౧౨. రజ్జుమాలావిమానవత్థు
౮౨౬. ‘‘అభిక్కన్తేన వణ్ణేన, యా త్వం తిట్ఠసి దేవతే;
హత్థపాదే చ విగ్గయ్హ, నచ్చసి సుప్పవాదితే.
౮౨౭. ‘‘తస్సా తే నచ్చమానాయ, అఙ్గమఙ్గేహి సబ్బసో;
దిబ్బా సద్దా నిచ్ఛరన్తి, సవనీయా మనోరమా.
౮౨౮. ‘‘తస్సా తే నచ్చమానాయ, అఙ్గమఙ్గేహి సబ్బసో;
దిబ్బా గన్ధా పవాయన్తి, సుచిగన్ధా మనోరమా.
౮౨౯. ‘‘వివత్తమానా కాయేన, యా వేణీసు పిళన్ధనా;
తేసం సుయ్యతి నిగ్ఘోసో, తురియే పఞ్చఙ్గికే యథా.
౮౩౦. ‘‘వటంసకా వాతధుతా, వాతేన సమ్పకమ్పితా;
తేసం సుయ్యతి నిగ్ఘోసో, తురియే పఞ్చఙ్గికే యథా.
౮౩౧. ‘‘యాపి తే సిరస్మిం మాలా, సుచిగన్ధా మనోరమా;
వాతి గన్ధో దిసా సబ్బా, రుక్ఖో మఞ్జూసకో యథా.
౮౩౨. ‘‘ఘాయసే తం సుచిగన్ధం, రూపం పస్ససి అమానుసం;
దేవతే పుచ్ఛితాచిక్ఖ, కిస్స కమ్మస్సిదం ఫల’’న్తి.
౮౩౩. ‘‘దాసీ అహం పురే ఆసిం, గయాయం బ్రాహ్మణస్సహం;
అప్పపుఞ్ఞా అలక్ఖికా, రజ్జుమాలాతి మం విదుం [విదూ (స్యా. పీ. క.)].
౮౩౪. ‘‘అక్కోసానం వధానఞ్చ, తజ్జనాయ చ ఉగ్గతా [ఉక్కతా (సీ. స్యా.)];
కుటం గహేత్వా నిక్ఖమ్మ, అగఞ్ఛిం [ఆగచ్ఛిం (స్యా. క.), అగచ్ఛిం (పీ.), గచ్ఛిం (సీ.)] ఉదహారియా [ఉదకహారియా (సీ.)].
౮౩౫. ‘‘విపథే కుటం నిక్ఖిపిత్వా, వనసణ్డం ఉపాగమిం;
ఇధేవాహం మరిస్సామి, కో అత్థో [క్వత్థోసి (క.), కీవత్థోపి (స్యా.)] జీవితేన మే.
౮౩౬. ‘‘దళ్హం పాసం కరిత్వాన, ఆసుమ్భిత్వాన పాదపే;
తతో దిసా విలోకేసిం,కో ను ఖో వనమస్సితో.
౮౩౭. ‘‘తత్థద్దసాసిం సమ్బుద్ధం, సబ్బలోకహితం మునిం;
నిసిన్నం రుక్ఖమూలస్మిం, ఝాయన్తం అకుతోభయం.
౮౩౮. ‘‘తస్సా మే అహు సంవేగో, అబ్భుతో లోమహంసనో;
కో ను ఖో వనమస్సితో, మనుస్సో ఉదాహు దేవతా.
౮౩౯. ‘‘పాసాదికం పసాదనీయం, వనా నిబ్బనమాగతం;
దిస్వా మనో మే పసీది, నాయం యాదిసకీదిసో.
౮౪౦. ‘‘గుత్తిన్ద్రియో ఝానరతో, అబహిగ్గతమానసో;
హితో సబ్బస్స లోకస్స, బుద్ధో అయం [సోయం (సీ.)] భవిస్సతి.
౮౪౧. ‘‘భయభేరవో దురాసదో, సీహోవ గుహమస్సితో;
దుల్లభాయం దస్సనాయ, పుప్ఫం ఓదుమ్బరం యథా.
౮౪౨. ‘‘సో మం ముదూహి వాచాహి, ఆలపిత్వా తథాగతో;
రజ్జుమాలేతి మంవోచ, సరణం గచ్ఛ తథాగతం.
౮౪౩. ‘‘తాహం గిరం సుణిత్వాన, నేలం అత్థవతిం సుచిం;
సణ్హం ముదుఞ్చ వగ్గుఞ్చ, సబ్బసోకాపనూదనం.
౮౪౪. ‘‘కల్లచిత్తఞ్చ మం ఞత్వా, పసన్నం సుద్ధమానసం;
హితో సబ్బస్స లోకస్స, అనుసాసి తథాగతో.
౮౪౫. ‘‘ఇదం దుక్ఖన్తి మంవోచ, అయం దుక్ఖస్స సమ్భవో;
దుక్ఖ [అయం (సీ. స్యా. పీ.)] నిరోధో మగ్గో చ [దుక్ఖనిరోధో చ (స్యా.)], అఞ్జసో అమతోగధో.
౮౪౬. ‘‘అనుకమ్పకస్స కుసలస్స, ఓవాదమ్హి అహం ఠితా;
అజ్ఝగా అమతం సన్తిం, నిబ్బానం పదమచ్చుతం.
౮౪౭. ‘‘సాహం అవట్ఠితాపేమా, దస్సనే అవికమ్పినీ;
మూలజాతాయ సద్ధాయ, ధీతా బుద్ధస్స ఓరసా.
౮౪౮. ‘‘సాహం రమామి కీళామి, మోదామి అకుతోభయా;
దిబ్బమాలం ధారయామి, పివామి మధుమద్దవం.
౮౪౯. ‘‘సట్ఠితురియసహస్సాని, పటిబోధం కరోన్తి మే;
ఆళమ్బో గగ్గరో భీమో, సాధువాదీ చ సంసయో.
౮౫౦. ‘‘పోక్ఖరో చ సుఫస్సో చ, వీణామోక్ఖా చ నారియో;
నన్దా చేవ సునన్దా చ, సోణదిన్నా సుచిమ్హితా.
౮౫౧. ‘‘అలమ్బుసా మిస్సకేసీ చ, పుణ్డరీకాతిదారుణీ [… తిచారుణీ (సీ.)];
ఏణీఫస్సా సుఫస్సా [సుపస్సా (స్యా. పీ. క.)] చ, సుభద్దా [సంభద్దా (క.)] ముదువాదినీ.
౮౫౨. ‘‘ఏతా చఞ్ఞా చ సేయ్యాసే, అచ్ఛరానం పబోధికా;
తా మం కాలేనుపాగన్త్వా, అభిభాసన్తి దేవతా.
౮౫౩. ‘‘హన్ద నచ్చామ గాయామ, హన్ద తం రమయామసే;
నయిదం అకతపుఞ్ఞానం, కతపుఞ్ఞానమేవిదం.
౮౫౪. ‘‘అసోకం నన్దనం రమ్మం, తిదసానం మహావనం;
సుఖం అకతపుఞ్ఞానం, ఇధ నత్థి పరత్థ చ.
౮౫౫. ‘‘సుఖఞ్చ కతపుఞ్ఞానం, ఇధ చేవ పరత్థ చ;
తేసం సహబ్యకామానం, కత్తబ్బం కుసలం బహుం;
కతపుఞ్ఞా హి మోదన్తి, సగ్గే భోగసమఙ్గినో.
౮౫౬. ‘‘బహూనం వత అత్థాయ, ఉప్పజ్జన్తి తథాగతా;
దక్ఖిణేయ్యా మనుస్సానం, పుఞ్ఞఖేత్తానమాకరా;
యత్థ కారం కరిత్వాన, సగ్గే మోదన్తి దాయకా’’తి.
రజ్జుమాలావిమానం ద్వాదసమం.
మఞ్జిట్ఠకవగ్గో చతుత్థో నిట్ఠితో.
తస్సుద్దానం –
మఞ్జిట్ఠా పభస్సరా నాగా, అలోమాకఞ్జికదాయికా;
విహారచతురిత్థమ్బా, పీతా ఉచ్ఛువన్దనరజ్జుమాలా చ;
వగ్గో తేన పవుచ్చతీతి.
ఇత్థివిమానం సమత్తం.