౨. లఖుమావిమానవత్థు

౧౭౩. ‘‘అభిక్కన్తేన వణ్ణేన, యా త్వం తిట్ఠసి దేవతే;

ఓభాసేన్తీ దిసా సబ్బా, ఓసధీ వియ తారకా.

౧౭౪. ‘‘కేన తేతాదిసో వణ్ణో, కేన తే ఇధ మిజ్ఝతి;

ఉప్పజ్జన్తి చ తే భోగా, యే కేచి మనసో పియా.

౧౭౫. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;

కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.

౧౭౬. సా దేవతా అత్తమనా, మోగ్గల్లానేన పుచ్ఛితా;

పఞ్హం పుట్ఠా వియాకాసి, యస్స కమ్మస్సిదం ఫలం.

౧౭౭. ‘‘కేవట్టద్వారా నిక్ఖమ్మ, అహు మయ్హం నివేసనం;

తత్థ సఞ్చరమానానం, సావకానం మహేసినం.

౧౭౮. ‘‘ఓదనం కుమ్మాసం [సాకం (సీ.)] డాకం, లోణసోవీరకఞ్చహం;

అదాసిం ఉజుభూతేసు, విప్పసన్నేన చేతసా.

౧౭౯. ‘‘చాతుద్దసిం పఞ్చదసిం, యా చ పక్ఖస్స అట్ఠమీ;

పాటిహారియపక్ఖఞ్చ, అట్ఠఙ్గసుసమాగతం.

౧౮౦. ‘‘ఉపోసథం ఉపవసిస్సం, సదా సీలేసు సంవుతా;

సఞ్ఞమా సంవిభాగా చ, విమానం ఆవసామహం.

౧౮౧. ‘‘పాణాతిపాతా విరతా, ముసావాదా చ సఞ్ఞతా;

థేయ్యా చ అతిచారా చ, మజ్జపానా చ ఆరకా.

౧౮౨. ‘‘పఞ్చసిక్ఖాపదే రతా, అరియసచ్చాన కోవిదా;

ఉపాసికా చక్ఖుమతో, గోతమస్స యసస్సినో.

౧౮౩. ‘‘తేన మేతాదిసో వణ్ణో…పే… వణ్ణో చ మే సబ్బదిసా పభాసతీతి.

‘‘మమ చ, భన్తే, వచనేన భగవతో పాదే సిరసా వన్దేయ్యాసి – ‘లఖుమా నామ,భన్తే,ఉపాసికా భగవతో పాదే సిరసా వన్దతీ’తి. అనచ్ఛరియం ఖో పనేతం, భన్తే, యం మం భగవా అఞ్ఞతరస్మిం సామఞ్ఞఫలే బ్యాకరేయ్య [బ్యాకరేయ్యాతి (?)]. తం భగవా సకదాగామిఫలే బ్యాకాసీ’’తి.

లఖుమావిమానం దుతియం.