౧౬. సిరిమావిమానవత్థు

౧౩౭. ‘‘యుత్తా చ తే పరమఅలఙ్కతా హయా, అధోముఖా అఘసిగమా బలీ జవా;

అభినిమ్మితా పఞ్చరథాసతా చ తే, అన్వేన్తి తం సారథిచోదితా హయా.

౧౩౮. ‘‘సా తిట్ఠసి రథవరే అలఙ్కతా, ఓభాసయం జలమివ జోతి పావకో;

పుచ్ఛామి తం వరతను [వరచారు (కత్థచి)] అనోమదస్సనే, కస్మా ను కాయా అనధివరం ఉపాగమి.

౧౩౯. ‘‘కామగ్గపత్తానం యమాహునుత్తరం [… నుత్తరా (క.), అనుత్తరా (స్యా.)], నిమ్మాయ నిమ్మాయ రమన్తి దేవతా;

తస్మా కాయా అచ్ఛరా కామవణ్ణినీ, ఇధాగతా అనధివరం నమస్సితుం.

౧౪౦. ‘‘కిం త్వం పురే సుచరితమాచరీధ [సుచరితం అచారిధ (పీ.)],

కేనచ్ఛసి త్వం అమితయసా సుఖేధితా;

ఇద్ధీ చ తే అనధివరా విహఙ్గమా,

వణ్ణో చ తే దస దిసా విరోచతి.

౧౪౧. ‘‘దేవేహి త్వం పరివుతా సక్కతా చసి,

కుతో చుతా సుగతిగతాసి దేవతే;

కస్స వా త్వం వచనకరానుసాసనిం,

ఆచిక్ఖ మే త్వం యది బుద్ధసావికా’’తి.

౧౪౨. ‘‘నగన్తరే నగరవరే సుమాపితే, పరిచారికా రాజవరస్స సిరిమతో;

నచ్చే గీతే పరమసుసిక్ఖితా అహుం, సిరిమాతి మం రాజగహే అవేదింసు [అవేదిసుం (?)].

౧౪౩. ‘‘బుద్ధో చ మే ఇసినిసభో వినాయకో, అదేసయీ సముదయదుక్ఖనిచ్చతం;

అసఙ్ఖతం దుక్ఖనిరోధసస్సతం, మగ్గఞ్చిమం అకుటిలమఞ్జసం సివం.

౧౪౪. ‘‘సుత్వానహం అమతపదం అసఙ్ఖతం, తథాగతస్సనధివరస్స సాసనం;

సీలేస్వహం పరమసుసంవుతా అహుం, ధమ్మే ఠితా నరవరబుద్ధదేసితే [భాసితే (సీ.)].

౧౪౫. ‘‘ఞత్వానహం విరజపదం అసఙ్ఖతం, తథాగతేననధివరేన దేసితం;

తత్థేవహం సమథసమాధిమాఫుసిం, సాయేవ మే పరమనియామతా అహు.

౧౪౬. ‘‘లద్ధానహం అమతవరం విసేసనం, ఏకంసికా అభిసమయే విసేసియ;

అసంసయా బహుజనపూజితా అహం, ఖిడ్డారతిం [ఖిడ్డం రతిం (స్యా. పీ.)] పచ్చనుభోమనప్పకం.

౧౪౭. ‘‘ఏవం అహం అమతదసమ్హి [అమతరసమ్హి (క.)] దేవతా, తథాగతస్సనధివరస్స సావికా;

ధమ్మద్దసా పఠమఫలే పతిట్ఠితా, సోతాపన్నా న చ పన మత్థి దుగ్గతి.

౧౪౮. ‘‘సా వన్దితుం అనధివరం ఉపాగమిం, పాసాదికే కుసలరతే చ భిక్ఖవో;

నమస్సితుం సమణసమాగమం సివం, సగారవా సిరిమతో ధమ్మరాజినో.

౧౪౯. ‘‘దిస్వా మునిం ముదితమనమ్హి పీణితా, తథాగతం నరవరదమ్మసారథిం;

తణ్హచ్ఛిదం కుసలరతం వినాయకం, వన్దామహం పరమహితానుకమ్పక’’న్తి.

సిరిమావిమానం సోళసమం.