౧. పీఠవగ్గో
౧. పఠమపీఠవిమానవత్థు
౧. ‘‘పీఠం తే సోవణ్ణమయం ఉళారం, మనోజవం గచ్ఛతి యేనకామం;
అలఙ్కతే మల్యధరే [మాల్యధరే (స్యా.)] సువత్థే, ఓభాససి విజ్జురివబ్భకూటం.
౨. ‘‘కేన తేతాదిసో వణ్ణో, కేన తే ఇధ మిజ్ఝతి;
ఉప్పజ్జన్తి చ తే భోగా, యే కేచి మనసో పియా.
౩. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;
కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.
౪. సా దేవతా అత్తమనా, మోగ్గల్లానేన [మోగ్గలానేన (క.) ఏవముపరిపి] పుచ్ఛితా;
పఞ్హం పుట్ఠా వియాకాసి, యస్స కమ్మస్సిదం ఫలం.
౫. ‘‘అహం మనుస్సేసు మనుస్సభూతా, అబ్భాగతానాసనకం అదాసిం;
అభివాదయిం అఞ్జలికం అకాసిం, యథానుభావఞ్చ అదాసి దానం.
౬. ‘‘తేన మేతాదిసో వణ్ణో, తేన మే ఇధ మిజ్ఝతి;
ఉప్పజ్జన్తి చ మే భోగా, యే కేచి మనసో పియా.
౭. ‘‘అక్ఖామి తే భిక్ఖు మహానుభావ, మనుస్సభూతా యమకాసి పుఞ్ఞం;
తేనమ్హి ఏవం జలితానుభావా, వణ్ణో చ మే సబ్బదిసా పభాసతీ’’తి.
పఠమపీఠవిమానం పఠమం.
౨. దుతియపీఠవిమానవత్థు
౮. ‘‘పీఠం తే వేళురియమయం ఉళారం, మనోజవం గచ్ఛతి యేనకామం;
అలఙ్కతే మల్యధరే సువత్థే, ఓభాససి విజ్జురివబ్భకూటం.
౯. ‘‘కేన తేతాదిసో వణ్ణో, కేన తే ఇధ మిజ్ఝతి;
ఉప్పజ్జన్తి చ తే భోగా, యే కేచి మనసో పియా.
౧౦. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;
కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.
౧౧. సా దేవతా అత్తమనా, మోగ్గల్లానేన పుచ్ఛితా;
పఞ్హం పుట్ఠా వియాకాసి, యస్స కమ్మస్సిదం ఫలం.
౧౨. ‘‘అహం మనుస్సేసు మనుస్సభూతా, అబ్భాగతానాసనకం అదాసిం;
అభివాదయిం అఞ్జలికం అకాసిం, యథానుభావఞ్చ అదాసి దానం.
౧౩. ‘‘తేన మేతాదిసో వణ్ణో, తేన మే ఇధ మిజ్ఝతి;
ఉప్పజ్జన్తి చ మే భోగా, యే కేచి మనసో పియా.
౧౪. ‘‘అక్ఖామి తే భిక్ఖు మహానుభావ, మనుస్సభూతా యమకాసి పుఞ్ఞం;
తేనమ్హి ఏవం జలితానుభావా, వణ్ణో చ మే సబ్బదిసా పభాసతీ’’తి.
దుతియపీఠవిమానం దుతియం.
౩. తతియపీఠవిమానవత్థు
౧౫. ‘‘పీఠం తే సోవణ్ణమయం ఉళారం, మనోజవం గచ్ఛతి యేనకామం;
అలఙ్కతే మల్యధరే సువత్థే, ఓభాససి విజ్జురివబ్భకూటం.
౧౬. ‘‘కేన తేతాదిసో వణ్ణో, కేన తే ఇధ మిజ్ఝతి;
ఉప్పజ్జన్తి చ తే భోగా, యే కేచి మనసో పియా.
౧౭. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;
కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.
౧౮. సా దేవతా అత్తమనా, మోగ్గల్లానేన పుచ్ఛితా;
పఞ్హం పుట్ఠా వియాకాసి, యస్స కమ్మస్సిదం ఫలం.
౧౯. ‘‘అప్పస్స కమ్మస్స ఫలం మమేదం [మమేతం (క.)], యేనమ్హి [తేనమ్హి (క.)] ఏవం జలితానుభావా;
అహం మనుస్సేసు మనుస్సభూతా, పురిమాయ జాతియా మనుస్సలోకే.
౨౦. ‘‘అద్దసం విరజం భిక్ఖుం, విప్పసన్నమనావిలం;
తస్స అదాసహం పీఠం, పసన్నా సేహి పాణిభి.
౨౧. ‘‘తేన మేతాదిసో వణ్ణో, తేన మే ఇధ మిజ్ఝతి;
ఉప్పజ్జన్తి చ మే భోగా, యే కేచి మనసో పియా.
౨౨. ‘‘అక్ఖామి తే భిక్ఖు మహానుభావ, మనుస్సభూతా యమకాసి పుఞ్ఞం;
తేనమ్హి ఏవం జలితానుభావా, వణ్ణో చ మే సబ్బదిసా పభాసతీ’’తి.
తతియపీఠవిమానం తతియం.
౪. చతుత్థపీఠవిమానవత్థు
౨౩. ‘‘పీఠం తే వేళురియమయం ఉళారం, మనోజవం గచ్ఛతి యేనకామం;
అలఙ్కతే మల్యధరే సువత్థే, ఓభాససి విజ్జురివబ్భకూటం.
౨౪. ‘‘కేన తేతాదిసో వణ్ణో, కేన తే ఇధ మిజ్ఝతి;
ఉప్పజ్జన్తి చ తే భోగా, యే కేచి మనసో పియా.
౨౫. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;
కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.
౨౬. సా దేవతా అత్తమనా, మోగ్గల్లానేన పుచ్ఛితా;
పఞ్హం పుట్ఠా వియాకాసి, యస్స కమ్మస్సిదం ఫలం.
౨౭. ‘‘అప్పస్స కమ్మస్స ఫలం మమేదం, యేనమ్హి ఏవం జలితానుభావా;
అహం మనుస్సేసు మనుస్సభూతా, పురిమాయ జాతియా మనుస్సలోకే.
౨౮. ‘‘అద్దసం విరజం భిక్ఖుం, విప్పసన్నమనావిలం;
తస్స అదాసహం పీఠం, పసన్నా సేహి పాణిభి.
౨౯. ‘‘తేన మేతాదిసో వణ్ణో, తేన మే ఇధ మిజ్ఝతి;
ఉప్పజ్జన్తి చ మే భోగా, యే కేచి మనసో పియా.
౩౦. ‘‘అక్ఖామి తే భిక్ఖు మహానుభావ, మనుస్సభూతా యమకాసి పుఞ్ఞం;
తేనమ్హి ఏవం జలితానుభావా, వణ్ణో చ మే సబ్బదిసా పభాసతీ’’తి.
చతుత్థపీఠవిమానం చతుత్థం.
౫. కుఞ్జరవిమానవత్థు
౩౧. ‘‘కుఞ్జరో తే వరారోహో, నానారతనకప్పనో;
రుచిరో థామవా జవసమ్పన్నో, ఆకాసమ్హి సమీహతి.
౩౨. ‘‘పదుమి పద్మ [పదుమ… (సీ. స్యా.) ఏవముపరిపి] పత్తక్ఖి, పద్ముప్పలజుతిన్ధరో;
పద్మచుణ్ణాభికిణ్ణఙ్గో, సోణ్ణపోక్ఖరమాలధా [… మాలవా (సీ. స్యా.)].
౩౩. ‘‘పదుమానుసటం మగ్గం, పద్మపత్తవిభూసితం.
ఠితం వగ్గుమనుగ్ఘాతీ, మితం గచ్ఛతి వారణో.
౩౪. ‘‘తస్స పక్కమమానస్స, సోణ్ణకంసా రతిస్సరా;
తేసం సుయ్యతి నిగ్ఘోసో, తురియే పఞ్చఙ్గికే యథా.
౩౫. ‘‘తస్స నాగస్స ఖన్ధమ్హి, సుచివత్థా అలఙ్కతా;
మహన్తం అచ్ఛరాసఙ్ఘం, వణ్ణేన అతిరోచసి.
౩౬. ‘‘దానస్స తే ఇదం ఫలం, అథో సీలస్స వా పన;
అథో అఞ్జలికమ్మస్స, తం మే అక్ఖాహి పుచ్ఛితా’’తి;
౩౭. సా దేవతా అత్తమనా, మోగ్గల్లానేన పుచ్ఛితా;
పఞ్హం పుట్ఠా వియాకాసి, యస్స కమ్మస్సిదం ఫలం.
౩౮. ‘‘దిస్వాన గుణసమ్పన్నం, ఝాయిం ఝానరతం సతం;
అదాసిం పుప్ఫాభికిణ్ణం, ఆసనం దుస్ససన్థతం.
౩౯. ‘‘ఉపడ్ఢం పద్మమాలాహం, ఆసనస్స సమన్తతో;
అబ్భోకిరిస్సం పత్తేహి, పసన్నా సేహి పాణిభి.
౪౦. ‘‘తస్స కమ్మకుసలస్స [కమ్మస్స కుసలస్స (సీ. పీ.)], ఇదం మే ఈదిసం ఫలం;
సక్కారో గరుకారో చ, దేవానం అపచితా అహం.
౪౧. ‘‘యో వే సమ్మావిముత్తానం, సన్తానం బ్రహ్మచారినం;
పసన్నో ఆసనం దజ్జా, ఏవం నన్దే యథా అహం.
౪౨. ‘‘తస్మా హి అత్తకామేన [అత్థకామేన (క.)], మహత్తమభికఙ్ఖతా;
ఆసనం దాతబ్బం హోతి, సరీరన్తిమధారిన’’న్తి.
కుఞ్జరవిమానం పఞ్చమం.
౬. పఠమనావావిమానవత్థు
౪౩. ‘‘సువణ్ణచ్ఛదనం నావం, నారి ఆరుయ్హ తిట్ఠసి;
ఓగాహసి పోక్ఖరణిం, పద్మం [పదుమం (సీ. స్యా.)] ఛిన్దసి పాణినా.
౪౪. ‘‘కేన తేతాదిసో వణ్ణో, కేన తే ఇధ మిజ్ఝతి;
ఉప్పజ్జన్తి చ తే భోగా, యే కేచి మనసో పియా.
౪౫. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;
కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.
౪౬. సా దేవతా అత్తమనా, మోగ్గల్లానేన పుచ్ఛితా;
పఞ్హం పుట్ఠా వియాకాసి, యస్స కమ్మస్సిదం ఫలం.
౪౭. ‘‘అహం మనుస్సేసు మనుస్సభూతా, పురిమాయ జాతియా మనుస్సలోకే;
దిస్వాన భిక్ఖూ తసితే కిలన్తే, ఉట్ఠాయ పాతుం ఉదకం అదాసిం.
౪౮. ‘‘యో వే కిలన్తాన పిపాసితానం, ఉట్ఠాయ పాతుం ఉదకం దదాతి;
సీతోదకా [సీతోదికా (సీ.)] తస్స భవన్తి నజ్జో, పహూతమల్యా బహుపుణ్డరీకా.
౪౯. ‘‘తం ఆపగా [తమాపగా (సీ. క.)] అనుపరియన్తి సబ్బదా, సీతోదకా వాలుకసన్థతా నదీ;
అమ్బా చ సాలా తిలకా చ జమ్బుయో, ఉద్దాలకా పాటలియో చ ఫుల్లా.
౫౦. ‘‘తం భూమిభాగేహి ఉపేతరూపం, విమానసేట్ఠం భుససోభమానం;
తస్సీధ [తస్సేవ (స్యా.)] కమ్మస్స అయం విపాకో, ఏతాదిసం పుఞ్ఞకతా [కతపుఞ్ఞా (సీ.)] లభన్తి.
౫౧. ‘‘తేన మేతాదిసో వణ్ణో, తేన మే ఇధ మిజ్ఝతి;
ఉప్పజ్జన్తి చ మే భోగా, యే కేచి మనసో పియా.
౫౨. ‘‘అక్ఖామి తే భిక్ఖు మహానుభావ, మనుస్సభూతా యమకాసి పుఞ్ఞం;
తేనమ్హి ఏవం జలితానుభావా, వణ్ణో చ మే సబ్బదిసా పభాసతీ’’తి.
పఠమనావావిమానం ఛట్ఠం.
౭. దుతియనావావిమానవత్థు
౫౩. ‘‘సువణ్ణచ్ఛదనం నావం, నారి ఆరుయ్హ తిట్ఠసి;
ఓగాహసి పోక్ఖరణిం, పద్మం ఛిన్దసి పాణినా.
౫౪. ‘‘కేన తేతాదిసో వణ్ణో, కేన తే ఇధ మిజ్ఝతి;
ఉప్పజ్జన్తి చ తే భోగా, యే కేచి మనసో పియా.
౫౫. ‘‘పుచ్ఛామి తం దేవి మహానుభావే, మనుస్సభుతా కిమకాసి పుఞ్ఞం;
కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.
౫౬. సా దేవతా అత్తమనా, మోగ్గల్లానేన పుచ్ఛితా;
పఞ్హం పుట్ఠా వియాకాసి, యస్స కమ్మస్సిదం ఫలం.
౫౭. ‘‘అహం మనుస్సేసు మనుస్సభూతా, పురిమాయ జాతియా మనుస్సలోకే;
దిస్వాన భిక్ఖుం తసితం కిలన్తం, ఉట్ఠాయ పాతుం ఉదకం అదాసిం.
౫౮. ‘‘యో వే కిలన్తస్స పిపాసితస్స, ఉట్ఠాయ పాతుం ఉదకం దదాతి;
సీతోదకా తస్స భవన్తి నజ్జో, పహూతమల్యా బహుపుణ్డరీకా.
౫౯. ‘‘తం ఆపగా అనుపరియన్తి సబ్బదా, సీతోదకా వాలుకసన్థతా నదీ;
అమ్బా చ సాలా తిలకా చ జమ్బుయో, ఉద్దాలకా పాటలియో చ ఫుల్లా.
౬౦. ‘‘తం భూమిభాగేహి ఉపేతరూపం, విమానసేట్ఠం భుససోభమానం;
తస్సీధ కమ్మస్స అయం విపాకో, ఏతాదిసం పుఞ్ఞకతా లభన్తి.
౬౧. ‘‘తేన మేతాదిసో వణ్ణో, తేన మే ఇధ మిజ్ఝతి;
ఉప్పజ్జన్తి చ మే భోగా, యే కేచి మనసో పియా.
౬౨. ‘‘అక్ఖామి తే భిక్ఖు మహానుభావ, మనుస్సభూతా యమకాసి పుఞ్ఞం;
తేనమ్హి ఏవం జలితానుభావా, వణ్ణో చ మే సబ్బదిసా పభాసతీ’’తి.
దుతియనావావిమానం సత్తమం.
౮. తతియనావావిమానవత్థు
౬౩. ‘‘సువణ్ణచ్ఛదనం నావం, నారి ఆరుయ్హ తిట్ఠసి;
ఓగాహసి పోక్ఖరణిం, పద్మం ఛిన్దసి పాణినా.
౬౪. ‘‘కూటాగారా నివేసా తే, విభత్తా భాగసో మితా;
దద్దల్లమానా [దద్దళ్హమానా (క.)] ఆభన్తి, సమన్తా చతురో దిసా.
౬౫. ‘‘కేన తేతాదిసో వణ్ణో, కేన తే ఇధ మిజ్ఝతి;
ఉప్పజ్జన్తి చ తే భోగా, యే కేచి మనసో పియా.
౬౬. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;
కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.
౬౭. సా దేవతా అత్తమనా, సమ్బుద్ధేనేవ పుచ్ఛితా;
పఞ్హం పుట్ఠా వియాకాసి, యస్స కమ్మస్సిదం ఫలం.