౧౭. కేసకారీవిమానవత్థు

౧౫౦. ‘‘ఇదం విమానం రుచిరం పభస్సరం, వేళురియథమ్భం సతతం సునిమ్మితం;

సువణ్ణరుక్ఖేహి సమన్తమోత్థతం, ఠానం మమం కమ్మవిపాకసమ్భవం.

౧౫౧. ‘‘తత్రూపపన్నా పురిమచ్ఛరా ఇమా, సతం సహస్సాని సకేన కమ్మునా;

తువంసి అజ్ఝుపగతా యసస్సినీ, ఓభాసయం తిట్ఠసి పుబ్బదేవతా.

౧౫౨. ‘‘ససీ అధిగ్గయ్హ యథా విరోచతి, నక్ఖత్తరాజారివ తారకాగణం;

తథేవ త్వం అచ్ఛరాసఙ్గణం [అచ్ఛరాసఙ్గమం (సీ.)] ఇమం, దద్దల్లమానా యససా విరోచసి.

౧౫౩. ‘‘కుతో ను ఆగమ్మ అనోమదస్సనే, ఉపపన్నా త్వం భవనం మమం ఇదం;

బ్రహ్మంవ దేవా తిదసా సహిన్దకా, సబ్బే న తప్పామసే దస్సనేన త’’న్తి.

౧౫౪. ‘‘యమేతం సక్క అనుపుచ్ఛసే మమం, ‘కుతో చుతా త్వం ఇధ ఆగతా’తి [కుతో చుతా ఇధ ఆగతా తువం (స్యా.), కుతో చుతాయ ఆగతి తవ (పీ.)];

బారాణసీ నామ పురత్థి కాసినం, తత్థ అహోసిం పురే కేసకారికా.

౧౫౫. ‘‘బుద్ధే చ ధమ్మే చ పసన్నమానసా, సఙ్ఘే చ ఏకన్తగతా అసంసయా;

అఖణ్డసిక్ఖాపదా ఆగతప్ఫలా, సమ్బోధిధమ్మే నియతా అనామయా’’తి.

౧౫౬. ‘‘తన్త్యాభినన్దామసే స్వాగతఞ్చ [సాగతఞ్చ (సీ.)] తే, ధమ్మేన చ త్వం యససా విరోచసి;

బుద్ధే చ ధమ్మే చ పసన్నమానసే, సఙ్ఘే చ ఏకన్తగతే అసంసయే;

అఖణ్డసిక్ఖాపదే ఆగతప్ఫలే, సమ్బోధిధమ్మే నియతే అనామయే’’తి.

కేసకారీవిమానం సత్తరసమం.

పీఠవగ్గో పఠమో నిట్ఠితో.

తస్సుద్దానం –

పఞ్చ పీఠా తయో నావా, దీపతిలదక్ఖిణా ద్వే;

పతి ద్వే సుణిసా ఉత్తరా, సిరిమా కేసకారికా;

వగ్గో తేన పవుచ్చతీతి.