౧౦. పఠమనాగవిమానవత్థు

౯౬౧. ‘‘సుసుక్కఖన్ధం అభిరుయ్హ నాగం, అకాచినం దన్తిం బలిం మహాజవం;

అభిరుయ్హ గజవరం [గజం వరం (స్యా.)] సుకప్పితం, ఇధాగమా వేహాయసం అన్తలిక్ఖే.

౯౬౨. ‘‘నాగస్స దన్తేసు దువేసు నిమ్మితా, అచ్ఛోదకా పదుమినియో సుఫుల్లా;

పదుమేసు చ తురియగణా పవజ్జరే, ఇమా చ నచ్చన్తి మనోహరాయో.

౯౬౩. ‘‘దేవిద్ధిపత్తోసి మహానుభావో, మనుస్సభూతో కిమకాసి పుఞ్ఞం;

కేనాసి ఏవం జలితానుభావో, వణ్ణో చ తే సబ్బదిసా పభాసతీ’’తి.

౯౬౪. సో దేవపుత్తో అత్తమనో, మోగ్గల్లానేన పుచ్ఛితో;

పఞ్హం పుట్ఠో వియాకాసి, యస్స కమ్మస్సిదం ఫలం.

౯౬౫. ‘‘అట్ఠేవ ముత్తపుప్ఫాని, కస్సపస్స మహేసినో [భగవతో (స్యా. క.)];

థూపస్మిం అభిరోపేసిం, పసన్నో సేహి పాణిభి.

౯౬౬. ‘‘తేన మేతాదిసో వణ్ణో…పే…వణ్ణో చ మే సబ్బదిసా పభాసతీ’’తి.

పఠమనాగవిమానం దసమం.