౧౨. దుతియపతిబ్బతావిమానవత్థు

౧౦౧. ‘‘వేళురియథమ్భం రుచిరం పభస్సరం, విమానమారుయ్హ అనేకచిత్తం;

తత్థచ్ఛసి దేవి మహానుభావే, ఉచ్చావచా ఇద్ధి వికుబ్బమానా;

ఇమా చ తే అచ్ఛరాయో సమన్తతో, నచ్చన్తి గాయన్తి పమోదయన్తి చ.

౧౦౨. ‘‘దేవిద్ధిపత్తాసి మహానుభావే, మనుస్సభూతా కిమకాసి పుఞ్ఞం;

కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.

౧౦౩. సా దేవతా అత్తమనా, మోగ్గల్లానేన పుచ్ఛితా;

పఞ్హం పుట్ఠా వియాకాసి, యస్స కమ్మస్సిదం ఫలం.

౧౦౪. ‘‘అహం మనుస్సేసు మనుస్సభూతా, ఉపాసికా చక్ఖుమతో అహోసిం;

పాణాతిపాతా విరతా అహోసిం, లోకే అదిన్నం పరివజ్జయిస్సం.

౧౦౫. ‘‘అమజ్జపా నో చ [నాపి (స్యా.)] ముసా అభాణిం [అభాసిం (క.)], సకేన సామినా [సామినావ (సీ.)] అహోసిం తుట్ఠా;

అన్నఞ్చ పానఞ్చ పసన్నచిత్తా, సక్కచ్చ దానం విపులం అదాసిం.

౧౦౬. ‘‘తేన మేతాదిసో వణ్ణో, తేన మే ఇధ మిజ్ఝతి;

ఉప్పజ్జన్తి చ మే భోగా, యే కేచి మనసో పియా.

౧౦౭. ‘‘అక్ఖామి తే భిక్ఖు మహానుభావ, మనుస్సభూతా యమకాసి పుఞ్ఞం;

తేనమ్హి ఏవం జలితానుభావా, వణ్ణో చ మే సబ్బదిసా పభాసతీ’’తి.

దుతియపతిబ్బతావిమానం ద్వాదసమం.