౬. మల్లికాసుత్తం

౧౨౭. సావత్థినిదానం. అథ ఖో రాజా పసేనది కోసలో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. అథ ఖో అఞ్ఞతరో పురిసో యేన రాజా పసేనది కోసలో తేనుపసఙ్కమి; ఉపసఙ్కమిత్వా రఞ్ఞో పసేనదిస్స కోసలస్స ఉపకణ్ణకే ఆరోచేసి – ‘‘మల్లికా, దేవ, దేవీ ధీతరం విజాతా’’తి. ఏవం వుత్తే, రాజా పసేనది కోసలో అనత్తమనో అహోసి.

అథ ఖో భగవా రాజానం పసేనదిం కోసలం అనత్తమనతం విదిత్వా తాయం వేలాయం ఇమా గాథాయో అభాసి –

‘‘ఇత్థీపి హి ఏకచ్చియా, సేయ్యా పోస జనాధిప;

మేధావినీ సీలవతీ, సస్సుదేవా పతిబ్బతా.

‘‘తస్సా యో జాయతి పోసో, సూరో హోతి దిసమ్పతి;

తాదిసా సుభగియా [సుభరియాపుత్తో (క.)] పుత్తో, రజ్జమ్పి అనుసాసతీ’’తి.