౮. పరోసహస్ససుత్తం

౨౧౬. ఏకం సమయం భగవా సావత్థియం విహరతి జేతవనే అనాథపిణ్డికస్స ఆరామే మహతా భిక్ఖుసఙ్ఘేన సద్ధిం అడ్ఢతేలసేహి భిక్ఖుసతేహి. తేన ఖో పన సమయేన భగవా భిక్ఖూ నిబ్బానపటిసంయుత్తాయ ధమ్మియా కథాయ సన్దస్సేతి సమాదపేతి సముత్తేజేతి సమ్పహంసేతి. తే చ భిక్ఖూ అట్ఠిం కత్వా మనసి కత్వా సబ్బచేతసా సమన్నాహరిత్వా ఓహితసోతా ధమ్మం సుణన్తి. అథ ఖో ఆయస్మతో వఙ్గీసస్స ఏతదహోసి – ‘‘అయం ఖో భగవా భిక్ఖూ నిబ్బానపటిసంయుత్తాయ ధమ్మియా కథాయ సన్దస్సేతి సమాదపేతి సముత్తేజేతి సమ్పహంసేతి. తే చ భిక్ఖూ అట్ఠిం కత్వా మనసి కత్వా సబ్బచేతసా సమన్నాహరిత్వా ఓహితసోతా ధమ్మం సుణన్తి. యంనూనాహం భగవన్తం సమ్ముఖా సారుప్పాహి గాథాహి అభిత్థవేయ్య’’న్తి.

అథ ఖో ఆయస్మా వఙ్గీసో ఉట్ఠాయాసనా ఏకంసం ఉత్తరాసఙ్గం కరిత్వా యేన భగవా తేనఞ్జలిం పణామేత్వా భగవన్తం ఏతదవోచ – ‘‘పటిభాతి మం భగవా, పటిభాతి మం సుగతా’’తి. ‘‘పటిభాతు తం, వఙ్గీసా’’తి భగవా అవోచ. అథ ఖో ఆయస్మా వఙ్గీసో భగవన్తం సమ్ముఖా సారుప్పాహి గాథాహి అభిత్థవి –

‘‘పరోసహస్సం భిక్ఖూనం, సుగతం పయిరుపాసతి;

దేసేన్తం విరజం ధమ్మం, నిబ్బానం అకుతోభయం.

‘‘సుణన్తి ధమ్మం విమలం, సమ్మాసమ్బుద్ధదేసితం;

సోభతి వత సమ్బుద్ధో, భిక్ఖుసఙ్ఘపురక్ఖతో.

‘‘నాగనామోసి భగవా, ఇసీనం ఇసిసత్తమో;

మహామేఘోవ హుత్వాన, సావకే అభివస్సతి.

‘‘దివావిహారా నిక్ఖమ్మ, సత్థుదస్సనకమ్యతా [సత్థుదస్సనకామతా (సీ. స్యా. కం.)];

సావకో తే మహావీర, పాదే వన్దతి వఙ్గీసో’’తి.

‘‘కిం ను తే, వఙ్గీస, ఇమా గాథాయో పుబ్బే పరివితక్కితా, ఉదాహు ఠానసోవ తం పటిభన్తీ’’తి? ‘న ఖో మే, భన్తే, ఇమా గాథాయో పుబ్బే పరివితక్కితా, అథ ఖో ఠానసోవ మం పటిభన్తీ’తి. ‘తేన హి తం, వఙ్గీస, భియ్యోసోమత్తాయ పుబ్బే అపరివితక్కితా గాథాయో పటిభన్తూ’తి. ‘ఏవం, భన్తే’తి ఖో ఆయస్మా వఙ్గీసో భగవతో పటిస్సుత్వా భియ్యోసోమత్తాయ భగవన్తం పుబ్బే అపరివితక్కితాహి గాథాహి అభిత్థవి –

‘‘ఉమ్మగ్గపథం [ఉమ్మగ్గసతం (స్యా. కం. క.)] మారస్స అభిభుయ్య, చరతి పభిజ్జ ఖిలాని;

తం పస్సథ బన్ధపముఞ్చకరం, అసితం భాగసో పవిభజం.

‘‘ఓఘస్స నిత్థరణత్థం, అనేకవిహితం మగ్గం అక్ఖాసి;

తస్మిఞ్చే అమతే అక్ఖాతే, ధమ్మద్దసా ఠితా అసంహీరా.

‘‘పజ్జోతకరో అతివిజ్ఝ [అతివిజ్ఝ ధమ్మం (సీ. స్యా. కం.)], సబ్బట్ఠితీనం అతిక్కమమద్దస;

ఞత్వా చ సచ్ఛికత్వా చ, అగ్గం సో దేసయి దసద్ధానం.

‘‘ఏవం సుదేసితే ధమ్మే,

కో పమాదో విజానతం ధమ్మం [కో పమాదో విజానతం (సీ. స్యా. కం.)];

తస్మా హి తస్స భగవతో సాసనే;

అప్పమత్తో సదా నమస్సమనుసిక్ఖే’’తి.