౮. అనేకవణ్ణవిమానవత్థు

౧౧౯౯. ‘‘అనేకవణ్ణం దరసోకనాసనం, విమానమారుయ్హ అనేకచిత్తం;

పరివారితో అచ్ఛరాసఙ్గణేన, సునిమ్మితో భూతపతీవ మోదసి.

౧౨౦౦. ‘‘సమస్సమో నత్థి కుతో పనుత్తరో [ఉత్తరి (క.)], యసేన పుఞ్ఞేన చ ఇద్ధియా చ;

సబ్బే చ దేవా తిదసగణా సమేచ్చ, తం తం నమస్సన్తి ససింవ దేవా;

ఇమా చ తే అచ్ఛరాయో సమన్తతో, నచ్చన్తి గాయన్తి పమోదయన్తి.

౧౨౦౧. ‘‘దేవిద్ధిపత్తోసి మహానుభావో, మనుస్సభూతో కిమకాసి పుఞ్ఞం;

కేనాసి ఏవం జలితానుభావో, వణ్ణో చ తే సబ్బదిసా పభాసతీ’’తి.

౧౨౦౨. సో దేవపుత్తో అత్తమనో…పే… యస్స కమ్మస్సిదం ఫలం.

౧౨౦౩. ‘‘అహం భదన్తే అహువాసి పుబ్బే, సుమేధనామస్స జినస్స సావకో;

పుథుజ్జనో అననుబోధోహమస్మి [అనవబోధోహమస్మిం (సీ.), అననుబోధోహమాసిం (?)], సో సత్త వస్సాని పరిబ్బజిస్సహం [పబ్బజిస్సహం (స్యా. క.), పబ్బజిసాహం (పీ.)].

౧౨౦౪. ‘‘సోహం సుమేధస్స జినస్స సత్థునో, పరినిబ్బుతస్సోఘతిణ్ణస్స తాదినో;

రతనుచ్చయం హేమజాలేన ఛన్నం, వన్దిత్వా థూపస్మిం మనం పసాదయిం.

౧౨౦౫. ‘‘న మాసి దానం న చ మత్థి దాతుం, పరే చ ఖో తత్థ సమాదపేసిం;

పూజేథ నం పూజనీయస్స [పూజనేయ్యస్స (స్యా. క.)] ధాతుం, ఏవం కిర సగ్గమితో గమిస్సథ.

౧౨౦౬. ‘‘తదేవ కమ్మం కుసలం కతం మయా, సుఖఞ్చ దిబ్బం అనుభోమి అత్తనా;

మోదామహం తిదసగణస్స మజ్ఝే, న తస్స పుఞ్ఞస్స ఖయమ్పి అజ్ఝగ’’న్తి.

అనేకవణ్ణవిమానం అట్ఠమం.