేయ్యథాపి, భిక్ఖవే, హిమవా పబ్బతరాజా పరిక్ఖయం పరియాదానం గచ్ఛేయ్య, ఠపేత్వా సత్త సాసపమత్తియో పాసాణసక్ఖరా. తం కిం మఞ్ఞథ, భిక్ఖవే, కతమం ను ఖో బహుతరం, యం వా హిమవతో పబ్బతరాజస్స పరిక్ఖీణం పరియాదిణ్ణం యా వా సత్త సాసపమత్తియో పాసాణసక్ఖరా అవసిట్ఠా’’తి?

‘‘ఏతదేవ, భన్తే, బహుతరం హిమవతో పబ్బతరాజస్స యదిదం పరిక్ఖీణం పరియాదిణ్ణం; అప్పమత్తికా సత్త సాసపమత్తియో పాసాణసక్ఖరా అవసిట్ఠా. నేవ సతిమం కలం ఉపేన్తి న సహస్సిమం కలం ఉపేన్తి న సతసహస్సిమం కలం ఉపేన్తి హిమవతో పబ్బతరాజస్స పరిక్ఖీణం పరియాదిణ్ణం ఉపనిధాయ సత్త సాసపమత్తియో పాసాణసక్ఖరా అవసిట్ఠా’’తి.

‘‘ఏవమేవ ఖో, భిక్ఖవే, అరియసావకస్స దిట్ఠిసమ్పన్నస్స పుగ్గలస్స అభిసమేతావినో ఏతదేవ బహుతరం దుక్ఖం యదిదం పరిక్ఖీణం పరియాదిణ్ణం; అప్పమత్తకం అవసిట్ఠం. నేవ సతిమం కలం ఉపేతి న సహస్సిమం కలం ఉపేతి న సతసహస్సిమం కలం ఉపేతి పురిమం దుక్ఖక్ఖన్ధం పరిక్ఖీణం పరియాదిణ్ణం ఉపనిధాయ యదిదం సత్తక్ఖత్తుంపరమతా. ఏవం మహత్థియో ఖో, భిక్ఖవే, ధమ్మాభిసమయో, ఏవం మహత్థియో ధమ్మచక్ఖుపటిలాభో’’తి. దసమం.