౪. సువణ్ణవిమానవత్థు

౧౧౩౪. ‘‘సోవణ్ణమయే పబ్బతస్మిం, విమానం సబ్బతోపభం;

హేమజాలపటిచ్ఛన్నం [హేమజాలకపచ్ఛన్నం (సీ.)], కిఙ్కిణి [కిఙ్కణిక (స్యా. క.), కిఙ్కిణిక (పీ.)] జాలకప్పితం.

౧౧౩౫. ‘‘అట్ఠంసా సుకతా థమ్భా, సబ్బే వేళురియామయా;

ఏకమేకాయ అంసియా, రతనా సత్త నిమ్మితా.

౧౧౩౬. ‘‘వేళురియసువణ్ణస్స, ఫలికా రూపియస్స చ;

మసారగల్లముత్తాహి, లోహితఙ్గమణీహి చ.

౧౧౩౭. ‘‘చిత్రా మనోరమా భూమి, న తత్థుద్ధంసతీ రజో;

గోపాణసీగణా పీతా, కూటం ధారేన్తి నిమ్మితా.

౧౧౩౮. ‘‘సోపాణాని చ చత్తారి, నిమ్మితా చతురో దిసా;

నానారతనగబ్భేహి, ఆదిచ్చోవ విరోచతి.

౧౧౩౯. ‘‘వేదియా చతస్సో తత్థ, విభత్తా భాగసో మితా;

దద్దల్లమానా ఆభన్తి, సమన్తా చతురో దిసా.

౧౧౪౦. ‘‘తస్మిం విమానే పవరే, దేవపుత్తో మహప్పభో;

అతిరోచసి వణ్ణేన, ఉదయన్తోవ భాణుమా.

౧౧౪౧. ‘‘దానస్స తే ఇదం ఫలం, అథో సీలస్స వా పన;

అథో అఞ్జలికమ్మస్స, తం మే అక్ఖాహి పుచ్ఛితో’’.

౧౧౪౨. సో దేవపుత్తో అత్తమనో…పే… యస్స కమ్మస్సిదం ఫలం.

౧౧౪౩. ‘‘అహం అన్ధకవిన్దస్మిం, బుద్ధస్సాదిచ్చబన్ధునో;

విహారం సత్థు కారేసిం, పసన్నో సేహి పాణిభి.

౧౧౪౪. ‘‘తత్థ గన్ధఞ్చ మాలఞ్చ, పచ్చయఞ్చ [పచ్చగ్గఞ్చ (సీ.), పచ్చగ్ఘఞ్చ (?)] విలేపనం;

విహారం సత్థు అదాసిం, విప్పసన్నేన చేతసా;

తేన మయ్హం ఇదం లద్ధం, వసం వత్తేమి నన్దనే.

౧౧౪౫. ‘‘నన్దనే చ వనే [నన్దనే పవనే (సీ. స్యా.)] రమ్మే, నానాదిజగణాయుతే;

రమామి నచ్చగీతేహి, అచ్ఛరాహి పురక్ఖతో’’తి.

సువణ్ణవిమానం చతుత్థం.