౭. పవారణాసుత్తం

౨౧౫. ఏకం సమయం భగవా సావత్థియం విహరతి పుబ్బారామే మిగారమాతుపాసాదే మహతా భిక్ఖుసఙ్ఘేన సద్ధిం పఞ్చమత్తేహి భిక్ఖుసతేహి సబ్బేహేవ అరహన్తేహి. తేన ఖో పన సమయేన భగవా తదహుపోసథే పన్నరసే పవారణాయ భిక్ఖుసఙ్ఘపరివుతో అబ్భోకాసే నిసిన్నో హోతి. అథ ఖో భగవా తుణ్హీభూతం భిక్ఖుసఙ్ఘం అనువిలోకేత్వా భిక్ఖూ ఆమన్తేసి – ‘‘హన్ద దాని, భిక్ఖవే, పవారేమి వో. న చ మే కిఞ్చి గరహథ కాయికం వా వాచసికం వా’’తి.

ఏవం వుత్తే, ఆయస్మా సారిపుత్తో ఉట్ఠాయాసనా ఏకంసం ఉత్తరాసఙ్గం కరిత్వా యేన భగవా తేనఞ్జలిం పణామేత్వా భగవన్తం ఏతదవోచ – ‘‘న ఖో మయం, భన్తే, భగవతో కిఞ్చి గరహామ కాయికం వా వాచసికం వా. భగవా హి, భన్తే, అనుప్పన్నస్స మగ్గస్స ఉప్పాదేతా, అసఞ్జాతస్స మగ్గస్స సఞ్జనేతా, అనక్ఖాతస్స మగ్గస్స అక్ఖాతా, మగ్గఞ్ఞూ మగ్గవిదూ మగ్గకోవిదో. మగ్గానుగా చ, భన్తే, ఏతరహి సావకా విహరన్తి పచ్ఛా సమన్నాగతా; అహఞ్చ ఖో, భన్తే, భగవన్తం పవారేమి. న చ మే భగవా కిఞ్చి గరహతి కాయికం వా వాచసికం వా’’తి.

‘‘న ఖ్వాహం తే, సారిపుత్త, కిఞ్చి గరహామి కాయికం వా వాచసికం వా. పణ్డితో త్వం, సారిపుత్త, మహాపఞ్ఞో త్వం, సారిపుత్త, పుథుపఞ్ఞో త్వం, సారిపుత్త, హాసపఞ్ఞో త్వం, సారిపుత్త, జవనపఞ్ఞో త్వం, సారిపుత్త, తిక్ఖపఞ్ఞో త్వం, సారిపుత్త, నిబ్బేధికపఞ్ఞో త్వం, సారిపుత్త. సేయ్యథాపి, సారిపుత్త, రఞ్ఞో చక్కవత్తిస్స జేట్ఠపుత్తో పితరా పవత్తితం చక్కం సమ్మదేవ అనుప్పవత్తేతి; ఏవమేవ ఖో త్వం, సారిపుత్త, మయా అనుత్తరం ధమ్మచక్కం పవత్తితం సమ్మదేవ అనుప్పవత్తేసీ’’తి.

‘‘నో చే కిర మే, భన్తే, భగవా కిఞ్చి గరహతి కాయికం వా వాచసికం వా. ఇమేసం పన, భన్తే, భగవా పఞ్చన్నం భిక్ఖుసతానం న కిఞ్చి గరహతి కాయికం వా వాచసికం వా’’తి. ‘‘ఇమేసమ్పి ఖ్వాహం, సారిపుత్త, పఞ్చన్నం భిక్ఖుసతానం న కిఞ్చి గరహామి కాయికం వా వాచసికం వా. ఇమేసఞ్హి, సారిపుత్త, పఞ్చన్నం భిక్ఖుసతానం సట్ఠి భిక్ఖూ తేవిజ్జా, సట్ఠి భిక్ఖూ ఛళభిఞ్ఞా, సట్ఠి భిక్ఖూ ఉభతోభాగవిముత్తా, అథ ఇతరే పఞ్ఞావిముత్తా’’తి.

అథ ఖో ఆయస్మా వఙ్గీసో ఉట్ఠాయాసనా ఏకంసం ఉత్తరాసఙ్గం కరిత్వా యేన భగవా తేనఞ్జలిం పణామేత్వా భగవన్తం ఏతదవోచ – ‘‘పటిభాతి మం భగవా, పటిభాతి మం సుగతా’’తి. ‘‘పటిభాతు తం, వఙ్గీసా’’తి భగవా అవోచ. అథ ఖో ఆయస్మా వఙ్గీసో భగవన్తం సమ్ముఖా సారుప్పాహి గాథాహి అభిత్థవి –

‘‘అజ్జ పన్నరసే విసుద్ధియా, భిక్ఖూ పఞ్చసతా సమాగతా;

సంయోజనబన్ధనచ్ఛిదా, అనీఘా ఖీణపునబ్భవా ఇసీ.

‘‘చక్కవత్తీ యథా రాజా, అమచ్చపరివారితో;

సమన్తా అనుపరియేతి, సాగరన్తం మహిం ఇమం.

‘‘ఏవం విజితసఙ్గామం, సత్థవాహం అనుత్తరం;

సావకా పయిరుపాసన్తి, తేవిజ్జా మచ్చుహాయినో.

‘‘సబ్బే భగవతో పుత్తా, పలాపేత్థ న విజ్జతి;

తణ్హాసల్లస్స హన్తారం, వన్దే ఆదిచ్చబన్ధున’’న్తి.