౧౪. మహారథవిమానవత్థు
౧౦౧౫. ‘‘సహస్సయుత్తం హయవాహనం సుభం, ఆరుయ్హిమం సన్దనం నేకచిత్తం;
ఉయ్యానభూమిం అభితో అనుక్కమం, పురిన్దదో భూతపతీవ వాసవో.
౧౦౧౬. ‘‘సోవణ్ణమయా తే రథకుబ్బరా ఉభో, ఫలేహి [థలేహి (సీ.)] అంసేహి అతీవ సఙ్గతా;
సుజాతగుమ్బా నరవీరనిట్ఠితా, విరోచతీ పన్నరసేవ చన్దో.
౧౦౧౭. ‘‘సువణ్ణజాలావతతో రథో అయం, బహూహి నానారతనేహి చిత్తితో;
సునన్దిఘోసో చ సుభస్సరో చ, విరోచతీ చామరహత్థబాహుభి.
౧౦౧౮. ‘‘ఇమా చ నాభ్యో మనసాభినిమ్మితా, రథస్స పాదన్తరమజ్ఝభూసితా;
ఇమా చ నాభ్యో సతరాజిచిత్తితా, సతేరతా విజ్జురివప్పభాసరే.
౧౦౧౯. ‘‘అనేకచిత్తావతతో రథో అయం, పుథూ చ నేమీ చ సహస్సరంసికో;
తేసం సరో సుయ్యతి [సూయతి (సీ.)] వగ్గురూపో, పఞ్చఙ్గికం తురియమివప్పవాదితం.
౧౦౨౦. ‘‘సిరస్మిం చిత్తం మణిచన్దకప్పితం, సదా విసుద్ధం రుచిరం పభస్సరం;
సువణ్ణరాజీహి అతీవ సఙ్గతం, వేళురియరాజీవ అతీవ సోభతి.
౧౦౨౧. ‘‘ఇమే చ వాళీ మణిచన్దకప్పితా, ఆరోహకమ్బూ సుజవా బ్రహూపమా.
బ్రహా మహన్తా బలినో మహాజవా, మనో తవఞ్ఞాయ తథేవ సింసరే [సబ్బరే (క.), సప్పరే (?)].
౧౦౨౨. ‘‘ఇమే చ సబ్బే సహితా చతుక్కమా, మనో తవఞ్ఞాయ తథేవ సింసరే;
సమం వహన్తా ముదుకా అనుద్ధతా, ఆమోదమానా తురగాన [తురఙ్గాన (క.)] ముత్తమా.
౧౦౨౩. ‘‘ధునన్తి వగ్గన్తి పతన్తి [పవత్తన్తి (పీ. క.)] చమ్బరే, అబ్భుద్ధునన్తా సుకతే పిళన్ధనే;
తేసం సరో సుయ్యతి వగ్గురూపో, పఞ్చఙ్గికం తురియమివప్పవాదితం.
౧౦౨౪. ‘‘రథస్స ఘోసో అపిళన్ధనాన చ, ఖురస్స నాదో [నాదీ (స్యా.), నాది (పీ. క.)] అభిహింసనాయ చ;
ఘోసో సువగ్గూ సమితస్స సుయ్యతి, గన్ధబ్బతూరియాని విచిత్రసంవనే.
౧౦౨౫. ‘‘రథే ఠితా తా మిగమన్దలోచనా, ఆళారపమ్హా హసితా పియంవదా;
వేళురియజాలావతతా తనుచ్ఛవా, సదేవ గన్ధబ్బసూరగ్గపూజితా.
౧౦౨౬. ‘‘తా రత్తరత్తమ్బరపీతవాససా, విసాలనేత్తా అభిరత్తలోచనా;
కులే సుజాతా సుతనూ సుచిమ్హితా, రథే ఠితా పఞ్జలికా ఉపట్ఠితా.
౧౦౨౭. ‘‘తా కమ్బుకేయూరధరా సువాససా, సుమజ్ఝిమా ఊరుథనూపపన్నా;
వట్టఙ్గులియో సుముఖా సుదస్సనా, రథే ఠితా పఞ్జలికా ఉపట్ఠితా.
౧౦౨౮. ‘‘అఞ్ఞా సువేణీ సుసు మిస్సకేసియో, సమం విభత్తాహి పభస్సరాహి చ;
అనుబ్బతా తా తవ మానసే రతా, రథే ఠితా పఞ్జలికా ఉపట్ఠితా.
౧౦౨౯. ‘‘ఆవేళినియో పదుముప్పలచ్ఛదా, అలఙ్కతా చన్దనసారవాసితా [వోసితా (స్యా.), భూసితా (క.)];
అనుబ్బతా తా తవ మానసే రతా, రథే ఠితా పఞ్జలికా ఉపట్ఠితా.
౧౦౩౦. ‘‘తా మాలినియో పదుముప్పలచ్ఛదా, అలఙ్కతా చన్దనసారవాసితా;
అనుబ్బతా తా తవ మానసే రతా, రథే ఠితా పఞ్జలికా ఉపట్ఠితా.
౧౦౩౧. ‘‘కణ్ఠేసు తే యాని పిళన్ధనాని, హత్థేసు పాదేసు తథేవ సీసే;
ఓభాసయన్తీ దస సబ్బసో దిసా, అబ్భుద్దయం సారదికోవ భాణుమా.
౧౦౩౨. ‘‘వాతస్స వేగేన చ సమ్పకమ్పితా, భుజేసు మాలా అపిళన్ధనాని చ;
ముఞ్చన్తి ఘోసం రూచిరం సుచిం సుభం, సబ్బేహి విఞ్ఞూహి సుతబ్బరూపం.
౧౦౩౩. ‘‘ఉయ్యానభూమ్యా చ దువద్ధతో ఠితా, రథా చ నాగా తూరియాని చ సరో;
తమేవ దేవిన్ద పమోదయన్తి, వీణా యథా పోక్ఖరపత్తబాహుభి.
౧౦౩౪. ‘‘ఇమాసు వీణాసు బహూసు వగ్గూసు, మనుఞ్ఞరూపాసు హదయేరితం పీతిం [హదయేరితం పతి (సీ.), హదయేరితమ్పి తం (స్యా.)];
పవజ్జమానాసు అతీవ అచ్ఛరా, భమన్తి కఞ్ఞా పదుమేసు సిక్ఖితా.
౧౦౩౫. ‘‘యదా చ గీతాని చ వాదితాని చ, నచ్చాని చిమాని [చేమాని (సీ.)] సమేన్తి ఏకతో;
అథేత్థ నచ్చన్తి అథేత్థ అచ్ఛరా, ఓభాసయన్తీ ఉభతో వరిత్థియో.
౧౦౩౬. ‘‘సో మోదసి తురియగణప్పబోధనో, మహీయమానో వజిరావుధోరివ;
ఇమాసు వీణాసు బహూసు వగ్గూసు, మనుఞ్ఞరూపాసు హదయేరితం పీతిం.
౧౦౩౭. ‘‘కిం త్వం పురే కమ్మమకాసి అత్తనా, మనుస్సభూతో పురిమాయ జాతియా;
ఉపోసథం కం వా [ఉపోసథం కిం వ (స్యా.)] తువం ఉపావసి, కం [కిం (స్యా.)] ధమ్మచరియం వతమాభిరోచయి.
౧౦౩౮. ‘‘నయీదమప్పస్స కతస్స [నయిదం అప్పస్స కతస్స (సీ. స్యా.), సాసేదం అప్పకతస్స (క.)] కమ్మునో, పుబ్బే సుచిణ్ణస్స ఉపోసథస్స వా;
ఇద్ధానుభావో విపులో అయం తవ, యం దేవసఙ్ఘం అభిరోచసే భుసం.
౧౦౩౯. ‘‘దానస్స తే ఇదం ఫలం, అథో సీలస్స వా పన;
అథో అఞ్జలికమ్మస్స, తం మే అక్ఖాహి పుచ్ఛితో’’తి.
౧౦౪౦. సో దేవపుత్తో అత్తమనో, మోగ్గల్లానేన పుచ్ఛితో;
పఞ్హం పుట్ఠో వియాకాసి, యస్స కమ్మస్సిదం ఫలన్తి.
౧౦౪౧. ‘‘జితిన్ద్రియం బుద్ధమనోమనిక్కమం, నరుత్తమం కస్సపమగ్గపుగ్గలం;
అవాపురన్తం అమతస్స ద్వారం, దేవాతిదేవం సతపుఞ్ఞలక్ఖణం.
౧౦౪౨. ‘‘తమద్దసం కుఞ్జరమోఘతిణ్ణం, సువణ్ణసిఙ్గీనదబిమ్బసాదిసం;
దిస్వాన తం ఖిప్పమహుం సుచీమనో, తమేవ దిస్వాన సుభాసితద్ధజం.
౧౦౪౩. ‘‘తమన్నపానం అథవాపి చీవరం, సుచిం పణీతం రససా ఉపేతం;
పుప్ఫాభిక్కిణమ్హి సకే నివేసనే, పతిట్ఠపేసిం స అసఙ్గమానసో.
౧౦౪౪. ‘‘తమన్నపానేన చ చీవరేన చ, ఖజ్జేన భోజ్జేన చ సాయనేన చ;
సన్తప్పయిత్వా ద్విపదానముత్తమం, సో సగ్గసో దేవపురే రమామహం.
౧౦౪౫.
‘‘ఏతేనుపాయేన ఇమం నిరగ్గళం, యఞ్ఞం యజిత్వా తివిధం విసుద్ధం.
పహాయహం మానుసకం సముస్సయం, ఇన్దూపమో [ఇన్దస్సమో (స్యా. క.)] దేవపురే రమామహం.
౧౦౪౬. ‘‘ఆయుఞ్చ వణ్ణఞ్చ సుఖం బలఞ్చ, పణీతరూపం అభికఙ్ఖతా ముని;
అన్నఞ్చ పానఞ్చ బహుం సుసఙ్ఖతం, పతిట్ఠపేతబ్బమసఙ్గమానసే.
౧౦౪౭. [కథా. ౭౯౯]‘‘నయిమస్మిం లోకే పరస్మిం [నయిమస్మిం వా లోకే పరస్మిం (కథావత్థు ౭౯౯), నయిమస్మి లోకే వ పరస్మి (?)] వా పన, బుద్ధేన సేట్ఠో వ సమో వ విజ్జతి;
ఆహునేయ్యానం [యమాహునేయ్యానం (క.)] పరమాహుతిం గతో, పుఞ్ఞత్థికానం విపులప్ఫలేసిన’’న్తి.
మహారథవిమానం చుద్దసమం.
మహారథవగ్గో పఞ్చమో నిట్ఠితో.
తస్సుద్దానం –
మణ్డూకో రేవతీ ఛత్తో, కక్కటో ద్వారపాలకో;
ద్వే కరణీయా ద్వే సూచి, తయో నాగా చ ద్వే రథా;
పురిసానం పఠమో వగ్గో పవుచ్చతీతి.
భాణవారం తతియం నిట్ఠితం.