౮. పఠమకుణ్డలీవిమానవత్థు

౧౦౯౪. ‘‘అలఙ్కతో మల్యధరో సువత్థో, సుకుణ్డలీ కప్పితకేసమస్సు;

ఆముత్తహత్థాభరణో యసస్సీ, దిబ్బే విమానమ్హి యథాపి చన్దిమా.

౧౦౯౫. ‘‘దిబ్బా చ వీణా పవదన్తి వగ్గుం, అట్ఠట్ఠకా సిక్ఖితా సాధురూపా;

దిబ్బా చ కఞ్ఞా తిదసచరా ఉళారా, నచ్చన్తి గాయన్తి పమోదయన్తి.

౧౦౯౬. ‘‘దేవిద్ధిపత్తోసి మహానుభావో, మనుస్సభూతో కిమకాసి పుఞ్ఞం;

కేనాసి ఏవం జలితానుభావో, వణ్ణో చ తే సబ్బదిసా పభాసతీ’’తి.

౧౦౯౭. సో దేవపుత్తో అత్తమనో…పే… యస్స కమ్మస్సిదం ఫలం.

౧౦౯౮. ‘‘అహం మనుస్సేసు మనుస్సభూతో, దిస్వాన సమణే సీలవన్తే;

సమ్పన్నవిజ్జాచరణే యసస్సీ, బహుస్సుతే తణ్హక్ఖయూపపన్నే;

అన్నఞ్చ పానఞ్చ పసన్నచిత్తో, సక్కచ్చ దానం విపులం అదాసిం.

౧౦౯౯. ‘‘తేన మేతాదిసో వణ్ణో…పే…వణ్ణో చ మే సబ్బదిసా పభాసతీ’’తి.

పఠమకుణ్డలీవిమానం అట్ఠమం.