౧౧. తతియపబ్బతసుత్తం

౮౪. సావత్థియం విహరతి…పే… ‘‘సేయ్యథాపి, భిక్ఖవే, పురిసో సినేరుస్స పబ్బతరాజస్స సత్త ముగ్గమత్తియో పాసాణసక్ఖరా ఉపనిక్ఖిపేయ్య. తం కిం మఞ్ఞథ, భిక్ఖవే, కతమం ను ఖో బహుతరం, యా వా సత్త ముగ్గమత్తియో పాసాణసక్ఖరా ఉపనిక్ఖిత్తా యో వా సినేరు [ఉపనిక్ఖిత్తా, సినేరు వా (సీ.)] పబ్బతరాజా’’తి?

‘‘ఏతదేవ, భన్తే, బహుతరం యదిదం సినేరు పబ్బతరాజా; అప్పమత్తికా సత్త ముగ్గమత్తియో పాసాణసక్ఖరా ఉపనిక్ఖిత్తా. నేవ సతిమం కలం ఉపేన్తి న సహస్సిమం కలం ఉపేన్తి న సతసహస్సిమం కలం ఉపేన్తి సినేరుం పబ్బతరాజానం ఉపనిధాయ సత్త ముగ్గమత్తియో పాసాణసక్ఖరా ఉపనిక్ఖిత్తా’’తి. ‘‘ఏవమేవ ఖో, భిక్ఖవే, అరియసావకస్స దిట్ఠిసమ్పన్నస్స పుగ్గలస్స అధిగమం ఉపనిధాయ అఞ్ఞతిత్థియసమణబ్రాహ్మణపరిబ్బాజకానం అధిగమో నేవ సతిమం కలం ఉపేతి న సహస్సిమం కలం ఉపేతి న సతసహస్సిమం కలం ఉపేతి. ఏవం మహాధిగమో, భిక్ఖవే, దిట్ఠిసమ్పన్నో పుగ్గలో, ఏవం మహాభిఞ్ఞో’’తి. ఏకాదసమం.

అభిసమయసంయుత్తం సమత్తం.