౧౨. తతియనాగవిమానవత్థు

౯౭౬. ‘‘కో ను దిబ్బేన యానేన, సబ్బసేతేన హత్థినా;

తురియతాళితనిగ్ఘోసో, అన్తలిక్ఖే మహీయతి.

౯౭౭. ‘‘దేవతా నుసి గన్ధబ్బో, అదు [ఆదు (సీ. స్యా.)] సక్కో పురిన్దదో;

అజానన్తా తం పుచ్ఛామ, కథం జానేము తం మయ’’న్తి.

౯౭౮. ‘‘నమ్హి దేవో న గన్ధబ్బో, నాపి [నామ్హి (క.)] సక్కో పురిన్దదో;

సుధమ్మా నామ యే దేవా, తేసం అఞ్ఞతరో అహ’’న్తి.

౯౭౯. ‘‘పుచ్ఛామ దేవం సుధమ్మం [దేవ సుధమ్మ (స్యా.), దేవ సుధమ్మం (క.)], పుథుం కత్వాన అఞ్జలిం;

కిం కత్వా మానుసే కమ్మం, సుధమ్మం ఉపపజ్జతీ’’తి.

౯౮౦. ‘‘ఉచ్ఛాగారం తిణాగారం, వత్థాగారఞ్చ యో దదే;

తిణ్ణం అఞ్ఞతరం దత్వా, సుధమ్మం ఉపపజ్జతీ’’తి.

తతియనాగవిమానం ద్వాదసమం.