౨. నన్దనవిమానవత్థు

౧౧౨౦. ‘‘యథా వనం నన్దనం [నన్దనం చిత్తలతం (సీ. స్యా. క.), నన్దవనం (క.)] పభాసతి, ఉయ్యానసేట్ఠం తిదసానముత్తమం;

తథూపమం తుయ్హమిదం విమానం, ఓభాసయం తిట్ఠతి అన్తలిక్ఖే.

౧౧౨౧. ‘‘దేవిద్ధిపత్తోసి మహానుభావో, మనుస్సభూతో కిమకాసి పుఞ్ఞం;

కేనాసి ఏవం జలితానుభావో, వణ్ణో చ తే సబ్బదిసా పభాసతీ’’తి.

౧౧౨౨. సో దేవపుత్తో అత్తమనో…పే… యస్స కమ్మస్సిదం ఫలం.

౧౧౨౩. ‘‘అహం మనుస్సేసు మనుస్సభూతో, దలిద్దో అతాణో కపణో కమ్మకరో అహోసిం;

జిణ్ణే చ మాతాపితరో అభారిం, పియా చ మే సీలవన్తో అహేసుం;

అన్నఞ్చ పానఞ్చ పసన్నచిత్తో, సక్కచ్చ దానం విపులం అదాసిం.

౧౧౨౪. ‘‘తేన మేతాదిసో వణ్ణో…పే… వణ్ణో చ మే సబ్బదిసా పభాసతీ’’తి.

నన్దనవిమానం దుతియం.