౯. విసాలక్ఖివిమానవత్థు

౬౬౬. ‘‘కా నామ త్వం విసాలక్ఖి [విసాలక్ఖీ (స్యా.)], రమ్మే చిత్తలతావనే;

సమన్తా అనుపరియాసి, నారీగణపురక్ఖతా [పురక్ఖితా (స్యా. క.)].

౬౬౭. ‘‘యదా దేవా తావతింసా, పవిసన్తి ఇమం వనం;

సయోగ్గా సరథా సబ్బే, చిత్రా హోన్తి ఇధాగతా.

౬౬౮. ‘‘తుయ్హఞ్చ ఇధ పత్తాయ, ఉయ్యానే విచరన్తియా;

కాయే న దిస్సతీ చిత్తం, కేన రూపం తవేదిసం;

దేవతే పుచ్ఛితాచిక్ఖ, కిస్స కమ్మస్సిదం ఫల’’న్తి.

౬౬౯. ‘‘యేన కమ్మేన దేవిన్ద, రూపం మయ్హం గతీ చ మే;

ఇద్ధి చ ఆనుభావో చ, తం సుణోహి పురిన్దద.

౬౭౦. ‘‘అహం రాజగహే రమ్మే, సునన్దా నాముపాసికా;

సద్ధా సీలేన సమ్పన్నా, సంవిభాగరతా సదా.

౬౭౧. ‘‘అచ్ఛాదనఞ్చ భత్తఞ్చ, సేనాసనం పదీపియం;

అదాసిం ఉజుభూతేసు, విప్పసన్నేన చేతసా.

౬౭౨. ‘‘చాతుద్దసిం [చతుద్దసిం (పీ. క.)] పఞ్చదసిం, యా చ పక్ఖస్స అట్ఠమీ;

పాటిహారియపక్ఖఞ్చ, అట్ఠఙ్గసుసమాగతం.

౬౭౩. ‘‘ఉపోసథం ఉపవసిస్సం, సదా సీలేసు సంవుతా;

సఞ్ఞమా సంవిభాగా చ, విమానం ఆవసామహం.

౬౭౪. ‘‘పాణాతిపాతా విరతా, ముసావాదా చ సఞ్ఞతా;

థేయ్యా చ అతిచారా చ, మజ్జపానా చ ఆరకా.

౬౭౫. ‘‘పఞ్చసిక్ఖాపదే రతా, అరియసచ్చాన కోవిదా;

ఉపాసికా చక్ఖుమతో, గోతమస్స యసస్సినో.

౬౭౬. ‘‘తస్సా మే ఞాతికులా దాసీ [ఞాతికులం ఆసీ (స్యా. క.)], సదా మాలాభిహారతి;

తాహం భగవతో థూపే, సబ్బమేవాభిరోపయిం.

౬౭౭. ‘‘ఉపోసథే చహం గన్త్వా, మాలాగన్ధవిలేపనం;

థూపస్మిం అభిరోపేసిం, పసన్నా సేహి పాణిభి.

౬౭౮. ‘‘తేన కమ్మేన దేవిన్ద, రూపం మయ్హం గతీ చ మే;

ఇద్ధీ చ ఆనుభావో చ, యం మాలం అభిరోపయిం.

౬౭౯. ‘‘యఞ్చ సీలవతీ ఆసిం, న తం తావ విపచ్చతి;

ఆసా చ పన మే దేవిన్ద, సకదాగామినీ సియ’’న్తి.

విసాలక్ఖివిమానం నవమం.