౧౦. పారిచ్ఛత్తకవిమానవత్థు

౬౮౦. ‘‘పారిచ్ఛత్తకే కోవిళారే, రమణీయే మనోరమే;

దిబ్బమాలం గన్థమానా, గాయన్తీ సమ్పమోదసి.

౬౮౧. ‘‘తస్సా తే నచ్చమానాయ, అఙ్గమఙ్గేహి సబ్బసో;

దిబ్బా సద్దా నిచ్ఛరన్తి, సవనీయా మనోరమా.

౬౮౨. ‘‘తస్సా తే నచ్చమానాయ, అఙ్గమఙ్గేహి సబ్బసో;

దిబ్బా గన్ధా పవాయన్తి, సుచిగన్ధా మనోరమా.

౬౮౩. ‘‘వివత్తమానా కాయేన, యా వేణీసు పిళన్ధనా.

తేసం సుయ్యతి నిగ్ఘోసో, తూరియే పఞ్చఙ్గికే యథా.

౬౮౪. ‘‘వటంసకా వాతధుతా [వాతధూతా (సీ. స్యా.)], వాతేన సమ్పకమ్పితా;

తేసం సుయ్యతి నిగ్ఘోసో, తూరియే పఞ్చఙ్గికే యథా.

౬౮౫. ‘‘యాపి తే సిరస్మిం మాలా, సుచిగన్ధా మనోరమా;

వాతి గన్ధో దిసా సబ్బా, రుక్ఖో మఞ్జూసకో యథా.

౬౮౬. ‘‘ఘాయసే తం సుచిగన్ధం [సుచిం గన్ధం (సీ.)], రూపం పస్ససి అమానుసం [మానుసం (పీ.)];

దేవతే పుచ్ఛితాచిక్ఖ, కిస్స కమ్మస్సిదం ఫల’’న్తి.

౬౮౭. ‘‘పభస్సరం అచ్చిమన్తం, వణ్ణగన్ధేన సంయుతం;

అసోకపుప్ఫమాలాహం, బుద్ధస్స ఉపనామయిం.

౬౮౮. ‘‘తాహం కమ్మం కరిత్వాన, కుసలం బుద్ధవణ్ణితం;

అపేతసోకా సుఖితా, సమ్పమోదామనామయా’’తి.

పారిచ్ఛత్తకవిమానం దసమం.

పారిచ్ఛత్తకవగ్గో తతియో నిట్ఠితో.

తస్సుద్దానం –

ఉళారో ఉచ్ఛు పల్లఙ్కో, లతా చ గుత్తిలేన చ;

దద్దల్లపేసమల్లికా, విసాలక్ఖి పారిచ్ఛత్తకో;

వగ్గో తేన పవుచ్చతీతి.