౩. మణిథూణవిమానవత్థు

౧౧౨౬. ‘‘ఉచ్చమిదం మణిథూణం విమానం, సమన్తతో ద్వాదస యోజనాని;

కూటాగారా సత్తసతా ఉళారా, వేళురియథమ్భా రుచకత్థతా సుభా.

౧౧౨౭. ‘‘తత్థచ్ఛసి పివసి ఖాదసి చ, దిబ్బా చ వీణా పవదన్తి వగ్గుం;

దిబ్బా రసా కామగుణేత్థ పఞ్చ, నారియో చ నచ్చన్తి సువణ్ణఛన్నా.

౧౧౨౮. ‘‘కేన తేతాదిసో వణ్ణో…పే…వణ్ణో చ తే సబ్బదిసా పభాసతీ’’తి.

౧౧౩౦. సో దేవపుత్తో అత్తమనో…పే…యస్స కమ్మస్సిదం ఫలం.

౧౧౩౧. ‘‘అహం మనుస్సేసు మనుస్సభూతో, వివనే పథే సఙ్కమనం [చఙ్కమనం (సీ.), చఙ్కమం (స్యా.), సమకం (క. సీ.)] అకాసిం;

ఆరామరుక్ఖాని చ రోపయిస్సం, పియా చ మే సీలవన్తో అహేసుం;

అన్నఞ్చ పానఞ్చ పసన్నచిత్తో, సక్కచ్చ దానం విపులం అదాసిం.

౧౧౩౨. ‘‘తేన మేతాదిసో వణ్ణో…పే… వణ్ణో చ మే సబ్బదిసా పభాసతీ’’తి.

మణిథూణవిమానం తతియం.