౩. కస్సపగోత్తసుత్తం

౨౨౩. ఏకం సమయం ఆయస్మా కస్సపగోత్తో కోసలేసు విహరతి అఞ్ఞతరస్మిం వనసణ్డే. తేన ఖో పన సమయేన ఆయస్మా కస్సపగోత్తో దివావిహారగతో అఞ్ఞతరం ఛేతం ఓవదతి. అథ ఖో యా తస్మిం వనసణ్డే అధివత్థా దేవతా ఆయస్మన్తం కస్సపగోత్తం సంవేజేతుకామా యేనాయస్మా కస్సపగోత్తో తేనుపసఙ్కమి; ఉపసఙ్కమిత్వా ఆయస్మన్తం కస్సపగోత్తం గాథాహి అజ్ఝభాసి –

‘‘గిరిదుగ్గచరం ఛేతం, అప్పపఞ్ఞం అచేతసం;

అకాలే ఓవదం భిక్ఖు, మన్దోవ పటిభాతి మం.

‘‘సుణాతి న విజానాతి, ఆలోకేతి న పస్సతి;

ధమ్మస్మిం భఞ్ఞమానస్మిం, అత్థం బాలో న బుజ్ఝతి.

‘‘సచేపి దస పజ్జోతే, ధారయిస్ససి కస్సప;

నేవ దక్ఖతి రూపాని, చక్ఖు హిస్స న విజ్జతీ’’తి.

అథ ఖో ఆయస్మా కస్సపగోత్తో తాయ దేవతాయ సంవేజితో సంవేగమాపాదీతి.