౬. పాయాసివగ్గో
౧. పఠమఅగారియవిమానవత్థు
౧౦౪౮. ‘‘యథా వనం చిత్తలతం పభాసతి [పకాసతి (క.)], ఉయ్యానసేట్ఠం తిదసానముత్తమం;
తథూపమం తుయ్హమిదం విమానం, ఓభాసయం తిట్ఠతి అన్తలిక్ఖే.
౧౦౪౯. ‘‘దేవిద్ధిపత్తోసి మహానుభావో, మనుస్సభూతో కిమకాసి పుఞ్ఞం;
కేనాసి ఏవం జలితానుభావో, వణ్ణో చ తే సబ్బదిసా పభాసతీ’’తి.
౧౦౫౦. సో దేవపుత్తో అత్తమనో, మోగ్గల్లానేన పుచ్ఛితో;
పఞ్హం పుట్ఠో వియాకాసి, యస్స కమ్మస్సిదం ఫలం.
౧౦౫౧. ‘‘అహఞ్చ భరియా చ మనుస్సలోకే, ఓపానభూతా ఘరమావసిమ్హ;
అన్నఞ్చ పానఞ్చ పసన్నచిత్తా, సక్కచ్చ దానం విపులం అదమ్హ.
౧౦౫౨. ‘‘తేన మేతాదిసో వణ్ణో…పే…వణ్ణో చ మే సబ్బదిసా పభాసతీ’’తి.
పఠమఅగారియవిమానం పఠమం.
౨. దుతియఅగారియవిమానవత్థు
౧౦౫౪. ‘‘యథా వనం చిత్తలతం పభాసతి, ఉయ్యానసేట్ఠం తిదసానముత్తమం;
తథూపమం తుయ్హమిదం విమానం, ఓభాసయం తిట్ఠతి అన్తలిక్ఖే.
౧౦౫౫. ‘‘దేవిద్ధిపత్తోసి మహానుభావో, మనుస్సభూతో కిమకాసి పుఞ్ఞం;
కేనాసి ఏవం జలితానుభావో, వణ్ణో చ తే సబ్బదిసా పభాసతీ’’తి.
౧౦౫౬. సో దేవపుత్తో అత్తమనో…పే… యస్స కమ్మస్సిదం ఫలం.
౧౦౫౭. ‘‘అహఞ్చ భరియా చ మనుస్సలోకే, ఓపానభూతా ఘరమావసిమ్హ;
అన్నఞ్చ పానఞ్చ పసన్నచిత్తా, సక్కచ్చ దానం విపులం అదమ్హ.
౧౦౫౮. ‘‘తేన మేతాదిసో వణ్ణో…పే… వణ్ణో చ మే సబ్బదిసా పభాసతీ’’తి.
దుతియఅగారియవిమానం దుతియం.
౩. ఫలదాయకవిమానవత్థు
౧౦౬౦. ‘‘ఉచ్చమిదం మణిథూణం విమానం, సమన్తతో సోళస యోజనాని;
కూటాగారా సత్తసతా ఉళారా, వేళురియథమ్భా రుచకత్థతా సుభా.
౧౦౬౧. ‘‘తత్థచ్ఛసి పివసి ఖాదసి చ, దిబ్బా చ వీణా పవదన్తి వగ్గుం;
అట్ఠట్ఠకా సిక్ఖితా సాధురూపా, దిబ్బా చ కఞ్ఞా తిదసచరా ఉళారా;
నచ్చన్తి గాయన్తి పమోదయన్తి.
౧౦౬౨. ‘‘దేవిద్ధిపత్తోసి మహానుభావో, మనుస్సభూతో కిమకాసి పుఞ్ఞం;
కేనాసి ఏవం జలితానుభావో, వణ్ణో చ తే సబ్బదిసా పభాసతీ’’తి.
౧౦౬౩. సో దేవపుత్తో అత్తమనో…పే… యస్స కమ్మస్సిదం ఫలం.
౧౦౬౪. ‘‘ఫలదాయీ ఫలం విపులం లభతి, దదముజుగతేసు పసన్నమానసో;
సో హి పమోదతి [మోదతి (సీ. స్యా. పీ.)] సగ్గగతో తిదివే [తత్థ (క.)], అనుభోతి చ పుఞ్ఞఫలం విపులం.
౧౦౬౫. ‘‘తవేవాహం [తథేవాహం (సీ. స్యా. పీ.)] మహాముని, అదాసిం చతురో ఫలే.
౧౦౬౬. ‘‘తస్మా హి ఫలం అలమేవ దాతుం, నిచ్చం మనుస్సేన సుఖత్థికేన;
దిబ్బాని వా పత్థయతా సుఖాని, మనుస్ససోభగ్గతమిచ్ఛతా వా.
౧౦౬౭. ‘‘తేన మేతాదిసో వణ్ణో…పే…
వణ్ణో చ మే సబ్బదిసా పభాసతీ’’తి.
ఫలదాయకవిమానం తతియం.
౪. పఠమఉపస్సయదాయకవిమానవత్థు
౧౦౬౯. ‘‘చన్దో యథా విగతవలాహకే నభే, ఓభాసయం గచ్ఛతి అన్తలిక్ఖే;
తథూపమం తుయ్హమిదం విమానం, ఓభాసయం తిట్ఠతి అన్తలిక్ఖే.
౧౦౭౦. ‘‘దేవిద్ధిపత్తోసి మహానుభావా, మనుస్సభూతో కిమకాసి పుఞ్ఞం;
కేనాసి ఏవం జలితానుభావో, వణ్ణో చ తే సబ్బదిసా పభాసతీ’’తి.
౧౦౭౧. సో దేవపుత్తో అత్తమనో…పే… యస్స కమ్మస్సిదం ఫలం.
౧౦౭౨. ‘‘అహఞ్చ భరియా చ మనుస్సలోకే, ఉపస్సయం అరహతో అదమ్హ;
అన్నఞ్చ పానఞ్చ పసన్నచిత్తా, సక్కచ్చ దానం విపులం అదమ్హ.
౧౦౭౩. ‘‘తేన మేతాదిసో వణ్ణో…పే… వణ్ణో చ మే సబ్బదిసా పభాసతీ’’తి.
పఠమఉపస్సయదాయకవిమానం చతుత్థం.
౫. దుతియఉపస్సయదాయకవిమానవత్థు
౧౦౭౫. సూరియో యథా విగతవలాహకే నభే…పే….
(యథా పురిమవిమానం తథా విత్థారేతబ్బం).
౧౦౭౯. ‘‘తేన మేతాదిసో వణ్ణో…పే…వణ్ణో చ మే సబ్బదిసా పభాసతీ’’తి.
దుతియఉపస్సయదాయకవిమానం పఞ్చమం.
౬. భిక్ఖాదాయకవిమానవత్థు
౧౦౮౧. ‘‘ఉచ్చమిదం మణిథూణం విమానం, సమన్తతో ద్వాదస యోజనాని;
కూటాగారా సత్తసతా ఉళారా, వేళురియథమ్భా రుచకత్థతా సుభా.
౧౦౮౨. ‘‘దేవిద్ధిపత్తోసి మహానుభావో, మనుస్సభూతో కిమకాసి పుఞ్ఞం;
కేనాసి ఏవం జలితానుభావో, వణ్ణో చ తే సబ్బదిసా పభాసతీ’’తి.
౧౦౮౩. సో దేవపుత్తో అత్తమనో…పే… యస్స కమ్మస్సిదం ఫలం.
౧౦౮౪. ‘‘అహం మనుస్సేసు మనుస్సభూతో, దిస్వాన భిక్ఖుం తసితం కిలన్తం;
ఏకాహం భిక్ఖం పటిపాదయిస్సం, సమఙ్గి భత్తేన తదా అకాసిం.
౧౦౮౫. ‘‘తేన మేతాదిసో వణ్ణో…పే… వణ్ణో చ మే సబ్బదిసా పభాసతీ’’తి.
భిక్ఖాదాయకవిమానం ఛట్ఠం.
౭. యవపాలకవిమానవత్థు
౧౦౮౭. ‘‘ఉచ్చమిదం మణిథూణం విమానం…పే… వణ్ణో చ తే సబ్బదిసా పభాసతీ’’తి.
౧౦౮౯. సో దేవపుత్తో అత్తమనో…పే… యస్స కమ్మస్సిదం ఫలం.
౧౦౯౦. ‘‘అహం మనుస్సేసు మనుస్సభూతో, అహోసిం యవపాలకో;
అద్దసం విరజం భిక్ఖుం, విప్పసన్నమనావిలం.
౧౦౯౧. ‘‘తస్స అదాసహం భాగం, పసన్నో సేహి పాణిభి;
కుమ్మాసపిణ్డం దత్వాన, మోదామి నన్దనే వనే.
౧౦౯౨. ‘‘తేన మేతాదిసో వణ్ణో…పే… వణ్ణో చ మే సబ్బదిసా పభాసతీ’’తి.
యవపాలకవిమానం సత్తమం.
౮. పఠమకుణ్డలీవిమానవత్థు
౧౦౯౪. ‘‘అలఙ్కతో మల్యధరో సువత్థో, సుకుణ్డలీ కప్పితకేసమస్సు;
ఆముత్తహత్థాభరణో యసస్సీ, దిబ్బే విమానమ్హి యథాపి చన్దిమా.
౧౦౯౫. ‘‘దిబ్బా చ వీణా పవదన్తి వగ్గుం, అట్ఠట్ఠకా సిక్ఖితా సాధురూపా;
దిబ్బా చ కఞ్ఞా తిదసచరా ఉళారా, నచ్చన్తి గాయన్తి పమోదయన్తి.
౧౦౯౬. ‘‘దేవిద్ధిపత్తోసి మహానుభావో, మనుస్సభూతో కిమకాసి పుఞ్ఞం;
కేనాసి ఏవం జలితానుభావో, వణ్ణో చ తే సబ్బదిసా పభాసతీ’’తి.
౧౦౯౭. సో దేవపుత్తో అత్తమనో…పే… యస్స కమ్మస్సిదం ఫలం.
౧౦౯౮. ‘‘అహం మనుస్సేసు మనుస్సభూతో, దిస్వాన సమణే సీలవన్తే;
సమ్పన్నవిజ్జాచరణే యసస్సీ, బహుస్సుతే తణ్హక్ఖయూపపన్నే;
అన్నఞ్చ పానఞ్చ పసన్నచిత్తో, సక్కచ్చ దానం విపులం అదాసిం.
౧౦౯౯. ‘‘తేన మేతాదిసో వణ్ణో…పే…వణ్ణో చ మే సబ్బదిసా పభాసతీ’’తి.
పఠమకుణ్డలీవిమానం అట్ఠమం.
౯. దుతియకుణ్డలీవిమానవత్థు
౧౧౦౧. ‘‘అలఙ్కతో మల్యధరో సువత్థో, సుకుణ్డలీ కప్పితకేసమస్సు;
ఆముత్తహత్థాభరణో యసస్సీ, దిబ్బే విమానమ్హి యథాపి చన్దిమా.
౧౧౦౨. ‘‘దిబ్బా చ వీణా పవదన్తి వగ్గుం, అట్ఠట్ఠకా సిక్ఖితా సాధురూపా;
దిబ్బా చ కఞ్ఞా తిదసచరా ఉళారా, నచ్చన్తి గాయన్తి పమోదయన్తి.
౧౧౦౩. ‘‘దేవిద్ధిపత్తోసి మహానుభావో, మనుస్సభూతో కిమకాసి పుఞ్ఞం;
కేనాసి ఏవం జలితానుభావో, వణ్ణో చ తే సబ్బదిసా పభాసతీ’’తి.
౧౧౦౪. సో దేవపుత్తో అత్తమనో…పే… యస్స కమ్మస్సిదం ఫలం.
౧౧౦౫. ‘‘అహం మనుస్సేసు మనుస్సభూతో, దిస్వాన సమణే సాధురూపే [సీలవన్తే (క.)];
సమ్పన్నవిజ్జాచరణే యసస్సీ, బహుస్సుతే సీలవన్తే పసన్నే [సీలవతూపపన్నే (క. సీ. క.)];
అన్నఞ్చ పానఞ్చ పసన్నచిత్తో, సక్కచ్చ దానం విపులం అదాసిం.
౧౧౦౬. ‘‘తేన మేతాదిసో వణ్ణో…పే…వణ్ణో చ మే సబ్బదిసా పభాసతీ’’తి.
దుతియకుణ్డలీవిమానం నవమం.
౧౦. (ఉత్తర) పాయాసివిమానవత్థు
౧౧౦౮. ‘‘యా దేవరాజస్స సభా సుధమ్మా, యత్థచ్ఛతి దేవసఙ్ఘో సమగ్గో;
తథూపమం తుయ్హమిదం విమానం, ఓభాసయం తిట్ఠతి అన్తలిక్ఖే.
౧౧౦౯. ‘‘దేవిద్ధిపత్తోసి మహానుభావో, మనుస్సభూతో కిమకాసి పుఞ్ఞం;
కేనాసి ఏవం జలితానుభావో, వణ్ణో చ తే సబ్బదిసా పభాసతీ’’తి.
౧౧౧౦. సో దేవపుత్తో అత్తమనో…పే… యస్స కమ్మస్సిదం ఫలం.
౧౧౧౧. ‘‘అహం మనుస్సేసు మనుస్సభూతో, రఞ్ఞో పాయాసిస్స అహోసిం మాణవో;
లద్ధా ధనం సంవిభాగం అకాసిం, పియా చ మే సీలవన్తో అహేసుం;
అన్నఞ్చ పానఞ్చ పసన్నచిత్తో, సక్కచ్చ దానం విపులం అదాసిం.
౧౧౧౨. ‘‘తేన మేతాదిసో వణ్ణో…పే. …వణ్ణో చ మే సబ్బదిసా పభాసతీ’’తి.
(ఉత్తర) పాయాసివిమానం [ఉత్తరవిమానం (సీ. స్యా. అట్ఠ.)] దసమం.
పాయాసివగ్గో ఛట్ఠో నిట్ఠితో.
తస్సుద్దానం –
ద్వే అగారినో ఫలదాయీ, ద్వే ఉపస్సయదాయీ భిక్ఖాయ దాయీ;
యవపాలకో చేవ ద్వే, కుణ్డలినో పాయాసీతి [పాఠభేదో నత్థి];
పురిసానం దుతియో వగ్గో పవుచ్చతీతి.