౧౦. సేరీసకవిమానవత్థు

౧౨౨౮. [పే. వ. ౬౦౪] సుణోథ యక్ఖస్స చ వాణిజాన చ, సమాగమో యత్థ తదా అహోసి;

యథా కథం ఇతరితరేన చాపి, సుభాసితం తఞ్చ సుణాథ సబ్బే.

౧౨౨౯. ‘‘యో సో అహు రాజా పాయాసి నామ [నామో (సీ.)], భుమ్మానం సహబ్యగతో యసస్సీ;

సో మోదమానోవ సకే విమానే, అమానుసో మానుసే అజ్ఝభాసీతి.

౧౨౩౦. ‘‘వఙ్కే అరఞ్ఞే అమనుస్సట్ఠానే, కన్తారే అప్పోదకే అప్పభక్ఖే;

సుదుగ్గమే వణ్ణుపథస్స మజ్ఝే, వఙ్కం భయా [ధఙ్కంభయా (క.)] నట్ఠమనా మనుస్సా.

౧౨౩౧. ‘‘నయిధ ఫలా మూలమయా చ సన్తి, ఉపాదానం నత్థి కుతోధ భక్ఖో;

అఞ్ఞత్ర పంసూహి చ వాలుకాహి చ, తతాహి ఉణ్హాహి చ దారుణాహి చ.

౧౨౩౨. ‘‘ఉజ్జఙ్గలం తత్తమివం కపాలం, అనాయసం పరలోకేన తుల్యం;

లుద్దానమావాసమిదం పురాణం, భూమిప్పదేసో అభిసత్తరూపో.

౧౨౩౩. ‘‘అథ తుమ్హే కేన [కేన ను (స్యా. క.)] వణ్ణేన, కిమాసమానా ఇమం పదేసం హి;

అనుపవిట్ఠా సహసా సమేచ్చ, లోభా భయా అథ వా సమ్పమూళ్హా’’తి.

౧౨౩౪. ‘‘మగధేసు అఙ్గేసు చ సత్థవాహా, ఆరోపయిత్వా పణియం పుథుత్తం;

తే యామసే సిన్ధుసోవీరభూమిం, ధనత్థికా ఉద్దయం పత్థయానా.

౧౨౩౫. ‘‘దివా పిపాసం నధివాసయన్తా, యోగ్గానుకమ్పఞ్చ సమేక్ఖమానా,

ఏతేన వేగేన ఆయామ సబ్బే [సబ్బే తే (క.)], రత్తిం మగ్గం పటిపన్నా వికాలే.

౧౨౩౬. ‘‘తే దుప్పయాతా అపరద్ధమగ్గా, అన్ధాకులా విప్పనట్ఠా అరఞ్ఞే;

సుదుగ్గమే వణ్ణుపథస్స మజ్ఝే, దిసం న జానామ పమూళ్హచిత్తా.

౧౨౩౭. ‘‘ఇదఞ్చ దిస్వాన అదిట్ఠపుబ్బం, విమానసేట్ఠఞ్చ తవఞ్చ యక్ఖ;

తతుత్తరిం జీవితమాసమానా, దిస్వా పతీతా సుమనా ఉదగ్గా’’తి.

౧౨౩౮. ‘‘పారం సముద్దస్స ఇమఞ్చ వణ్ణుం [వనం (స్యా.), వణ్ణం (క.)], వేత్తాచరం [వేత్తం పరం (స్యా.), వేత్తాచారం (క.)] సఙ్కుపథఞ్చ మగ్గం;

నదియో పన పబ్బతానఞ్చ దుగ్గా, పుథుద్దిసా గచ్ఛథ భోగహేతు.

౧౨౩౯. ‘‘పక్ఖన్దియాన విజితం పరేసం, వేరజ్జకే మానుసే పేక్ఖమానా;

యం వో సుతం వా అథ వాపి దిట్ఠం, అచ్ఛేరకం తం వో సుణోమ తాతా’’తి.

౧౨౪౦. ‘‘ఇతోపి అచ్ఛేరతరం కుమార, న తో సుతం వా అథ వాపి దిట్ఠం;

అతీతమానుస్సకమేవ సబ్బం, దిస్వాన తప్పామ అనోమవణ్ణం.

౧౨౪౧. ‘‘వేహాయసం పోక్ఖరఞ్ఞో సవన్తి, పహూతమల్యా [పహూతమాల్యా (స్యా.)] బహుపుణ్డరీకా;

దుమా చిమే [దుమా చ తే (స్యా. క.)] నిచ్చఫలూపపన్నా, అతీవ గన్ధా సురభిం పవాయన్తి.

౧౨౪౨. ‘‘వేళూరియథమ్భా సతముస్సితాసే, సిలాపవాళస్స చ ఆయతంసా;

మసారగల్లా సహలోహితఙ్గా, థమ్భా ఇమే జోతిరసామయాసే.

౧౨౪౩. ‘‘సహస్సథమ్భం అతులానుభావం, తేసూపరి సాధుమిదం విమానం;

రతనన్తరం కఞ్చనవేదిమిస్సం, తపనీయపట్టేహి చ సాధుఛన్నం.

౧౨౪౪. ‘‘జమ్బోనదుత్తత్తమిదం సుమట్ఠో, పాసాదసోపాణఫలూపపన్నో;

దళ్హో చ వగ్గు చ సుసఙ్గతో చ [వగ్గు సుముఖో సుసఙ్గతో (సీ.)], అతీవ నిజ్ఝానఖమో మనుఞ్ఞో.

౧౨౪౫. ‘‘రతనన్తరస్మిం బహుఅన్నపానం, పరివారితో అచ్ఛరాసఙ్గణేన;

మురజఆలమ్బరతూరియఘుట్ఠో, అభివన్దితోసి థుతివన్దనాయ.

౧౨౪౬. ‘‘సో మోదసి నారిగణప్పబోధనో, విమానపాసాదవరే మనోరమే;

అచిన్తియో సబ్బగుణూపపన్నో, రాజా యథా వేస్సవణో నళిన్యా [నళిఞ్ఞం (క.)].

౧౨౪౭. ‘‘దేవో ను ఆసి ఉదవాసి యక్ఖో, ఉదాహు దేవిన్దో మనుస్సభూతో;

పుచ్ఛన్తి తం వాణిజా సత్థవాహా, ఆచిక్ఖ కో నామ తువంసి యక్ఖో’’తి.

౧౨౪౮. ‘‘సేరీసకో [సేరిస్సకో (సీ. స్యా.)] నామ అహమ్హి యక్ఖో, కన్తారియో వణ్ణుపథమ్హి గుత్తో;

ఇమం పదేసం అభిపాలయామి, వచనకరో వేస్సవణస్స రఞ్ఞో’’తి.

౧౨౪౯. ‘‘అధిచ్చలద్ధం పరిణామజం తే, సయం కతం ఉదాహు దేవేహి దిన్నం;

పుచ్ఛన్తి తం వాణిజా సత్థవాహా, కథం తయా లద్ధమిదం మనుఞ్ఞ’’న్తి.

౧౨౫౦. ‘‘నాధిచ్చలద్ధం న పరిణామజం మే, న సయం కతం న హి దేవేహి దిన్నం;

సకేహి కమ్మేహి అపాపకేహి, పుఞ్ఞేహి మే లద్ధమిదం మనుఞ్ఞ’’న్తి.

౧౨౫౧. ‘‘కిం తే వతం కిం పన బ్రహ్మచరియం, కిస్స సుచిణ్ణస్స అయం విపాకో;

పుచ్ఛన్తి తం వాణిజా సత్థవాహా, కథం తయా లద్ధమిదం విమాన’’న్తి.

౧౨౫౨. ‘‘మమం పాయాసీతి అహు సమఞ్ఞా, రజ్జం యదా కారయిం కోసలానం;

నత్థికదిట్ఠి కదరియో పాపధమ్మో, ఉచ్ఛేదవాదీ చ తదా అహోసిం.

౧౨౫౩. ‘‘సమణో చ ఖో ఆసి కుమారకస్సపో, బహుస్సుతో చిత్తకథీ ఉళారో;

సో మే తదా ధమ్మకథం అభాసి [అకాసి (సీ.)], దిట్ఠివిసూకాని వినోదయీ మే.

౧౨౫౪. ‘‘తాహం తస్స [తాహం (క.)] ధమ్మకథం సుణిత్వా, ఉపాసకత్తం పటివేదయిస్సం;

పాణాతిపాతా విరతో అహోసిం, లోకే అదిన్నం పరివజ్జయిస్సం;

అమజ్జపో నో చ ముసా అభాణిం, సకేన దారేన చ అహోసి తుట్ఠో.

౧౨౫౫. ‘‘తం మే వతం తం పన బ్రహ్మచరియం, తస్స సుచిణ్ణస్స అయం విపాకో;

తేహేవ కమ్మేహి అపాపకేహి, పుఞ్ఞేహి మే లద్ధమిదం విమాన’’న్తి.

౧౨౫౬. ‘‘సచ్చం కిరాహంసు నరా సపఞ్ఞా, అనఞ్ఞథా వచనం పణ్డితానం;

యహిం యహిం గచ్ఛతి పుఞ్ఞకమ్మో, తహిం తహిం మోదతి కామకామీ.

౧౨౫౭. ‘‘యహిం యహిం సోకపరిద్దవో చ, వధో చ బన్ధో చ పరిక్కిలేసో;

తహిం తహిం గచ్ఛతి పాపకమ్మో, న ముచ్చతి దుగ్గతియా కదాచీ’’తి.

౧౨౫౮. ‘‘సమ్మూళ్హరూపోవ జనో అహోసి, అస్మిం ముహుత్తే కలలీకతోవ;

జనస్సిమస్స తుయ్హఞ్చ కుమార, అప్పచ్చయో కేన ను ఖో అహోసీ’’తి.

౧౨౫౯. ‘‘ఇమే చ సిరీసవనా [ఇమే సిరీసూపవనా చ (సీ.), ఇమేపి సిరీసవనా చ (పీ. క.)] తాతా, దిబ్బా [దిబ్బా చ (పీ. క.)] గన్ధా సురభీ [సురభిం (సీ. క.)] సమ్పవన్తి [సమ్పవాయన్తి (క.)];

తే సమ్పవాయన్తి ఇమం విమానం, దివా చ రత్తో చ తమం నిహన్త్వా.

౧౨౬౦. ‘‘ఇమేసఞ్చ ఖో వస్ససతచ్చయేన, సిపాటికా ఫలతి ఏకమేకా;

మానుస్సకం వస్ససతం అతీతం, యదగ్గే కాయమ్హి ఇధూపపన్నో.

౧౨౬౧. ‘‘దిస్వానహం వస్ససతాని పఞ్చ, అస్మిం విమానే ఠత్వాన తాతా;

ఆయుక్ఖయా పుఞ్ఞక్ఖయా చవిస్సం, తేనేవ సోకేన పముచ్ఛితోస్మీ’’తి [సముచ్ఛితోస్మీతి (పీ. క.)].

౧౨౬౨. ‘‘కథం ను సోచేయ్య తథావిధో సో, లద్ధా విమానం అతులం చిరాయ;

యే చాపి ఖో ఇత్తరముపపన్నా, తే నూన సోచేయ్యుం పరిత్తపుఞ్ఞా’’తి.

౧౨౬౩. ‘‘అనుచ్ఛవిం ఓవదియఞ్చ మే తం, యం మం తుమ్హే పేయ్యవాచం వదేథ;

తుమ్హే చ ఖో తాతా మయానుగుత్తా, యేనిచ్ఛకం తేన పలేథ సోత్థి’’న్తి.

౧౨౬౪. ‘‘గన్త్వా మయం సిన్ధుసోవీరభూమిం, ధనత్థికా ఉద్దయం పత్థయానా;

యథాపయోగా పరిపుణ్ణచాగా, కాహామ సేరీసమహం ఉళార’’న్తి.

౧౨౬౫. ‘‘మా చేవ సేరీసమహం అకత్థ, సబ్బఞ్చ వో భవిస్సతి యం వదేథ;

పాపాని కమ్మాని వివజ్జయాథ, ధమ్మానుయోగఞ్చ అధిట్ఠహాథ.

౧౨౬౬. ‘‘ఉపాసకో అత్థి ఇమమ్హి సఙ్ఘే, బహుస్సుతో సీలవతూపపన్నో;

సద్ధో చ చాగీ చ సుపేసలో చ, విచక్ఖణో సన్తుసితో ముతీమా.

౧౨౬౭. ‘‘సఞ్జానమానో న ముసా భణేయ్య, పరూపఘాతాయ న చేతయేయ్య;

వేభూతికం పేసుణం నో కరేయ్య, సణ్హఞ్చ వాచం సఖిలం భణేయ్య.

౧౨౬౮. ‘‘సగారవో సప్పటిస్సో వినీతో, అపాపకో అధిసీలే విసుద్ధో;

సో మాతరం పితరఞ్చాపి జన్తు, ధమ్మేన పోసేతి అరియవుత్తి.

౧౨౬౯. ‘‘మఞ్ఞే సో మాతాపితూనం కారణా, భోగాని పరియేసతి న అత్తహేతు;

మాతాపితూనఞ్చ యో [సో (?)] అచ్చయేన, నేక్ఖమ్మపోణో చరిస్సతి బ్రహ్మచరియం.

౧౨౭౦. ‘‘ఉజూ అవఙ్కో అసఠో అమాయో, న లేసకప్పేన చ వోహరేయ్య;

సో తాదిసో సుకతకమ్మకారీ, ధమ్మే ఠితో కిన్తి లభేథ దుక్ఖం.

౧౨౭౧. ‘‘తం కారణా పాతుకతోమ్హి అత్తనా, తస్మా ధమ్మం పస్సథ వాణిజాసే;

అఞ్ఞత్ర తేనిహ భస్మీ [భస్మి (స్యా.), భస్మ (క.)] భవేథ, అన్ధాకులా విప్పనట్ఠా అరఞ్ఞే;

తం ఖిప్పమానేన లహుం పరేన, సుఖో హవే సప్పురిసేన సఙ్గమో’’తి.

౧౨౭౨. ‘‘కిం నామ సో కిఞ్చ కరోతి కమ్మం,

కిం నామధేయ్యం కిం పన తస్స గోత్తం;

మయమ్పి నం దట్ఠుకామమ్హ యక్ఖ, యస్సానుకమ్పాయ ఇధాగతోసి;

లాభా హి తస్స, యస్స తువం పిహేసీ’’తి.

౧౨౭౩. ‘‘యో కప్పకో సమ్భవనామధేయ్యో,

ఉపాసకో కోచ్ఛఫలూపజీవీ;

జానాథ నం తుమ్హాకం పేసియో సో,

మా ఖో నం హీళిత్థ సుపేసలో సో’’తి.

౧౨౭౪. ‘‘జానామసే యం త్వం పవదేసి [వదేసి (సీ.)] యక్ఖ,

న ఖో నం జానామ స ఏదిసోతి;

మయమ్పి నం పూజయిస్సామ యక్ఖ,

సుత్వాన తుయ్హం వచనం ఉళార’’న్తి.

౧౨౭౫. ‘‘యే కేచి ఇమస్మిం సత్థే మనుస్సా,

దహరా మహన్తా అథవాపి మజ్ఝిమా;

సబ్బేవ తే ఆలమ్బన్తు విమానం,

పస్సన్తు పుఞ్ఞానం ఫలం కదరియా’’తి.

౧౨౭౬. తే తత్థ సబ్బేవ ‘అహం పురే’తి,

తం కప్పకం తత్థ పురక్ఖత్వా [పురక్ఖిపిత్వా (సీ.)];

సబ్బేవ తే ఆలమ్బింసు విమానం,

మసక్కసారం వియ వాసవస్స.

౧౨౭౭. తే తత్థ సబ్బేవ ‘అహం పురే’తి, ఉపాసకత్తం పటివేదయింసు;

పాణాతిపాతా విరతా అహేసుం, లోకే అదిన్నం పరివజ్జయింసు;

అమజ్జపా నో చ ముసా భణింసు, సకేన దారేన చ అహేసుం తుట్ఠా.

౧౨౭౮. తే తత్థ సబ్బేవ ‘అహం పురే’తి, ఉపాసకత్తం పటివేదయిత్వా;

పక్కామి సత్థో అనుమోదమానో, యక్ఖిద్ధియా అనుమతో పునప్పునం.

౧౨౭౯. ‘‘గన్త్వాన తే సిన్ధుసోవీరభూమిం, ధనత్థికా ఉద్దయం [ఉదయ (పీ. క.)] పత్థయానా;

యథాపయోగా పరిపుణ్ణలాభా, పచ్చాగముం పాటలిపుత్తమక్ఖతం.

౧౨౮౦. ‘‘గన్త్వాన తే సఙ్ఘరం సోత్థివన్తో,

పుత్తేహి దారేహి సమఙ్గిభూతా;

ఆనన్దీ విత్తా [ఆనన్దచిత్తా (స్యా.), ఆనన్దీచిత్తా (క.)] సుమనా పతీతా,

అకంసు సేరీసమహం ఉళారం;

సేరీసకం తే పరివేణం మాపయింసు.

౧౨౮౧. ఏతాదిసా సప్పురిసాన సేవనా,

మహత్థికా ధమ్మగుణాన సేవనా;

ఏకస్స అత్థాయ ఉపాసకస్స,

సబ్బేవ సత్తా సుఖితా [సుఖినో (పీ. క.)] అహేసున్తి.

సేరీసకవిమానం దసమం.