౫. అహింసకసుత్తం

౧౯౧. సావత్థినిదానం. అథ ఖో అహింసకభారద్వాజో బ్రాహ్మణో యేన భగవా తేనుపసఙ్కమి; ఉపసఙ్కమిత్వా భగవతా సద్ధిం సమ్మోది. సమ్మోదనీయం కథం సారణీయం వీతిసారేత్వా ఏకమన్తం నిసీది. ఏకమన్తం నిసిన్నో ఖో అహింసకభారద్వాజో బ్రాహ్మణో భగవన్తం ఏతదవోచ – ‘‘అహింసకాహం, భో గోతమ, అహింసకాహం, భో గోతమా’’తి.

‘‘యథా నామం తథా చస్స, సియా ఖో త్వం అహింసకో;

యో చ కాయేన వాచాయ, మనసా చ న హింసతి;

స వే అహింసకో హోతి, యో పరం న విహింసతీ’’తి.

ఏవం వుత్తే, అహింసకభారద్వాజో బ్రాహ్మణో భగవన్తం ఏతదవోచ – ‘‘అభిక్కన్తం, భో గోతమ…పే… అబ్భఞ్ఞాసి. అఞ్ఞతరో చ పనాయస్మా అహింసకభారద్వాజో అరహతం అహోసీ’’తి.