౨. దుతియపీఠవిమానవత్థు

౮. ‘‘పీఠం తే వేళురియమయం ఉళారం, మనోజవం గచ్ఛతి యేనకామం;

అలఙ్కతే మల్యధరే సువత్థే, ఓభాససి విజ్జురివబ్భకూటం.

౯. ‘‘కేన తేతాదిసో వణ్ణో, కేన తే ఇధ మిజ్ఝతి;

ఉప్పజ్జన్తి చ తే భోగా, యే కేచి మనసో పియా.

౧౦. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;

కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.

౧౧. సా దేవతా అత్తమనా, మోగ్గల్లానేన పుచ్ఛితా;

పఞ్హం పుట్ఠా వియాకాసి, యస్స కమ్మస్సిదం ఫలం.

౧౨. ‘‘అహం మనుస్సేసు మనుస్సభూతా, అబ్భాగతానాసనకం అదాసిం;

అభివాదయిం అఞ్జలికం అకాసిం, యథానుభావఞ్చ అదాసి దానం.

౧౩. ‘‘తేన మేతాదిసో వణ్ణో, తేన మే ఇధ మిజ్ఝతి;

ఉప్పజ్జన్తి చ మే భోగా, యే కేచి మనసో పియా.

౧౪. ‘‘అక్ఖామి తే భిక్ఖు మహానుభావ, మనుస్సభూతా యమకాసి పుఞ్ఞం;

తేనమ్హి ఏవం జలితానుభావా, వణ్ణో చ మే సబ్బదిసా పభాసతీ’’తి.

దుతియపీఠవిమానం దుతియం.