౧౧. సునిక్ఖిత్తవిమానవత్థు

౧౨౮౨. ‘‘ఉచ్చమిదం మణిథూణం విమానం, సమన్తతో ద్వాదస యోజనాని;

కూటాగారా సత్తసతా ఉళారా, వేళురియథమ్భా రుచకత్థతా సుభా.

౧౨౮౩. ‘‘తత్థచ్ఛసి పివసి ఖాదసి చ, దిబ్బా చ వీణా పవదన్తి వగ్గుం;

దిబ్బా రసా కామగుణేత్థ పఞ్చ, నారియో చ నచ్చన్తి సువణ్ణఛన్నా.

౧౨౮౪. ‘‘కేన తేతాదిసో వణ్ణో, కేన తే ఇధ మిజ్ఝతి;

ఉప్పజ్జన్తి చ తే భోగా, యే కేచి మనసో పియా.

౧౨౮౫. ‘‘పుచ్ఛామి ‘తం దేవ మహానుభావ, మనుస్సభూతో కిమకాసి పుఞ్ఞం;

కేనాసి ఏవం జలితానుభావో, వణ్ణో చ తే సబ్బదిసా పభాసతీ’’తి.

౧౨౮౬. సో దేవపుత్తో అత్తమనో, మోగ్గల్లానేన పుచ్ఛితో;

పఞ్హం పుట్ఠో వియాకాసి, యస్స కమ్మస్సిదం ఫలం.

౧౨౮౭. ‘‘దున్నిక్ఖిత్తం మాలం సునిక్ఖిపిత్వా, పతిట్ఠపేత్వా సుగతస్స థూపే;

మహిద్ధికో చమ్హి మహానుభావో, దిబ్బేహి కామేహి సమఙ్గిభూతో.

౧౨౮౮. ‘‘తేన మేతాదిసో వణ్ణో,

తేన మే ఇధ మిజ్ఝతి;

ఉప్పజ్జన్తి చ మే భోగా,

యే కేచి మనసో పియా.

౧౨౮౯. ‘‘అక్ఖామి తే భిక్ఖు మహానుభావ,

మనుస్సభూతో యమహం అకాసిం;

తేనమ్హి ఏవం జలితానుభావో,

వణ్ణో చ మే సబ్బదిసా పభాసతీ’’తి.

సునిక్ఖిత్తవిమానం ఏకాదసమం.

సునిక్ఖిత్తవగ్గో సత్తమో నిట్ఠితో.

తస్సుద్దానం –

ద్వే దలిద్దా వనవిహారా, భతకో గోపాలకణ్డకా;

అనేకవణ్ణమట్ఠకుణ్డలీ, సేరీసకో సునిక్ఖిత్తం;

పురిసానం తతియో వగ్గో పవుచ్చతీతి.

భాణవారం చతుత్థం నిట్ఠితం.