౧౫. ఉత్తరావిమానవత్థు

౧౨౪. ‘‘అభిక్కన్తేన వణ్ణేన, యా త్వం తిట్ఠసి దేవతే;

ఓభాసేన్తీ దిసా సబ్బా, ఓసధీ వియ తారకా.

౧౨౫. ‘‘కేన తేతాదిసో వణ్ణో, కేన తే ఇధ మిజ్ఝతి;

ఉప్పజ్జన్తి చ తే భోగా, యే కేచి మనసో పియా.

౧౨౬. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;

కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.

౧౨౭. సా దేవతా అత్తమనా, మోగ్గల్లానేన పుచ్ఛితా;

పఞ్హం పుట్ఠా వియాకాసి, యస్స కమ్మస్సిదం ఫలం.

౧౨౮. ‘‘ఇస్సా చ మచ్ఛేరమథో [మచ్ఛరియమథో చ (క.)] పళాసో, నాహోసి మయ్హం ఘరమావసన్తియా;

అక్కోధనా భత్తువసానువత్తినీ, ఉపోసథే నిచ్చహమప్పమత్తా.

౧౨౯. ‘‘చాతుద్దసిం పఞ్చదసిం, యా చ [యావ (సీ. అట్ఠ., క. అట్ఠ.) థేరీగాథాఅట్ఠకథా పస్సితబ్బా] పక్ఖస్స అట్ఠమీ;

పాటిహారియపక్ఖఞ్చ, అట్ఠఙ్గసుసమాగతం.

౧౩౦. ‘‘ఉపోసథం ఉపవసిస్సం, సదా సీలేసు సంవుతా;

సఞ్ఞమా సంవిభాగా చ, విమానం ఆవసామహం [ఆవసామిమం (సీ. అట్ఠ., క.) పరతో పన సబ్బత్థపి ‘‘ఆవసామహం’’ ఇచ్చేవ దిస్సతి].

౧౩౧. ‘‘పాణాతిపాతా విరతా, ముసావాదా చ సఞ్ఞతా;

థేయ్యా చ అతిచారా చ, మజ్జపానా చ ఆరకా [ఆరతా (?)].

౧౩౨. ‘‘పఞ్చసిక్ఖాపదే రతా, అరియసచ్చాన కోవిదా;

ఉపాసికా చక్ఖుమతో, గోతమస్స యసస్సినో.

౧౩౩. ‘‘సాహం సకేన సీలేన, యససా చ యసస్సినీ;

అనుభోమి సకం పుఞ్ఞం, సుఖితా చమ్హినామయా.

౧౩౪. ‘‘తేన మేతాదిసో వణ్ణో, తేన మే ఇధ మిజ్ఝతి;

ఉప్పజ్జన్తి చ మే భోగా, యే కేచి మనసో పియా.

౧౩౫. ‘‘అక్ఖామి తే భిక్ఖు మహానుభావ, మనుస్సభూతా యమహం అకాసిం;

తేనమ్హి ఏవం జలితానుభావా, వణ్ణో చ మే సబ్బదిసా పభాసతీతి.

౧౩౬. ‘‘మమ చ, భన్తే, వచనేన భగవతో పాదే సిరసా వన్దేయ్యాసి – ‘ఉత్తరా నామ, భన్తే, ఉపాసికా భగవతో పాదే సిరసా వన్దతీ’తి. అనచ్ఛరియం ఖో పనేతం, భన్తే, యం మం భగవా అఞ్ఞతరస్మిం సామఞ్ఞఫలే బ్యాకరేయ్య [బ్యాకరేయ్యాతి (?)], తం భగవా సకదాగామిఫలే బ్యాకాసీ’’తి.

ఉత్తరావిమానం పన్నరసమం.