౯. సత్థారవన్దనాసుత్తం

౨౬౫. సావత్థియం జేతవనే. ‘‘భూతపుబ్బం, భిక్ఖవే, సక్కో దేవానమిన్దో మాతలిం సఙ్గాహకం ఆమన్తేసి – ‘యోజేహి, సమ్మ మాతలి, సహస్సయుత్తం ఆజఞ్ఞరథం, ఉయ్యానభూమిం గచ్ఛామ సుభూమిం దస్సనాయా’తి. ‘ఏవం భద్దన్తవా’తి ఖో, భిక్ఖవే, మాతలి సఙ్గాహకో సక్కస్స దేవానమిన్దస్స పటిస్సుత్వా సహస్సయుత్తం ఆజఞ్ఞరథం యోజేత్వా సక్కస్స దేవానమిన్దస్స పటివేదేసి – ‘యుత్తో ఖో తే, మారిస, సహస్సయుత్తో ఆజఞ్ఞరథో. యస్స దాని కాలం మఞ్ఞసీ’’’తి. అథ ఖో, భిక్ఖవే, సక్కో దేవానమిన్దో వేజయన్తపాసాదా ఓరోహన్తో అఞ్జలిం కత్వా సుదం భగవన్తం నమస్సతి. అథ ఖో, భిక్ఖవే, మాతలి సఙ్గాహకో సక్కం దేవానమిన్దం గాథాయ అజ్ఝభాసి –

‘‘యఞ్హి దేవా మనుస్సా చ, తం నమస్సన్తి వాసవ;

అథ కో నామ సో యక్ఖో, యం త్వం సక్క నమస్ససీ’’తి.

‘‘యో ఇధ సమ్మాసమ్బుద్ధో, అస్మిం లోకే సదేవకే;

అనోమనామం సత్థారం, తం నమస్సామి మాతలి.

‘‘యేసం రాగో చ దోసో చ, అవిజ్జా చ విరాజితా;

ఖీణాసవా అరహన్తో, తే నమస్సామి మాతలి.

‘‘యే రాగదోసవినయా, అవిజ్జాసమతిక్కమా;

సేక్ఖా అపచయారామా, అప్పమత్తానుసిక్ఖరే;

తే నమస్సామి మాతలీ’’తి.

‘‘సేట్ఠా హి కిర లోకస్మిం, యే త్వం సక్క నమస్ససి;

అహమ్పి తే నమస్సామి, యే నమస్ససి వాసవా’’తి.

‘‘ఇదం వత్వాన మఘవా, దేవరాజా సుజమ్పతి;

భగవన్తం నమస్సిత్వా, పముఖో రథమారుహీ’’తి.