౧౧. దుతియనాగవిమానవత్థు

౯౬౮. ‘‘మహన్తం నాగం అభిరుయ్హ, సబ్బసేతం గజుత్తమం;

వనా వనం అనుపరియాసి, నారీగణపురక్ఖతో;

ఓభాసేన్తో దిసా సబ్బా, ఓసధీ వియ తారకా.

౯౬౯. ‘‘కేన తేతాదిసో వణ్ణో…పే…వణ్ణో చ తే సబ్బదిసా పభాసతీ’’తి.

౯౭౧. సో దేవపుత్తో అత్తమనో, వఙ్గీసేనేవ పుచ్ఛితో;

పఞ్హం పుట్ఠో వియాకాసి, యస్స కమ్మస్సిదం ఫలం.

౯౭౨. ‘‘అహం మనుస్సేసు మనుస్సభూతో, ఉపాసకో చక్ఖుమతో అహోసిం;

పాణాతిపాతా విరతో అహోసిం, లోకే అదిన్నం పరివజ్జయిస్సం.

౯౭౩. ‘‘అమజ్జపో నో చ ముసా అభాణిం [అభాసిం (సీ. క.)], సకేన దారేన చ తుట్ఠో అహోసిం;

అన్నఞ్చ పానఞ్చ పసన్నచిత్తో, సక్కచ్చ దానం విపులం అదాసిం.

౯౭౪. ‘‘తేన మేతాదిసో వణ్ణో…పే…వణ్ణో చ మే సబ్బదిసా పభాసతీ’’తి.

దుతియనాగవిమానం ఏకాదసమం.