౩. తతియపీఠవిమానవత్థు

౧౫. ‘‘పీఠం తే సోవణ్ణమయం ఉళారం, మనోజవం గచ్ఛతి యేనకామం;

అలఙ్కతే మల్యధరే సువత్థే, ఓభాససి విజ్జురివబ్భకూటం.

౧౬. ‘‘కేన తేతాదిసో వణ్ణో, కేన తే ఇధ మిజ్ఝతి;

ఉప్పజ్జన్తి చ తే భోగా, యే కేచి మనసో పియా.

౧౭. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;

కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.

౧౮. సా దేవతా అత్తమనా, మోగ్గల్లానేన పుచ్ఛితా;

పఞ్హం పుట్ఠా వియాకాసి, యస్స కమ్మస్సిదం ఫలం.

౧౯. ‘‘అప్పస్స కమ్మస్స ఫలం మమేదం [మమేతం (క.)], యేనమ్హి [తేనమ్హి (క.)] ఏవం జలితానుభావా;

అహం మనుస్సేసు మనుస్సభూతా, పురిమాయ జాతియా మనుస్సలోకే.

౨౦. ‘‘అద్దసం విరజం భిక్ఖుం, విప్పసన్నమనావిలం;

తస్స అదాసహం పీఠం, పసన్నా సేహి పాణిభి.

౨౧. ‘‘తేన మేతాదిసో వణ్ణో, తేన మే ఇధ మిజ్ఝతి;

ఉప్పజ్జన్తి చ మే భోగా, యే కేచి మనసో పియా.

౨౨. ‘‘అక్ఖామి తే భిక్ఖు మహానుభావ, మనుస్సభూతా యమకాసి పుఞ్ఞం;

తేనమ్హి ఏవం జలితానుభావా, వణ్ణో చ మే సబ్బదిసా పభాసతీ’’తి.

తతియపీఠవిమానం తతియం.