౧౩. చూళరథవిమానవత్థు

౯౮౧. ‘‘దళ్హధమ్మా నిసారస్స, ధనుం ఓలుబ్భ తిట్ఠసి;

ఖత్తియో నుసి రాజఞ్ఞో, అదు లుద్దో వనేచరో’’తి [వనాచరోతి (స్యా. క.)].

౯౮౨. ‘‘అస్సకాధిపతిస్సాహం, భన్తే పుత్తో వనేచరో;

నామం మే భిక్ఖు తే బ్రూమి, సుజాతో ఇతి మం విదూ [విదుం (సీ.)].

౯౮౩. ‘‘మిగే గవేసమానోహం, ఓగాహన్తో బ్రహావనం;

మిగం తఞ్చేవ [మిగం గన్త్వేవ (స్యా.), మిగవధఞ్చ (క.)] నాద్దక్ఖిం, తఞ్చ దిస్వా ఠితో అహ’’న్తి.

౯౮౪. ‘‘స్వాగతం తే మహాపుఞ్ఞ, అథో తే అదురాగతం;

ఏత్తో ఉదకమాదాయ, పాదే పక్ఖాలయస్సు తే.

౯౮౫. ‘‘ఇదమ్పి పానీయం సీతం, ఆభతం గిరిగబ్భరా;

రాజపుత్త తతో పిత్వా [పీత్వా (సీ. స్యా.)], సన్థతస్మిం ఉపావిసా’’తి.

౯౮౬. ‘‘కల్యాణీ వత తే వాచా, సవనీయా మహాముని;

నేలా అత్థవతీ [చత్థవతీ (సీ.)] వగ్గు, మన్త్వా [మన్తా (స్యా. పీ. క.)] అత్థఞ్చ భాససి [భాససే (సీ.)].

౯౮౭. ‘‘కా తే రతి వనే విహరతో, ఇసినిసభ వదేహి పుట్ఠో;

తవ వచనపథం నిసామయిత్వా, అత్థధమ్మపదం సమాచరేమసే’’తి.

౯౮౮. ‘‘అహింసా సబ్బపాణీనం, కుమారమ్హాక రుచ్చతి;

థేయ్యా చ అతిచారా చ, మజ్జపానా చ ఆరతి.

౯౮౯. ‘‘ఆరతి సమచరియా చ, బాహుసచ్చం కతఞ్ఞుతా;

దిట్ఠేవ ధమ్మే పాసంసా, ధమ్మా ఏతే పసంసియాతి.

౯౯౦. ‘‘సన్తికే మరణం తుయ్హం, ఓరం మాసేహి పఞ్చహి;

రాజపుత్త విజానాహి, అత్తానం పరిమోచయా’’తి.

౯౯౧. ‘‘కతమం స్వాహం జనపదం గన్త్వా, కిం కమ్మం కిఞ్చ పోరిసం;

కాయ వా పన విజ్జాయ, భవేయ్యం అజరామరో’’తి.

౯౯౨. ‘‘న విజ్జతే సో పదేసో, కమ్మం విజ్జా చ పోరిసం;

యత్థ గన్త్వా భవే మచ్చో, రాజపుత్తాజరామరో.

౯౯౩. ‘‘మహద్ధనా మహాభోగా, రట్ఠవన్తోపి ఖత్తియా;

పహూతధనధఞ్ఞాసే, తేపి నో [తేపి న (బహూసు)] అజరామరా.

౯౯౪. ‘‘యది తే సుతా అన్ధకవేణ్డుపుత్తా [అన్ధకవేణ్హుపుత్తా (సీ.), అణ్డకవేణ్డపుత్తా (స్యా. క.)], సూరా వీరా విక్కన్తప్పహారినో;

తేపి ఆయుక్ఖయం పత్తా, విద్ధస్తా సస్సతీసమా.

౯౯౫. ‘‘ఖత్తియా బ్రాహ్మణా వేస్సా, సుద్దా చణ్డాలపుక్కుసా;

ఏతే చఞ్ఞే చ జాతియా, తేపి నో అజరామరా.

౯౯౬. ‘‘యే మన్తం పరివత్తేన్తి, ఛళఙ్గం బ్రహ్మచిన్తితం;

ఏతే చఞ్ఞే చ విజ్జాయ, తేపి నో అజరామరా.

౯౯౭. ‘‘ఇసయో చాపి యే సన్తా, సఞ్ఞతత్తా తపస్సినో;

సరీరం తేపి కాలేన, విజహన్తి తపస్సినో.

౯౯౮. ‘‘భావితత్తాపి అరహన్తో, కతకిచ్చా అనాసవా;

నిక్ఖిపన్తి ఇమం దేహం, పుఞ్ఞపాపపరిక్ఖయా’’తి.

౯౯౯. ‘‘సుభాసితా అత్థవతీ, గాథాయో తే మహాముని;

నిజ్ఝత్తోమ్హి సుభట్ఠేన, త్వఞ్చ మే సరణం భవా’’తి.

౧౦౦౦. ‘‘మా మం త్వం సరణం గచ్ఛ, తమేవ సరణం వజ [భజ (క.)];

సక్యపుత్తం మహావీరం, యమహం సరణం గతో’’తి.

౧౦౦౧. ‘‘కతరస్మిం సో జనపదే, సత్థా తుమ్హాక మారిస;

అహమ్పి దట్ఠుం గచ్ఛిస్సం, జినం అప్పటిపుగ్గల’’న్తి.

౧౦౦౨. ‘‘పురత్థిమస్మిం జనపదే, ఓక్కాకకులసమ్భవో;

తత్థాసి పురిసాజఞ్ఞో, సో చ ఖో పరినిబ్బుతో’’తి.

౧౦౦౩. ‘‘సచే హి బుద్ధో తిట్ఠేయ్య, సత్థా తుమ్హాక మారిస;

యోజనాని సహస్సాని, గచ్ఛేయ్యం [గచ్ఛే (స్యా. పీ. క.)] పయిరుపాసితుం.

౧౦౦౪. ‘‘యతో చ ఖో [యతా ఖో (పీ. క.)] పరినిబ్బుతో, సత్థా తుమ్హాక మారిస;

నిబ్బుతమ్పి [పరినిబ్బుతం (స్యా. క.)] మహావీరం, గచ్ఛామి సరణం అహం.

౧౦౦౫. ‘‘ఉపేమి సరణం బుద్ధం, ధమ్మఞ్చాపి అనుత్తరం;

సఙ్ఘఞ్చ నరదేవస్స, గచ్ఛామి సరణం అహం.

౧౦౦౬. ‘‘పాణాతిపాతా విరమామి ఖిప్పం, లోకే అదిన్నం పరివజ్జయామి;

అమజ్జపో నో చ ముసా భణామి, సకేన దారేన చ హోమి తుట్ఠో’’తి.

౧౦౦౭. ‘‘సహస్సరంసీవ యథా మహప్పభో, దిసం యథా భాతి నభే అనుక్కమం;

తథాపకారో [తథప్పకారో (సీ. స్యా.)] తవాయం [తవయం (సీ. పీ.)] మహారథో, సమన్తతో యోజనసత్తమాయతో.

౧౦౦౮. ‘‘సువణ్ణపట్టేహి సమన్తమోత్థటో, ఉరస్స ముత్తాహి మణీహి చిత్తితో;

లేఖా సువణ్ణస్స చ రూపియస్స చ, సోభేన్తి వేళురియమయా సునిమ్మితా.

౧౦౦౯. ‘‘సీసఞ్చిదం వేళురియస్స నిమ్మితం, యుగఞ్చిదం లోహితకాయ చిత్తితం;

యుత్తా సువణ్ణస్స చ రూపియస్స చ, సోభన్తి అస్సా చ ఇమే మనోజవా.

౧౦౧౦. ‘‘సో తిట్ఠసి హేమరథే అధిట్ఠితో, దేవానమిన్దోవ సహస్సవాహనో;

పుచ్ఛామి తాహం యసవన్త కోవిదం [కోవిద (క.)], కథం తయా లద్ధో అయం ఉళారో’’తి.

౧౦౧౧. ‘‘సుజాతో నామహం భన్తే, రాజపుత్తో పురే అహుం;

త్వఞ్చ మం అనుకమ్పాయ, సఞ్ఞమస్మిం నివేసయి.

౧౦౧౨. ‘‘ఖీణాయుకఞ్చ మం ఞత్వా, సరీరం పాదాసి సత్థునో;

ఇమం సుజాత పూజేహి, తం తే అత్థాయ హేహితి.

౧౦౧౩. ‘‘తాహం గన్ధేహి మాలేహి, పూజయిత్వా సముయ్యుతో;

పహాయ మానుసం దేహం, ఉపపన్నోమ్హి నన్దనం.

౧౦౧౪. ‘‘నన్దనే చ వనే [నన్దనోపవనే (సీ.), నన్దనే పవనే (స్యా. క.)] రమ్మే, నానాదిజగణాయుతే;

రమామి నచ్చగీతేహి, అచ్ఛరాహి పురక్ఖతో’’తి.

చూళరథవిమానం తేరసమం.