౧౧. పఠమపతిబ్బతావిమానవత్థు

౯౩. ‘‘కోఞ్చా మయూరా దివియా చ హంసా, వగ్గుస్సరా కోకిలా సమ్పతన్తి;

పుప్ఫాభికిణ్ణం రమ్మమిదం విమానం, అనేకచిత్తం నరనారిసేవితం [నరనారీభి సేవితం (క.)].

౯౪. ‘‘తత్థచ్ఛసి దేవి మహానుభావే, ఇద్ధీ వికుబ్బన్తి అనేకరూపా;

ఇమా చ తే అచ్ఛరాయో సమన్తతో, నచ్చన్తి గాయన్తి పమోదయన్తి చ.

౯౫. ‘‘దేవిద్ధిపత్తాసి మహానుభావే, మనుస్సభూతా కిమకాసి పుఞ్ఞం;

కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.

౯౬. సా దేవతా అత్తమనా, మోగ్గల్లానేన పుచ్ఛితా;

పఞ్హం పుట్ఠా వియాకాసి, యస్స కమ్మస్సిదం ఫలం.

౯౭. ‘‘అహం మనుస్సేసు మనుస్సభూతా, పతిబ్బతానఞ్ఞమనా అహోసిం;

మాతావ పుత్తం అనురక్ఖమానా, కుద్ధాపిహం [కుద్ధాపహం (సీ.)] నప్ఫరుసం అవోచం.

౯౮. ‘‘సచ్చే ఠితా మోసవజ్జం పహాయ, దానే రతా సఙ్గహితత్తభావా;

అన్నఞ్చ పానఞ్చ పసన్నచిత్తా, సక్కచ్చ దానం విపులం అదాసిం.

౯౯. ‘‘తేన మేతాదిసో వణ్ణో, తేన మే ఇధ మిజ్ఝతి;

ఉప్పజ్జన్తి చ మే భోగా, యే కేచి మనసో పియా.

౧౦౦. ‘‘అక్ఖామి తే భిక్ఖు మహానుభావ, మనుస్సభూతా యమకాసి పుఞ్ఞం;

తేనమ్హి ఏవం జలితానుభావా, వణ్ణో చ మే సబ్బదిసా పభాసతీ’’తి.

పఠమపతిబ్బతావిమానం ఏకాదసమం.