౪. మఞ్జిట్ఠకవగ్గో
౧. మఞ్జిట్ఠకవిమానవత్థు
౬౮౯. ‘‘మఞ్జిట్ఠకే [మఞ్జేట్ఠకే (సీ.)] విమానస్మిం, సోణ్ణవాలుకసన్థతే [సోవణ్ణవాలుకసన్థతే (స్యా. పీ.), సోవణ్ణవాలికసన్థతే (క.)];
పఞ్చఙ్గికే తురియేన [తురియేన (సీ. స్యా. పీ.)], రమసి సుప్పవాదితే.
౬౯౦. ‘‘తమ్హా విమానా ఓరుయ్హ, నిమ్మితా రతనామయా;
ఓగాహసి సాలవనం, పుప్ఫితం సబ్బకాలికం.
౬౯౧. ‘‘యస్స యస్సేవ సాలస్స, మూలే తిట్ఠసి దేవతే;
సో సో ముఞ్చతి పుప్ఫాని, ఓనమిత్వా దుముత్తమో.
౬౯౨. ‘‘వాతేరితం సాలవనం, ఆధుతం [ఆధూతం (సీ.)] దిజసేవితం;
వాతి గన్ధో దిసా సబ్బా, రుక్ఖో మఞ్జూసకో యథా.
౬౯౩. ‘‘ఘాయసే తం సుచిగన్ధం, రూపం పస్ససి అమానుసం;
దేవతే పుచ్ఛితాచిక్ఖ, కిస్స కమ్మస్సిదం ఫల’’న్తి.
౬౯౪. ‘‘అహం మనుస్సేసు మనుస్సభూతా, దాసీ అయిరకులే [అయ్యిరకులే (స్యా. క.)] అహుం;
బుద్ధం నిసిన్నం దిస్వాన, సాలపుప్ఫేహి ఓకిరిం.
౬౯౫. ‘‘వటంసకఞ్చ సుకతం, సాలపుప్ఫమయం అహం;
బుద్ధస్స ఉపనామేసిం, పసన్నా సేహి పాణిభి.
౬౯౬. ‘‘తాహం కమ్మం కరిత్వాన, కుసలం బుద్ధవణ్ణితం;
అపేతసోకా సుఖితా, సమ్పమోదామనామయా’’తి.
మఞ్జిట్ఠకవిమానం పఠమం.
౨. పభస్సరవిమానవత్థు
౬౯౭. ‘‘పభస్సరవరవణ్ణనిభే, సురత్తవత్థవసనే [వత్థనివాసనే (సీ. స్యా.)];
మహిద్ధికే చన్దనరుచిరగత్తే, కా త్వం సుభే దేవతే వన్దసే మమం.
౬౯౮. ‘‘పల్లఙ్కో చ తే మహగ్ఘో, నానారతనచిత్తితో రుచిరో;
యత్థ త్వం నిసిన్నా విరోచసి, దేవరాజారివ నన్దనే వనే.
౬౯౯. ‘‘కిం త్వం పురే సుచరితమాచరీ భద్దే, కిస్స కమ్మస్స విపాకం;
అనుభోసి దేవలోకస్మిం, దేవతే పుచ్ఛితాచిక్ఖ;
కిస్స కమ్మస్సిదం ఫల’’న్తి.
౭౦౦. ‘‘పిణ్డాయ తే చరన్తస్స, మాలం ఫాణితఞ్చ అదదం భన్తే;
తస్స కమ్మస్సిదం విపాకం, అనుభోమి దేవలోకస్మిం.
౭౦౧. ‘‘హోతి చ మే అనుతాపో, అపరద్ధం [అపరాధం (స్యా.)] దుక్ఖితఞ్చ [దుక్కటఞ్చ (సీ.)] మే భన్తే;
సాహం ధమ్మం నాస్సోసిం, సుదేసితం ధమ్మరాజేన.
౭౦౨. ‘‘తం తం వదామి భద్దన్తే, ‘యస్స మే అనుకమ్పియో కోచి;
ధమ్మేసు తం సమాదపేథ’, సుదేసితం ధమ్మరాజేన.
౭౦౩. ‘‘యేసం అత్థి సద్ధా బుద్ధే, ధమ్మే చ సఙ్ఘరతనే;
తే మం అతివిరోచన్తి, ఆయునా యససా సిరియా.
౭౦౪. ‘‘పతాపేన వణ్ణేన ఉత్తరితరా,
అఞ్ఞే మహిద్ధికతరా మయా దేవా’’తి;
పభస్సరవిమానం దుతియం.
౩. నాగవిమానవత్థు
౭౦౫. ‘‘అలఙ్కతా మణికఞ్చనాచితం, సోవణ్ణజాలచితం మహన్తం;
అభిరుయ్హ గజవరం సుకప్పితం, ఇధాగమా వేహాయసం [వేహాసయం (సీ.)] అన్తలిక్ఖే.
౭౦౬. ‘‘నాగస్స దన్తేసు దువేసు నిమ్మితా, అచ్ఛోదకా [అచ్ఛోదికా (సీ. క.)] పదుమినియో సుఫుల్లా;
పదుమేసు చ తురియగణా పభిజ్జరే, ఇమా చ నచ్చన్తి మనోహరాయో.
౭౦౭. ‘‘దేవిద్ధిపత్తాసి మహానుభావే, మనుస్సభూతా కిమకాసి పుఞ్ఞం;
కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.
౭౦౮. ‘‘బారాణసియం ఉపసఙ్కమిత్వా, బుద్ధస్సహం వత్థయుగం అదాసిం;
పాదాని వన్దిత్వా [వన్దిత్వ (సీ.)] ఛమా నిసీదిం, విత్తా చహం అఞ్జలికం అకాసిం.
౭౦౯. ‘‘బుద్ధో చ మే కఞ్చనసన్నిభత్తచో, అదేసయి సముదయదుక్ఖనిచ్చతం;
అసఙ్ఖతం దుక్ఖనిరోధసస్సతం, మగ్గం అదేసయి [అదేసేసి (సీ.)] యతో విజానిసం;
౭౧౦. ‘‘అప్పాయుకీ కాలకతా తతో చుతా, ఉపపన్నా తిదసగణం యసస్సినీ;
సక్కస్సహం అఞ్ఞతరా పజాపతి, యసుత్తరా నామ దిసాసు విస్సుతా’’తి.
నాగవిమానం తతియం.
౪. అలోమవిమానవత్థు
౭౧౧. ‘‘అభిక్కన్తేన వణ్ణేన, యా త్వం తిట్ఠసి దేవతే;
ఓభాసేన్తీ దిసా సబ్బా, ఓసధీ వియ తారకా.
౭౧౨. ‘‘కేన తేతాదిసో వణ్ణో…పే…
వణ్ణో చ తే సబ్బదిసా పభాసతీ’’తి.
౭౧౪. సా దేవతా అత్తమనా…పే… యస్స కమ్మస్సిదం ఫలం.
౭౧౫. ‘‘అహఞ్చ బారాణసియం, బుద్ధస్సాదిచ్చబన్ధునో;
అదాసిం సుక్ఖకుమ్మాసం, పసన్నా సేహి పాణిభి.
౭౧౬. ‘‘సుక్ఖాయ అలోణికాయ చ, పస్స ఫలం కుమ్మాసపిణ్డియా;
అలోమం సుఖితం దిస్వా, కో పుఞ్ఞం న కరిస్సతి.
౭౧౭. ‘‘తేన మేతాదిసో వణ్ణో…పే… వణ్ణో చ మే సబ్బదిసా పభాసతీ’’తి.
అలోమవిమానం చతుత్థం.
౫. కఞ్జికదాయికావిమానవత్థు
౭౧౯. ‘‘అభిక్కన్తేన వణ్ణేన…పే… ఓసధీ వియ తారకా.
౭౨౦. ‘‘కేన తేతాదిసో వణ్ణో…పే…వణ్ణో చ మే సబ్బదిసా పభాసతీ’’తి.
౭౨౨. సా దేవతా అత్తమనా…పే… యస్స కమ్మస్సిదం ఫలం.
౭౨౩. ‘‘అహం అన్ధకవిన్దమ్హి, బుద్ధస్సాదిచ్చబన్ధునో;
అదాసిం కోలసమ్పాకం, కఞ్జికం తేలధూపితం.
౭౨౪. ‘‘పిప్ఫల్యా లసుణేన చ, మిస్సం లామఞ్జకేన చ;
అదాసిం ఉజుభూతస్మిం [ఉజుభూతేసు (క.)], విప్పసన్నేన చేతసా.
౭౨౫. ‘‘యా మహేసిత్తం కారేయ్య, చక్కవత్తిస్స రాజినో;
నారీ సబ్బఙ్గకల్యాణీ, భత్తు చానోమదస్సికా;
ఏకస్స కఞ్జికదానస్స, కలం నాగ్ఘతి సోళసిం.
౭౨౬. ‘‘సతం నిక్ఖా సతం అస్సా, సతం అస్సతరీరథా;
సతం కఞ్ఞాసహస్సాని, ఆముత్తమణికుణ్డలా;
ఏకస్స కఞ్జికదానస్స, కలం నాగ్ఘన్తి సోళసిం.
౭౨౭. ‘‘సతం హేమవతా నాగా, ఈసాదన్తా ఉరూళ్హవా;
సువణ్ణకచ్ఛా మాతఙ్గా, హేమకప్పనవాససా;
ఏకస్స కఞ్జికదానస్స, కలం నాగ్ఘన్తి సోళసిం.
౭౨౮. ‘‘చతున్నమపి దీపానం, ఇస్సరం యోధ కారయే;
ఏకస్స కఞ్జికదానస్స, కలం నాగ్ఘతి సోళసి’’న్తి.
కఞ్జికదాయికావిమానం పఞ్చమం.
౬. విహారవిమానవత్థు
౭౨౯. ‘‘అభిక్కన్తేన వణ్ణేన…పే… ఓసధీ వియ తారకా.
౭౩౦. ‘‘తస్సా తే నచ్చమానాయ, అఙ్గమఙ్గేహి సబ్బసో;
దిబ్బా సద్దా నిచ్ఛరన్తి, సవనీయా మనోరమా.
౭౩౧. ‘‘తస్సా తే నచ్చమానాయ, అఙ్గమఙ్గేహి సబ్బసో;
దిబ్బా గన్ధా పవాయన్తి, సుచిగన్ధా మనోరమా.
౭౩౨. ‘‘వివత్తమానా కాయేన, యా వేణీసు పిళన్ధనా;
తేసం సుయ్యతి నిగ్ఘోసో, తురియే పఞ్చఙ్గికే యథా.
౭౩౩. ‘‘వటంసకా వాతధుతా, వాతేన సమ్పకమ్పితా;
తేసం సుయ్యతి నిగ్ఘోసో, తురియే పఞ్చఙ్గికే యథా.
౭౩౪. ‘‘యాపి తే సిరస్మిం మాలా, సుచిగన్ధా మనోరమా;
వాతి గన్ధో దిసా సబ్బా, రుక్ఖో మఞ్జూసకో యథా.
౭౩౫. ‘‘ఘాయసే తం సుచిగన్ధం, రూపం పస్ససి అమానుసం;
దేవతే పుచ్ఛితాచిక్ఖ, కిస్స కమ్మస్సిదం ఫల’’న్తి.
౭౩౬. ‘‘సావత్థియం మయ్హం సఖీ భదన్తే, సఙ్ఘస్స కారేసి మహావిహారం;
తత్థప్పసన్నా అహమానుమోదిం, దిస్వా అగారఞ్చ పియఞ్చ మేతం.
౭౩౭. ‘‘తాయేవ మే సుద్ధనుమోదనాయ, లద్ధం విమానబ్భుతదస్సనేయ్యం;
సమన్తతో సోళసయోజనాని, వేహాయసం గచ్ఛతి ఇద్ధియా మమ.
౭౩౮. ‘‘కూటాగారా నివేసా మే, విభత్తా భాగసో మితా;
దద్దల్లమానా ఆభన్తి, సమన్తా సతయోజనం.
౭౩౯. ‘‘పోక్ఖరఞ్ఞో చ మే ఏత్థ, పుథులోమనిసేవితా;
అచ్ఛోదకా [అచ్ఛోదికా (సీ.)] విప్పసన్నా, సోణ్ణవాలుకసన్థతా.
౭౪౦. ‘‘నానాపదుమసఞ్ఛన్నా, పుణ్డరీకసమోతతా [పణ్డరీకసమోనతా (సీ.)];
సురభీ సమ్పవాయన్తి, మనుఞ్ఞా మాలుతేరితా.
౭౪౧. ‘‘జమ్బుయో పనసా తాలా, నాళికేరవనాని చ;
అన్తోనివేసనే జాతా, నానారుక్ఖా అరోపిమా.
౭౪౨. ‘‘నానాతూరియసఙ్ఘుట్ఠం, అచ్ఛరాగణఘోసితం;
యోపి మం సుపినే పస్సే, సోపి విత్తో సియా నరో.
౭౪౩. ‘‘ఏతాదిసం అబ్భుతదస్సనేయ్యం, విమానం సబ్బసోపభం;
మమ కమ్మేహి నిబ్బత్తం, అలం పుఞ్ఞాని కాతవే’’తి.
౭౪౪. ‘‘తాయేవ తే సుద్ధనుమోదనాయ, లద్ధం విమానబ్భుతదస్సనేయ్యం;
యా చేవ సా దానమదాసి నారీ, తస్సా గతిం బ్రూహి కుహిం ఉప్పన్నా [ఉపపన్నా (క.)] సా’’తి.
౭౪౫. ‘‘యా సా అహు మయ్హం సఖీ భదన్తే, సఙ్ఘస్స కారేసి మహావిహారం;
విఞ్ఞాతధమ్మా సా అదాసి దానం, ఉప్పన్నా నిమ్మానరతీసు దేవేసు.
౭౪౬. ‘‘పజాపతీ తస్స సునిమ్మితస్స, అచిన్తియా కమ్మవిపాకా తస్స;
యమేతం పుచ్ఛసి కుహిం ఉప్పన్నా [ఉపపన్నా (క.)] సాతి, తం తే వియాకాసిం అనఞ్ఞథా అహం.
౭౪౭. ‘‘తేనహఞ్ఞేపి సమాదపేథ, సఙ్ఘస్స దానాని దదాథ విత్తా;
ధమ్మఞ్చ సుణాథ పసన్నమానసా, సుదుల్లభో లద్ధో మనుస్సలాభో.
౭౪౮. ‘‘యం మగ్గం మగ్గాధిపతీ అదేసయి [మగ్గాధిపత్యదేసయి (సీ.)], బ్రహ్మస్సరో కఞ్చనసన్నిభత్తచో;
సఙ్ఘస్స దానాని దదాథ విత్తా, మహప్ఫలా యత్థ భవన్తి దక్ఖిణా.
౭౪౯. [ఖు. పా. ౬.౬; సు. ని. ౨౨౯] ‘‘యే పుగ్గలా అట్ఠ సతం పసత్థా, చత్తారి ఏతాని యుగాని హోన్తి;
తే దక్ఖిణేయ్యా సుగతస్స సావకా, ఏతేసు దిన్నాని మహప్ఫలాని.
౭౫౦. [వి. వ. ౬౪౧] ‘‘చత్తారో చ పటిపన్నా, చత్తారో చ ఫలే ఠితా;
ఏస సఙ్ఘో ఉజుభూతో, పఞ్ఞాసీలసమాహితో.
౭౫౧. [వి. వ. ౬౪౨] ‘‘యజమానానం మనుస్సానం, పుఞ్ఞపేక్ఖాన పాణినం;
కరోతం ఓపధికం పుఞ్ఞం, సఙ్ఘే దిన్నం మహప్ఫలం.
౭౫౨. [వి. వ. ౬౪౩] ‘‘ఏసో హి సఙ్ఘో విపులో మహగ్గతో, ఏసప్పమేయ్యో ఉదధీవ సాగరో;
ఏతేహి సేట్ఠా నరవీరసావకా, పభఙ్కరా ధమ్మముదీరయన్తి [నత్థేత్థ పాఠభేదో].
౭౫౩. [వి. వ. ౬౪౪] ‘‘తేసం సుదిన్నం సుహుతం సుయిట్ఠం, యే సఙ్ఘముద్దిస్స దదన్తి దానం;
సా దక్ఖిణా సఙ్ఘగతా పతిట్ఠితా, మహప్ఫలా లోకవిదూన [లోకవిదూహి (క.)] వణ్ణితా.
౭౫౪. ‘‘ఏతాదిసం యఞ్ఞమనుస్సరన్తా, యే వేదజాతా విచరన్తి లోకే;
వినేయ్య మచ్ఛేరమలం సమూలం, అనిన్దితా సగ్గముపేన్తి ఠాన’’న్తి.
విహారవిమానం ఛట్ఠం.
భాణవారం దుతియం నిట్ఠితం.
౭. చతురిత్థివిమానవత్థు
౭౫౫. ‘‘అభిక్కన్తేన వణ్ణేన…పే…వణ్ణో చ తే సబ్బదిసా పభాసతీ’’తి.
౭౫౮. సా దేవతా అత్తమనా…పే… యస్స కమ్మస్సిదం ఫలం.
౭౫౯. ‘‘ఇన్దీవరానం హత్థకం అహమదాసిం, భిక్ఖునో పిణ్డాయ చరన్తస్స;
ఏసికానం ఉణ్ణతస్మిం, నగరవరే పణ్ణకతే రమ్మే.
౭౬౦. ‘‘తేన మేతాదిసో వణ్ణో…పే…వణ్ణో చ మే సబ్బదిస్సా పభాసతీ’’తి.
౭౬౨. ‘‘అభిక్కన్తేన వణ్ణేన…పే…వణ్ణో చ తే సబ్బదిసా పభాసతీ’’తి.
౭౬౫. సా దేవతా అత్తమనా…పే… యస్స కమ్మస్సిదం ఫలం.
౭౬౬. ‘‘నీలుప్పలహత్థకం అహమదాసిం, భిక్ఖునో పిణ్డాయ చరన్తస్స;
ఏసికానం ఉణ్ణతస్మిం, నగరవరే పణ్ణకతే రమ్మే.
౭౬౭. ‘‘తేన మేతాదిసో వణ్ణో…పే…వణ్ణో చ మే సబ్బదిసా పభాసతీ’’తి.
౭౬౯. ‘‘అభిక్కన్తేన వణ్ణేన…పే…వణ్ణో చ తే సబ్బదిసా పభాసతీ’’తి.