౯. దీపవిమానవత్థు

౭౫. ‘‘అభిక్కన్తేన వణ్ణేన, యా త్వం తిట్ఠసి దేవతే;

ఓభాసేన్తీ దిసా సబ్బా, ఓసధీ వియ తారకా.

౭౬. ‘‘కేన తేతాదిసో వణ్ణో, కేన తే ఇధ మిజ్ఝతి;

ఉప్పజ్జన్తి చ తే భోగా, యే కేచి మనసో పియా.

౭౭. ‘‘కేన త్వం విమలోభాసా, అతిరోచసి దేవతా [దేవతే (బహూసు) ౮౩ విస్సజ్జనగాథాయ సంసన్దేతబ్బం];

కేన తే సబ్బగత్తేహి, సబ్బా ఓభాసతే దిసా.

౭౮. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;

కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.

౭౯. సా దేవతా అత్తమనా, మోగ్గల్లానేన పుచ్ఛితా;

పఞ్హం పుట్ఠా వియాకాసి, యస్స కమ్మస్సిదం ఫలం.

౮౦. ‘‘అహం మనుస్సేసు మనుస్సభూతా, పురిమాయ జాతియా మనుస్సలోకే;

తమన్ధకారమ్హి తిమీసికాయం, పదీపకాలమ్హి అదాసి దీపం [అదం పదీపం (సీ. స్యా. పీ.)].

౮౧. ‘‘యో అన్ధకారమ్హి తిమీసికాయం, పదీపకాలమ్హి దదాతి దీపం;

ఉప్పజ్జతి జోతిరసం విమానం, పహూతమల్యం బహుపుణ్డరీకం.

౮౨. ‘‘తేన మేతాదిసో వణ్ణో, తేన మే ఇధ మిజ్ఝతి;

ఉప్పజ్జన్తి చ మే భోగా, యే కేచి మనసో పియా.

౮౩. ‘‘తేనాహం విమలోభాసా, అతిరోచామి దేవతా;

తేన మే సబ్బగత్తేహి, సబ్బా ఓభాసతే దిసా.

౮౪. ‘‘అక్ఖామి తే భిక్ఖు మహానుభావ, మనుస్సభూతా యమకాసి పుఞ్ఞం;

తేనమ్హి ఏవం జలితానుభావా, వణ్ణో చ మే సబ్బదిసా పభాసతీ’’తి.

దీపవిమానం నవమం.