౮. తతియనావావిమానవత్థు

౬౩. ‘‘సువణ్ణచ్ఛదనం నావం, నారి ఆరుయ్హ తిట్ఠసి;

ఓగాహసి పోక్ఖరణిం, పద్మం ఛిన్దసి పాణినా.

౬౪. ‘‘కూటాగారా నివేసా తే, విభత్తా భాగసో మితా;

దద్దల్లమానా [దద్దళ్హమానా (క.)] ఆభన్తి, సమన్తా చతురో దిసా.

౬౫. ‘‘కేన తేతాదిసో వణ్ణో, కేన తే ఇధ మిజ్ఝతి;

ఉప్పజ్జన్తి చ తే భోగా, యే కేచి మనసో పియా.

౬౬. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;

కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.

౬౭. సా దేవతా అత్తమనా, సమ్బుద్ధేనేవ పుచ్ఛితా;

పఞ్హం పుట్ఠా వియాకాసి, యస్స కమ్మస్సిదం ఫలం.

౬౮. ‘‘అహం మనుస్సేసు మనుస్సభూతా, పురిమాయ జాతియా మనుస్సలోకే;

దిస్వాన భిక్ఖూ తసితే కిలన్తే, ఉట్ఠాయ పాతుం ఉదకం అదాసిం.

౬౯. ‘‘యో వే కిలన్తాన పిపాసితానం, ఉట్ఠాయ పాతుం ఉదకం దదాతి;

సీతోదకా తస్స భవన్తి నజ్జో, పహూతమల్యా బహుపుణ్డరీకా.

౭౦. ‘‘తం ఆపగా అనుపరియన్తి సబ్బదా, సీతోదకా వాలుకసన్థతా నదీ;

అమ్బా చ సాలా తిలకా చ జమ్బుయో, ఉద్దాలకా పాటలియో చ ఫుల్లా.

౭౧. ‘‘తం భూమిభాగేహి ఉపేతరూపం, విమానసేట్ఠం భుససోభమానం;

తస్సీధ కమ్మస్స అయం విపాకో, ఏతాదిసం పుఞ్ఞకతా లభన్తి.

౭౨. ‘‘కూటాగారా నివేసా మే, విభత్తా భాగసో మితా;

దద్దల్లమానా ఆభన్తి, సమన్తా చతురో దిసా.

౭౩. ‘‘తేన మేతాదిసో వణ్ణో, తేన మే ఇధ మిజ్ఝతి;

ఉప్పజ్జన్తి చ మే భోగా, యే కేచి మనసో పియా.

౭౪. ‘‘అక్ఖామి తే బుద్ధ మహానుభావ, మనుస్సభూతా యమకాసి పుఞ్ఞం;

తేనమ్హి ఏవం జలితానుభావా, వణ్ణో చ మే సబ్బదిసా పభాసతి;

ఏతస్స కమ్మస్స ఫలం మమేదం, అత్థాయ బుద్ధో ఉదకం అపాయీ’’తి [అపాసీతి (సీ. స్యా. పీ.)].

తతియనావావిమానం అట్ఠమం.