౮. సీసుపచాలాసుత్తం

౧౬౯. సావత్థినిదానం. అథ ఖో సీసుపచాలా [సీసూపచాలా (సీ.)] భిక్ఖునీ పుబ్బణ్హసమయం నివాసేత్వా …పే… అఞ్ఞతరస్మిం రుక్ఖమూలే దివావిహారం నిసీది. అథ ఖో మారో పాపిమా యేన సీసుపచాలా భిక్ఖునీ తేనుపసఙ్కమి; ఉపసఙ్కమిత్వా సీసుపచాలం భిక్ఖునిం ఏతదవోచ – ‘‘కస్స ను త్వం, భిక్ఖుని, పాసణ్డం రోచేసీ’’తి? ‘‘న ఖ్వాహం, ఆవుసో, కస్సచి పాసణ్డం రోచేమీ’’తి.

‘‘కం ను ఉద్దిస్స ముణ్డాసి, సమణీ వియ దిస్ససి;

న చ రోచేసి పాసణ్డం, కిమివ చరసి మోమూహా’’తి.

‘‘ఇతో బహిద్ధా పాసణ్డా, దిట్ఠీసు పసీదన్తి తే;

న తేసం ధమ్మం రోచేమి, తే ధమ్మస్స అకోవిదా.

‘‘అత్థి సక్యకులే జాతో, బుద్ధో అప్పటిపుగ్గలో;

సబ్బాభిభూ మారనుదో, సబ్బత్థమపరాజితో.

‘‘సబ్బత్థ ముత్తో అసితో, సబ్బం పస్సతి చక్ఖుమా;

సబ్బకమ్మక్ఖయం పత్తో, విముత్తో ఉపధిసఙ్ఖయే;

సో మయ్హం భగవా సత్థా, తస్స రోచేమి సాసన’’న్తి.

అథ ఖో మారో పాపిమా ‘‘జానాతి మం సీసుపచాలా భిక్ఖునీ’’తి దుక్ఖీ దుమ్మనో తత్థేవన్తరధాయీతి.