౩. ఆచామదాయికావిమానవత్థు

౧౮౫. ‘‘పిణ్డాయ తే చరన్తస్స, తుణ్హీభూతస్స తిట్ఠతో;

దలిద్దా కపణా నారీ, పరాగారం అపస్సితా [అవస్సితా (సీ.)].

౧౮౬. ‘‘యా తే అదాసి ఆచామం, పసన్నా సేహి పాణిభి;

సా హిత్వా మానుసం దేహం, కం ను సా దిసతం గతా’’తి.

౧౮౭. ‘‘పిణ్డాయ మే చరన్తస్స, తుణ్హీభూతస్స తిట్ఠతో;

దలిద్దా కపణా నారీ, పరాగారం అపస్సితా.

౧౮౮. ‘‘యా మే అదాసి ఆచామం, పసన్నా సేహి పాణిభి;

సా హిత్వా మానుసం దేహం, విప్పముత్తా ఇతో చుతా.

౧౮౯. ‘‘నిమ్మానరతినో నామ, సన్తి దేవా మహిద్ధికా;

తత్థ సా సుఖితా నారీ, మోదతాచామదాయికా’’తి.

౧౯౦. ‘‘అహో దానం వరాకియా, కస్సపే సుప్పతిట్ఠితం;

పరాభతేన దానేన, ఇజ్ఝిత్థ వత దక్ఖిణా.

౧౯౧. ‘‘యా మహేసిత్తం కారేయ్య, చక్కవత్తిస్స రాజినో;

నారీ సబ్బఙ్గకల్యాణీ, భత్తు చానోమదస్సికా;

ఏతస్సాచామదానస్స, కలం నాగ్ఘతి సోళసిం.

౧౯౨. ‘‘సతం నిక్ఖా సతం అస్సా, సతం అస్సతరీరథా;

సతం కఞ్ఞాసహస్సాని, ఆముత్తమణికుణ్డలా;

ఏతస్సాచామదానస్స, కలం నాగ్ఘన్తి సోళసిం.

౧౯౩. ‘‘సతం హేమవతా నాగా, ఈసాదన్తా ఉరూళ్హవా;

సువణ్ణకచ్ఛా మాతఙ్గా, హేమకప్పనవాససా [హేమకప్పనివాససా (స్యా. క.)];

ఏతస్సాచామదానస్స, కలం నాగ్ఘతి సోళసిం.

౧౯౪. ‘‘చతున్నమపి దీపానం, ఇస్సరం యోధ కారయే;

ఏతస్సాచామదానస్స, కలం నాగ్ఘతి సోళసి’’న్తి.

ఆచామదాయికావిమానం తతియం.