౭. కణ్డకవిమానవత్థు

౧౧౭౧. ‘‘పుణ్ణమాసే యథా చన్దో, నక్ఖత్తపరివారితో;

సమన్తా అనుపరియాతి, తారకాధిపతీ ససీ.

౧౧౭౨. ‘‘తథూపమం ఇదం బ్యమ్హం, దిబ్బం దేవపురమ్హి చ;

అతిరోచతి వణ్ణేన, ఉదయన్తోవ రంసిమా.

౧౧౭౩. ‘‘వేళురియసువణ్ణస్స, ఫలికా రూపియస్స చ;

మసారగల్లముత్తాహి, లోహితఙ్గమణీహి చ.

౧౧౭౪. ‘‘చిత్రా మనోరమా భూమి, వేళూరియస్స సన్థతా;

కూటాగారా సుభా రమ్మా, పాసాదో తే సుమాపితో.

౧౧౭౫. ‘‘రమ్మా చ తే పోక్ఖరణీ, పుథులోమనిసేవితా;

అచ్ఛోదకా విప్పసన్నా, సోవణ్ణవాలుకసన్థతా.

౧౧౭౬. ‘‘నానాపదుమసఞ్ఛన్నా, పుణ్డరీకసమోతతా [సమోత్థతా (క.), సమోగతా (స్యా.)];

సురభిం సమ్పవాయన్తి, మనుఞ్ఞా మాలుతేరితా.

౧౧౭౭. ‘‘తస్సా తే ఉభతో పస్సే, వనగుమ్బా సుమాపితా;

ఉపేతా పుప్ఫరుక్ఖేహి, ఫలరుక్ఖేహి చూభయం.

౧౧౭౮. ‘‘సోవణ్ణపాదే పల్లఙ్కే, ముదుకే గోణకత్థతే [చోలసన్థతే (సీ.)];

నిసిన్నం దేవరాజంవ, ఉపతిట్ఠన్తి అచ్ఛరా.

౧౧౭౯. ‘‘సబ్బాభరణసఞ్ఛన్నా, నానామాలావిభూసితా;

రమేన్తి తం మహిద్ధికం, వసవత్తీవ మోదసి.

౧౧౮౦. ‘‘భేరిసఙ్ఖముదిఙ్గాహి, వీణాహి పణవేహి చ;

రమసి రతిసమ్పన్నో, నచ్చగీతే సువాదితే.

౧౧౮౧. ‘‘దిబ్బా తే వివిధా రూపా, దిబ్బా సద్దా అథో రసా;

గన్ధా చ తే అధిప్పేతా, ఫోట్ఠబ్బా చ మనోరమా.

౧౧౮౨. ‘‘తస్మిం విమానే పవరే, దేవపుత్త మహప్పభో;

అతిరోచసి వణ్ణేన, ఉదయన్తోవ భాణుమా.

౧౧౮౩. ‘‘దానస్స తే ఇదం ఫలం, అథో సీలస్స వా పన;

అథో అఞ్జలికమ్మస్స, తం మే అక్ఖాహి పుచ్ఛితో’’.

౧౧౮౪. సో దేవపుత్తో అత్తమనో…పే… యస్స కమ్మస్సిదం ఫలం.

౧౧౮౫. ‘‘అహం కపిలవత్థుస్మిం, సాకియానం పురుత్తమే;

సుద్ధోదనస్స పుత్తస్స, కణ్డకో సహజో అహం.

౧౧౮౬. ‘‘యదా సో అడ్ఢరత్తాయం, బోధాయ మభినిక్ఖమి;

సో మం ముదూహి పాణీహి, జాలి [జాల (సీ.)] తమ్బనఖేహి చ.

౧౧౮౭. ‘‘సత్థిం ఆకోటయిత్వాన, వహ సమ్మాతి చబ్రవి;

అహం లోకం తారయిస్సం, పత్తో సమ్బోధిముత్తమం.

౧౧౮౮. ‘‘తం మే గిరం సుణన్తస్స, హాసో మే విపులో అహు;

ఉదగ్గచిత్తో సుమనో, అభిసీసిం [అభిసింసిం (సీ.), అభిసీసి (పీ.)] తదా అహం.

౧౧౮౯. ‘‘అభిరూళ్హఞ్చ మం ఞత్వా, సక్యపుత్తం మహాయసం;

ఉదగ్గచిత్తో ముదితో, వహిస్సం పురిసుత్తమం.

౧౧౯౦. ‘‘పరేసం విజితం గన్త్వా, ఉగ్గతస్మిం దివాకరే [దివఙ్కరే (స్యా. క.)];

మమం ఛన్నఞ్చ ఓహాయ, అనపేక్ఖో సో అపక్కమి.

౧౧౯౧. ‘‘తస్స తమ్బనఖే పాదే, జివ్హాయ పరిలేహిసం;

గచ్ఛన్తఞ్చ మహావీరం, రుదమానో ఉదిక్ఖిసం.

౧౧౯౨. ‘‘అదస్సనేనహం తస్స, సక్యపుత్తస్స సిరీమతో;

అలత్థం గరుకాబాధం, ఖిప్పం మే మరణం అహు.

౧౧౯౩. ‘‘తస్సేవ ఆనుభావేన, విమానం ఆవసామిదం;

సబ్బకామగుణోపేతం, దిబ్బం దేవపురమ్హి చ.

౧౧౯౪. ‘‘యఞ్చ మే అహువా హాసో, సద్దం సుత్వాన బోధియా;

తేనేవ కుసలమూలేన, ఫుసిస్సం ఆసవక్ఖయం.

౧౧౯౫. ‘‘సచే హి భన్తే గచ్ఛేయ్యాసి, సత్థు బుద్ధస్స సన్తికే;

మమాపి నం వచనేన, సిరసా వజ్జాసి వన్దనం.

౧౧౯౬. ‘‘అహమ్పి దట్ఠుం గచ్ఛిస్సం, జినం అప్పటిపుగ్గలం;

దుల్లభం దస్సనం హోతి, లోకనాథాన తాదిన’’న్తి.

౧౧౯౭. సో కతఞ్ఞూ కతవేదీ, సత్థారం ఉపసఙ్కమి;

సుత్వా గిరం చక్ఖుమతో, ధమ్మచక్ఖుం విసోధయి.

౧౧౯౮. విసోధేత్వా దిట్ఠిగతం, విచికిచ్ఛం వతాని చ;

వన్దిత్వా సత్థునో పాదే, తత్థేవన్తరధాయథాతి [తత్థేవన్తరధాయతీతి (క.)].

కణ్డకవిమానం సత్తమం.